ជាតិ
នយោបាយជាតិ
លោក ប៉ុល សារឿន លោក គន់ គីម និងលោកមាស សុភា ពីមេទ័ពទៅកាន់តំណែងទេសរដ្ឋមន្ត្រី
× អតីតមេទ័ព៣រូបរួមមាន លោក ប៉ុល សារឿន, លោក គន់ គីម និងលោក មាស សុភា ក្លាយជាទេសរដ្ឋមន្ត្រីក្នុងសមាសភាពរបស់រដ្ឋាភិបាល។ នេះបើតាមបញ្ជីឈ្មោះសមាភាពរដ្ឋាភិបាល ដែលត្រូវបានរដ្ឋសភាបោះឆ្នោតគាំទ្រ នៅព្រឹកថ្ងៃទី៦ កញ្ញានេះ។
អតីតអគ្គមេបញ្ជាការនៃកងយោធពលខេមរភូមិន្ទលោក ប៉ុល សារឿន ,អតីតនាយសេនាធិការចម្រុះ នៃកងយោធពលខេមរភូមិលោក គន់ គីម និងអតីតមេបញ្ជាការនៃកងទ័ពជើងគោកលោក មាស សុភា ទទួលបានឋានៈទេសរដ្ឋមន្ត្រី ទទួលបន្ទុកបេសកកម្មពិសេស ក្នុងអាណត្តិទី៦នេះ។
យោងតាម
ព្រះរាជក្រឹត្យ ចុះថ្ងៃទី៦ ខែកញ្ញា ព្រះមហាក្សត្រ បានត្រាស់បង្គាប់តែងតាំង លោកឧត្តមសេនីយ៍ឯក វង្ស ពិសេន ជំនួស លោក ប៉ុល សារឿន លោក ហ៊ុន ម៉ាណែត ជំនួសលោក មាស សុភា និងលោក ឥត សារ៉ាត់ ជំនួសលោក គន់ គីម។
ជាមួយគ្នានេះ លោក ហូ សិទ្ធី និងលោក អូស្មាន ហាស្សាន់ ដែលជាអតីតរដ្ឋមន្ត្រីប្រតិភូអមនាយករដ្ឋមន្ត្រី ទទួលបានតំណែងទេសរដ្ឋមន្ត្រី ទទួលផងដែរ។ ទេសរដ្ឋមន្ត្រីអាណត្តិទី៦នេះ មានចំនួន១៧នាក់ បើសរុបទាំងមន្ត្រីទាំង៥នាក់ខាងលើនេះ ក្នុងនោះមានលោក ឆាយ ថន លោក ចម ប្រសិទ្ធ លោក ញឹម វណ្ណដា លោក ស៊ុន ចាន់ថុល លោក ឱម យិនទៀង លោក អៀង ម៉ូលី លោក វ៉ា គឹមហុង លោក យឹម ណុលឡា លោក ហ៊ឹម ឆែម លោក ជិន ប៊ុនស៊ាន លោក ឃុន ហាំង និងលោក លី ធុជ។
សម្រាប់តំណាងរាស្ត្រ ដែលមានតំណែងទេសរដ្ឋមន្ត្រី និងរដ្ឋមន្ត្រីចុះក្រោម ត្រូវលាលែងចេញពីតំណែង។
«សមាជិក សមាជិកានៃរដ្ឋសភារបស់យើង ដែលស្ថិតនៅក្នុងជួររដ្ឋាភិបាល តាមគោលការណ៍កំណត់គឺអ្នកដែលកាន់តួនាទីផ្នែករដ្ឋាភិបាល គឺទុកនៅជាសមាជិកសភា ត្រឹមនាយករដ្ឋមន្ត្រី ដែលនាយករដ្ឋមន្ត្រី មានចែងនៅក្នុងរដ្ឋធម្មនុញ្ញ គឺត្រូវតែជាសមាជិករដ្ឋសភា។ ក្រៅពីនោះគឺឧបនាយករដ្ឋមន្ត្រី។ ហើយចាប់ពីថ្នាក់ទេសរដ្ឋមន្ត្រីចុះរហូតមក ត្រូវលាលែងចេញពីសមាជិករដ្ឋសភា»។ នេះបើតាមសម្ដេចនាយករដ្ឋមន្ត្រី ហ៊ុន សែន ដែលបានប្រកាសនៅក្នុងកិច្ចប្រជុំសភាពេញអង្គ បន្ទាប់ពីទទួលបានការបោះឆ្នោតទុកចិត្ត បង្កើតសមាសភាពរដ្ឋាភិបាលអាណត្តិទី៦ថា តំណាងរាស្ត្រ ដែលមានតំណែងរដ្ឋមន្ត្រីប្រតិភូអមនាយករដ្ឋមន្ត្រី និងរដ្ឋលេខាធិការ តាមរយៈ ព្រះរាជក្រឹត្យនោះ ក៏ត្រូវលាលែងពីសមាជិកសភាផងដែរ៕
Tag:
នយោបាយ
រដ្ឋសភាថ្មី
នីតិកាលទី៦
© រក្សាសិទ្ធិដោយ thmeythmey.com