អន្តរជាតិ
អាមេរិក ទទូចប៉ារ៉ាហ្កាយឲ្យគិតឡើងវិញចំពោះការផ្លាស់ប្តូរស្ថានទូតនៅអ៊ីស្រាអែល
អនុប្រធានាធិបតីអាមេរិក ម៉ៃ ផេន (រូបភាព AFP)
×![]()
នៅថ្ងៃទី០៧ កញ្ញា ឆ្នាំ២០១៨ អនុប្រធានាធិបតីអាមេរិក លោក ម៉ៃ ផេន បានទទូចឲ្យប៉ារ៉ាហ្គាយគិតឡើងវិញចំពោះការសម្រចចិត្តរើស្ថានទូតប្រចាំអ៊ីស្រាអែលរបស់ខ្លួន ពីទីក្រុងហ្ស៊េរុយសាឡិម ទៅកាន់ទីក្រុងតែលអាវីវ។ ការប្រកាសនេះ គឺធ្វើឡើងមួយថ្ងៃបន្ទាប់ពីប៉ារ៉ាហ្គាយប្រកាសប្តូរស្ថានទូតរបស់ខ្លួន ដែលធ្វើឲ្យអ៊ីស្រាអែលខឹងសម្បារយ៉ាងខ្លាំង។
រដ្ឋាភិបាលប៉ារ៉ាហ្គាយថ្មី ដែលដឹកនាំដោយលោកប្រធានាធិបតី Mario Abdo Benitez នៅថ្ងៃទី ០៦ កញ្ញា បានប្រកាសផ្លាស់ប្ដូរទីតាំងស្ថានទូតនៅទីក្រុងហ្ស៊េរុយសាឡិម ត្រឡប់ទៅកាន់ទីក្រុងតែលអាវីវវិញ។ គោលដៅនៃការផ្លាស់ប្ដូរនេះ គឺដើម្បីបង្កើតសន្តិភាពសម្រាប់ជម្លោះទឹកដីដ៏រ៉ាំរ៉ៃមួយនេះ។
ភ្លាមៗក្រោយការប្រកាសនេះ សហរដ្ឋអាមេរិក មានការស្រងាកចិត្តជាខ្លាំង។ កាលពីខែឧសភាកន្លងទៅ សហរដ្ឋអាមេរិក បានសម្រេចផ្លាស់ប្តូរទីតាំងស្ថានទូតរបស់ខ្លួនពីទីក្រុងតែលអាវីវ ទៅកាន់ទីក្រុងហ្ស៊េរុយសាឡិម ព្រមទាំងសង្ឃឹមថា បណ្ដាប្រទេសផ្សេងទៀត នឹងយកគំរូតាមខ្លួនផងដែរ។
យោងតាមទីភ្នាក់ងារសារព័ត៌មាន AFP សេតវិមានអាមេរិក បាននិយាយថា លោក ផេន បានលើកទឹកចិត្តយ៉ាងពេញទំហឹងចំពោះលោក Abdo Benitez ក្នុងការប្រកាន់ខ្ជាប់ទៅនឹងការតាំងចិត្តរបស់រដ្ឋាភិបាលមុន។ ជុំវិញរឿងនេះ គេមិនទាន់ទទួលបានការឆ្លើយតបណាមួយពីលោក Abdo Benitez ចំពោះសំណើរបស់លោក ផេន នៅឡើយទេ។
ការសម្រេចចិត្តឡើងវិញរបស់រដ្ឋាភិបាលក្រុងអាសង់ស្យុង ធ្វើឲ្យរដ្ឋាភិបាលលោកនាយករដ្ឋមន្ត្រី បេនចាមីន ណេតាន់យ៉ាហ៊ូ ខឹងយ៉ាងខ្លាំងរហូតប្រកាសដកទូតត្រឡប់ចូលស្រុកវិញភ្លាមដែរ។ លើសពីនោះ វាក៏ធ្វើឲ្យទំនាក់ទំនងអ៊ីស្រាអែល និងប៉ារ៉ាហ្កាយធ្លាក់ចុះទៅក្នុងស្ថានភាពស្រពេចស្រពិលទៀតផង។
Tag:
អាមេរិក
ប៉ារ៉ាហ្កាយ
អ៊ីស្រាអែល
© រក្សាសិទ្ធិដោយ thmeythmey.com
