អន្តរជាតិ
លោក គីម ជុងអ៊ុន និងលោក មូន ចេអ៊ីន នាជំនួបទល់មុខលើកទី១ (រូបភាព AFP)
×![]()
ដោយ: តន ចាន់រិទ្ធារ៉ា
ជំនួបមេដឹកនាំអន្តរកូរ៉េលើកទី៥ នឹងធ្វើឡើងចាប់ពីថ្ងៃទី១៨ ដល់ថ្ងៃទី២០ ខែកញ្ញា នៅរដ្ឋធានីព្យុងយ៉ាង តាមការឯកភាពគ្នាកន្លងមក។ ប្រេសិតកូរ៉េខាងត្បូង ជុង អ៊ីយ៉ុង (Chung Eui-yong) ជាអ្នកប្រកាសកាលបរិច្ឆេទនេះនៅថ្ងៃទី៦ ខែកញ្ញា ក្រោយត្រឡប់ពីធ្វើទស្សនកិច្ចនៅកូរ៉េខាងជើងមួយថ្ងៃមុននេះ។ នាជំនួបនោះ មេដឹកនាំកូរ៉េខាងជើង គីម ជុងអ៊ុន ក៏ប្រកាសពីការប្ដេជ្ញាចិត្តក្នុងការរំសាយនុយក្លេអ៊ែររបស់ខ្លួនដដែល។
ប្រធានាធិបតីកូរ៉េខាងត្បូង មូន ចេអ៊ីន និងមេដឹកនាំកំពូលកូរ៉េខាងជើង គីម ជុងអ៊ុន នឹងជួបគ្នាជាថ្មីទៀត ចាប់ពីថ្ងៃទី១៨ ដល់ថ្ងៃទី២០ កញ្ញាខាងមុខនេះ នៅទីក្រុងព្យុងយ៉ាង។ នេះបើតាមការប្រកាសរបស់ទីប្រឹក្សាសន្តិសុខជាតិកូរ៉េខាងត្បូង ជុង អ៊ីយ៉ុង ក្នុងសន្និសីទសារព័ត៌មានថ្ងៃទី៦ ខែកញ្ញា មួយថ្ងៃក្រោយជួបលោក គីម ជុងអ៊ុន នាដំណើរទស្សនកិច្ចនៅកូរ៉េខាងជើង។ លោក ជុង ក៏បានជូនលិខិតមួយច្បាប់របស់លោក មូន ឲ្យលោក គីម ដែរ។
ជំនួបនៅទីក្រុងព្យុងយ៉ាងនៅពេលខ្លីខាងមុខនេះ គឺជាការជួបតទល់លើកទីបីរវាងប្រធានាធិបតីកូរ៉េខាងត្បូង និងមេដឹកនាំកូរ៉េខាងជើង ហើយជាជំនួបលើកទី៥ រវាងមេដឹកនាំកូរ៉េទាំងពីរ។ លោក មូន ជួបលោក គីម លើកដំបូងនៅខែមេសានៅកូរ៉េខាងត្បូង ដែលវាក៏ជាលើកទីមួយដែលមេដឹកនាំកូរ៉េខាងជើងជាន់ទឹកដីកូរ៉េខាងត្បូង។ ជំនួបមូន-គីម លើកទីពីរ ធ្វើឡើងនៅខែឧសភា នៅព្រំដែនកូរ៉េប៉ែកខាងជើងខ្សែស្របទី៣៨ ក្នុងទឹកដីកូរ៉េខាងជើង។
យោងតាមទីភ្នាក់ងារព័ត៌មាន Yonhap លោក ជុង និយាយថា កូរ៉េទាំងពីរក៏បានឯកភាពគ្នារៀបចំជំនួបថ្នាក់ខ្ពស់មួយនៅសប្ដាហ៍ក្រោយដើម្បីត្រៀមជំនួបកំពូលមេដឹកនាំ។ លោកបន្តថា ជំនួបអន្តរកូរ៉េនៅព្យុងយ៉ាង នឹងផ្ដោតសំខាន់លើពិនិត្យឡើងវិញការអនុវត្តកិច្ចព្រមព្រៀងប៉ាន់មុនជុមខែមេសា និងទិសដៅត្រូវអនុវត្តបន្ត។ ការពង្រឹងទំនាក់ទំនងអន្តរកូរ៉េ និងការបង្កើតសន្តិភាពអចិន្ត្រៃយ៍នៅឧបទ្វីបកូរ៉េ ជាពិសេសការរំសាយនុយក្លេអ៊ែរ ក៏ត្រូវជជែកដែរ។
ជុំវិញការរំសាយនុយក្លេអ៊ែរនេះ មេដឹកនាំកូរ៉េខាងជើងបានប្រាប់ប្រេសិតកូរ៉េខាងត្បូងពីជំហររបស់ខ្លួនក្នុងការបន្តធ្វើការជាមួយអាមេរិករហូតដល់ទីបញ្ចប់។ លោក ជុង បានរំឭកសម្ដីលោក គីម ដែលជាប្រធានគណៈកម្មការកិច្ចការរដ្ឋកូរ៉េខាងជើងថា៖ «លោកប្រធាន គីម បានបញ្ជាក់ពីការប្ដេជ្ញាចិត្តរឹងមាំក្នុងការលុបបំបាត់នុយក្លេអ៊ែរទាំងស្រុងពីឧបទ្វីបកូរ៉េ និងបន្តកិច្ចសហប្រតិបត្តិការជិតស្និទ្ធជាមួយក្រុងសេអ៊ូល និងអាមេរិកផងដែរ»។
ក្រៅពីបញ្ហានុយក្លេអ៊ែរ មន្ត្រីទទួលបន្ទុកសន្តិសុខជាតិរបស់កូរ៉ខាងត្បូងក៏លើកឡើងទៀតថា មេដឹកនាំកូរ៉េទាំងពីរ ក៏នឹងពិភាក្សាពីការកាត់បន្ថយភាពតានតឹងរវាងយោធាប្រទេសទាំងពីរ តាមរយៈការបង្កើតនការជឿទុកចិត្ត និងចៀសវាងជម្លោះប្រដាប់អាវុធ។ នាដំណើរទស្សនកិច្ចមួយថ្ងៃនៅព្យុងយ៉ាងរបស់លោក ជុង កូរ៉េទាំងពីរក៏បានឯកភាពគ្នាបើកការិយាល័យកិច្ចការរួមគ្នានៅតំបន់ឧស្សាហកម្ម Kaesong ក្នុងទឹកដីកូរ៉េខាងជើងឲ្យបានមុនជំនួបមេដឹកនាំដែរ៕
Tag:
កូរ៉េខាងត្បូង
កូរ៉េខាងជើង
មូន ចេអ៊ីន
គីម ជុងអ៊ុន
ជុង អ៊ីយ៉ុង
© រក្សាសិទ្ធិដោយ thmeythmey.com
