អាមេរិកសង្ឃឹមផ្តើមចំណងថ្មីជាមួយសម្ព័ន្ធមិត្តចាស់ «ប៉ាគីស្ថាន» តែទាមទារឲ្យឈប់គាំទ្រតាលីបង់

អន្តរជាតិ

អាមេរិកសង្ឃឹមផ្តើមចំណងថ្មីជាមួយសម្ព័ន្ធមិត្តចាស់ «ប៉ាគីស្ថាន» តែទាមទារឲ្យឈប់គាំទ្រតាលីបង់

05, Sep 2018 , 9:19 pm

រូបភាព

ដោយ: ថ្មីៗ

រដ្ឋមន្ត្រីការបរទេសអាមេរិក ចាប់ផ្តើមដំណើរទស្សនកិច្ចទៅកាន់ប្រទេសប៉ាគីស្ថាននៅសប្តាហ៍នេះដោយរំពឹងស្តារទំនាក់ទំនងជាមួយសម្ព័ន្ធមិត្តអាស៊ីខាងត្បូងឡើងវិញក្នុងអាណត្តិរដ្ឋាភិបាលថ្មី។ ទស្សនកិច្ចនេះក៏កើតឡើងប៉ុន្មានថ្ងៃប៉ុណ្ណោះក្រោយមានការលុបចោលជំនួយយោធាទំហំ ៣០០លានដុល្លារដល់ប៉ាគីស្ថានដែរ។

ថ្លែងពីលើយន្តហោះ មុនចាប់ផ្តើមដំណើរទស្សនកិច្ចនៅថ្ងៃអង្គារទី ៤ ខែកញ្ញា ប្រមុខការទូតអាមេរិកលោក ម៉ៃ ប៉ុមប៉េអូ បានប្រាប់អ្នកសារព័ត៌មានថា លោកសង្ឃឹមរៀបចំចំណងមិត្តភាពជាមួយប៉ាគីស្ថានឡើងវិញ ស្របពេលដែលទំនាក់ទំនងទ្វេភាគីធ្លាក់ចុះល្អក់កករ។

យោងតាមទីភ្នាក់ងារព័ត៌មាន AFP អតីតប្រធានទីភ្នាក់ងារចារកម្ម CIA បាននិយាយដូច្នេះ៖ «ការចុះចតដំបូងគឺ ប៉ាគីស្ថាន។ មេដឹកនាំថ្មីនៅទីនោះចង់ចាប់ផ្តើមជំរុញការរៀបចំសម្ព័ន្ធភាពឡើងវិញរវាងប្រទេសយើងទាំងពីរ»។

ប្រមុខការទូតអាមេរិករូបនេះជឿជាក់ថា មេដឹកនាំប៉ាគីស្ថានថ្មីដែលទើបជាប់ឆ្នោតលោក Imran khan ដែលមានឆន្ទៈចង់ពង្រឹងទំនាក់ទំនងជាមួយអាមេរិកនោះនឹងមានភាពវិជ្ជមានសម្រាប់ការរៀបចំចំណងមិត្តភាពទ្វេភាគីនេះបានរហ័ស។

លោក ប៉ុមប៉េអូ បានបន្ថែមដូច្នេះ៖ «វាមានបញ្ហាប្រឈមច្រើនសម្រាប់ប្រទេសយើងទាំងពីរ ប៉ុន្តែយើងសង្ឃឹមថា ដោយសហការជាមួយរបបដឹកនាំថ្មីនេះ យើងនឹងអាចស្វែងរកចំណុចរួមបាន ហើយយើងអាចចាប់ផ្តើមធ្វើការងារលើបញ្ហាដែលមានរួមគ្នា។

នៅក្នុងទស្សនកិច្ចនេះដែរ វាក៏មានការចូលពីសំណាក់នាយសេនាធិការកងទ័ពអាមេរិកលោកឧត្តមសេនីយ៍ Joe Dunford ផងដែរ ខណៈដែលការជំរុញការស្វែងរកសន្តិភាពនៅអាហ្វហ្គានីស្ថាននៅជារឿងអាទិភាពរបស់អាមេរិកដដែល។

យ៉ាងណាក៏ដោយចុះ ដំណើរទស្សនកិច្ចរបស់លោក ប៉ុមប៉េអូ និងសម្តីបង្កប់ដោយភាពវិជ្ជមានចំពោះចំណងទំនាក់ទំនងរវាងអាមេរិកនិងប៉ាគីស្ថាននេះ កើតឡើងប៉ុន្មានថ្ងៃប៉ុណ្ណោះក្រោយក្រុងវ៉ាស៊ីនតោនប្រកាសលុបចោលជំនួយយោធាមានទំហំប្រមាណ ៣០០លានដុល្លារសម្រាប់ប៉ាគីស្ថាន។ ការសម្រេចលុបចោលជំនួយនេះគឺដោយសារតែប៉ាគីស្ថាននៅរារែកក្នុងការគាំទ្រយុទ្ធសាស្ត្រអាមេរិកក្នុងតំបន់ផង។

ជានិច្ចជាកាល មន្ត្រីអាមេរិកតែងចោទប្រកាន់ថា ប៉ាគីស្ថានមិនយកចិត្តទុកដាក់ តែបែជាបន្តសហការជាមួយក្រុមតាលីបង់ និងបណ្តាញក្រុម Haqqani ដែលបន្តវាយប្រហារនៅអាហ្វហ្គានីស្ថានរហូតមកនោះ។អាមេរិកជឿជាក់ដែរថា ក្រុមនេះប្រើព្រំដែនរវាងប៉ាគីស្ថាន និងអាហ្វហ្គានីស្ថានដើម្បីធ្វើសកម្មភាពផងដែរ។

អាមេរិកនិយាយចំៗថា ភ្នាក់ងារចារកម្មផ្ទៃក្នុងប៉ាគីស្ថាន និងស្ថាប័នយោធាពាក់ព័ន្ធផ្សេងទៀតបានចំណាយលុយ និង សព្វាវុធដើម្បីគាំទ្រចលនាតាលីបង់ក្រោមហេតុផលមនោគមន៍វិទ្យាផង និងដើម្បីទប់ទល់នឹងឥទ្ធិពលឥណ្ឌាដែលកើនឡើងនៅអាហ្វហ្គានីស្ថានផង៕