កីឡាអន្តរជាតិ
អន្តរជាតិ
កីឡាអាស៊ី៖ កូរ៉េខាងត្បូងឈ្នះជប៉ុន ២-១ បានមេដាយមាស ជួយ Son រួចផុតកាតព្វកិច្ចយោធា
× Son Heung-min រួចផុតពីកាតព្វកិច្ចយោធាក្នុងប្រទេសកំណើត បន្ទាប់ពីជួយក្រុមជម្រើសជាតិកូរ៉េខាងត្បូងក្រោមអាយុ២៣ឆ្នាំ (U23) ឈ្នះមេដាយមាសដោយការផ្តួលជប៉ុន ២-១ ក្នុងការប្រកួតវគ្គផ្តាច់ព្រ័ត្រវិញ្ញាសាកីឡាបាល់ទាត់បុរសនៃព្រឹត្តិការណ៍កីឡាអាស៊ី Asian Games នៅឥណ្ឌូណេស៊ី។
កូរ៉េខាងត្បូង និងជប៉ុនបានបញ្ចប់ទៅក្នុងលទ្ធផលសូន្យស្មើពីការប្រកួតរយៈពេល៩០នាទី នាកីឡដ្ឋាន Pakan Sari Stadium។ ក្រុមយក្សតំបន់អាស៊ីទាំងពីរបានឈានដល់វគ្គបន្ថែមម៉ោង១៥នាទីដំបូង ហើយខ្សែប្រយុទ្ធ Lee Seungwoo បានជួយកូរ៉េខាងត្បូងរកគ្រាប់បាល់នាំមុខជប៉ុនមុននៅ៣នាទីដំបូងមុន Hwang Hee Chan ស៊ុតគ្រាប់ទី២នៅនាទី១០១។ យ៉ាងណា ជប៉ុនក៏បានវាយបករកបាន១គ្រាប់វិញផងដែរនៅនាទី១០៥ ដោយកីឡាករ UEDA Ayase។ ចប់ការប្រកួតក្រោយបន្ថែម១៥នាទី២ដង កូរ៉េខាងត្បូងឈ្នះជប៉ុន ២-១។
Son បានខកខានការចាប់ផ្តើមរដូវកាលថ្មីឲ្យ Tottenham Hotspur ក្នុងក្របខណ្ឌ Premier League ដើម្បីទៅជួយក្រុមជម្រើសជាតិកូរ៉េខាងត្បូងប្រជែងមេដាយពីកីឡាអាស៊ីលើកទី១៨។ ក្តីរំពឹងរបស់ខ្សែប្រយុទ្ធវ័យ២៦ បានជោគជ័យហើយជាមួយនឹងការជួយក្រុមទទួលបានមេដាយមាស។
ការទទួលបានមេដាយមាសខាងលើមានន័យថា ខ្សែបម្រើដែលកំពុងឡើងជើងរូបនេះ អាចត្រឡប់ទៅជួយក្រុមមាន់ខ្នាយមាស Spurs វិញ ដោយមិនចាំបាច់អនុវត្តន៍កាតព្វកិច្ចយោធារយៈពេល២១ខែនៅឯស្រុកកំណើតឡើយ។
ដោយឡែកមុនជំនួបដណ្តើមមេដាយមាស ក៏មានការប្រជែមេដាយសំរឹទ្ធមួយគូទៀតផងដែរ ដោយក្រុមជម្រើសជាតិអេមីរ៉ាតអារ៉ាប់រួមបានយកឈ្នះក្រុមមកពីប្រទេសអាស៊ានវៀតណាមដោយបាល់កាត់សេចក្តីប៉េណាល់ទីក្នុងលទ្ធផល ៤-៣៕
Tag:
Asian Game
Son Heung-min
© រក្សាសិទ្ធិដោយ thmeythmey.com