ឧបករណ៍ដាំគ្រាប់ស្រូវរបស់កម្ពុជា ទទួលបានពានរង្វាន់ពីអាមេរិក

ជាតិ

ឧបករណ៍ដាំគ្រាប់ស្រូវរបស់កម្ពុជា ទទួលបានពានរង្វាន់ពីអាមេរិក

05, Sep 2018 , 9:59 am

រូបភាព

ដោយ: ថ្មីៗ

ភ្នំពេញ៖ សហគ្រាសសង្គម កសិកម្មឈ្លាសវៃនៅប្រទេសកម្ពុជា បានទទួលពានរង្វាន់កំពូលរបស់រដ្ឋាភិបាលអាមេរិកដែលមានឈ្មោះថា ប៉ាតង់សម្រាប់មនុស្សជាតិ (Patents for Humanity) សម្រាប់ឧបករណ៍ដាំគ្រាប់ស្រូវឈ្មោះអ៊ីឡាយ ដែលជួយបង្កើនទិន្នផលនិងកាត់បន្ថយកម្លាំងពលកម្ម។ ពានរង្វាន់កិត្តិយសកំពូលរបស់ការិយាល័យប៉ាតង់(ប្រកាសនីយបត្រតក្កកម្ម)និងស្លាកសញ្ញារបស់សហរដ្ឋអាមេរិក គឺសម្រាប់ផ្តល់ជូនអ្នកកែច្នៃណា ដែលបានប្រើប្រាស់បច្ចេកវិទ្យាប្រកបដោយភាពច្នៃប្រឌិត ក្នុងការដោះស្រាយបញ្ហាប្រឈមនានារបស់មនុស្សជាតិ។

លោក សាន ប៊ុននីកា នាយកគ្រប់គ្រងកសិកម្មឈ្លាសវៃ ដែលបានស្រាវជ្រាវ និងដឹកនាំក្រុមការងារផលិតឧបករណ៍នេះ បាននិយាយថា ឧបករណ៍ដាំគ្រាប់ស្រូវអ៊ីឡាយ ត្រូវបានភ្ជាប់ជាមួយនឹងគោយន្តដៃនៅពេលដាំស្រូវ ហើយប្រើកម្លាំងខ្យល់ ដោយរុញគ្រាប់ពូជស្រូវចូលទៅក្នុងដីស្រែដែលមានទឹក។ លោក បានបន្ថែមថា ឧបរករណ៍អ៊ីឡាយនេះ អាចជួយកសិករក្នុងការកាត់បន្ថយគ្រាប់ពូជស្រូវ ដោយប្រើចន្លោះពី៣០ទៅ១០០គីឡូក្រាមតែប៉ុណ្ណោះក្នុងមួយហិកតា (តាមទម្លាប់កសិករប្រើគ្រាប់ពូជស្រូវពី ២០០ ទៅ ៣៥០គីឡូក្រាមក្នុងមួយហិកតា)។ បើតាមលោក ប៊ុននីកា ឧបករណ៍អ៊ីឡាយក៏អាចជួយបង្កើនទិន្នផលរហូតដល់២០ភាគរយ និងជួយកាត់បន្ថយការចំណាយលើជី និងថ្នាំកសិកម្មផងដែរ។

នាយកគ្រប់គ្រងកសិកម្មឈ្លាសវៃ បាននិយាយដូច្នេះថា៖«ដំណាំស្រូវដាំដោយប្រើឧបករណ៍អ៊ីឡាយដុះចេញជាជួរ អាចស្រូបយកពន្លឺព្រះអាទិត្យបានច្រើននិងមានខ្យល់ចេញចូលបានល្អ ដែលអាចជួយក្នុងការកាត់បន្ថយបញ្ហាជំងឺ និងកត្តាចង្រៃផ្សេងៗបានផងដែរ។ លើសពីនេះអ៊ីឡាយក៏ជួយដោះស្រាយបញ្ហាកង្វះកម្លាំងពលកម្មក្នុងការងារកសិកម្ម ដោយប្រើពេលតែ៤៥នាទីប៉ុណ្ណោះក្នុងផ្ទៃដីស្រែមួយហិចតារីឯការសាបព្រោះ ដោយដៃកសិករប្រើពេលប្រហែលពីរម៉ោង និងចំណាយពេលរាប់សប្តាហ៍បើស្ទូងដោយដៃ»។

សហគ្រាសសង្គមកសិកម្មឈ្លាសវៃ និងបេក្ខភាពចំនួនប្រាំបីផ្សេងទៀត (ដែលត្រូវបានជ្រើសចេញពីស្ថាប័នធំៗ ចំនួន៦៩ មកពីជុំវិញពិភពលោក)នឹងត្រូវទៅទទួលរង្វាន់ប៉ាតង់សម្រាប់មនុស្សជាតិ (Patents for Humanity) នេះ នៅសហរដ្ឋអាមេរិកក្នុងអំឡុងខែវិច្ឆិកា ឆ្នាំ២០១៨ខាងមុខ។

«ខ្ញុំពិតជាសប្បាយចិត្តណាស់ពេលបានដឹងថាឧបករណ៍អ៊ីឡាយនេះទទួលបានពានរង្វាន់ប្រកបដោយកិត្យានុភាពនេះ ហើយពេលខ្លះខ្ញុំសឹងតែមិនជឿថាការទទួលពានរង្វាន់នេះវាជារឿងពិត។ នេះជាភស្តុតាងមួយបង្ហាញថា យើងជាខ្មែរក៏អាចធ្វើអ្វីៗបានដែរ ឲ្យតែមានឱកាស និងធនធាន។ ដូច្នេះ ពានរង្វាន់នេះគឺជាសិមិទ្ឋិផលមួយរបស់ប្រជាពលរដ្ឋកម្ពុជាទាំងមូល»។ នេះជាការបញ្ជាក់របស់លោក សាន ប៊ុននីកា ដែលបានបន្ថែមថា ការស្វែងរកកម្លាំងពលកម្មក្នុងការងារកសិកម្ម គឺជាការលំបាកមួយ ខណៈដែលតម្លៃឈ្នួលកាន់តែថ្លៃឡើងៗ ពីមួយឆ្នាំទៅមួយឆ្នាំ។

រដ្ឋាភិបាលអូស្ត្រាលី តាមរយៈកម្មវិធីខ្សែសង្វាក់តម្លៃកម្មកសិកម្មកម្ពុជា ហៅកាត់ថា កាវ៉ាក់ (CAVAC)និងវិទ្យាស្ថានស្រាវជ្រាវដំណាំស្រូវអន្តរជាតិ ដែលហៅកាត់ថា អ៊ីរី (IRRI) នៅប្រទេសហ្វីលីពីនក៏បានសាកល្បងនិងបង្ហាញពីឧបករណ៍អ៊ីឡាយ នៅក្នុងកន្លែងប្រមូលផ្តុំបច្ចេកវិទ្យារបស់ខ្លួនផងដែរ។ IRRI សង្ឃឹមថា ឧបករណ៍អ៊ីឡាយនេះ នឹងទទួលបានការចាប់អារម្មណ៍នៅក្នុងចំណោមបណ្តាប្រទេសនៅអាស៊ី និងបណ្តាប្រទេសផ្សេងៗទៀត។

សហគ្រាសសង្គម កសិកម្មឈ្លាសវៃ ជាផ្នែកមួយរបស់ Brooklyn Bridge to Cambodia (BB2C) ប្តេជ្ញាស្វែងរកនូវដំណោះស្រាយប្រកបដោយភាពច្នៃប្រឌិត សម្រាប់ជួយដល់កសិករនៅក្នុងប្រទេសកម្ពុជា៕