FIFA Fan Award ៖ បុរសស៊ីលីដែលធ្វើដំណើរទៅគាំទ្រក្រុមចម្ងាយ១៥០០គីឡូម៉ែត្រជាប់ក្នុងបញ្ជី ៣បេក្ខភាពចុងក្រោយ

កីឡាអន្តរជាតិ

អន្តរជាតិ

FIFA Fan Award ៖ បុរសស៊ីលីដែលធ្វើដំណើរទៅគាំទ្រក្រុមចម្ងាយ១៥០០គីឡូម៉ែត្រជាប់ក្នុងបញ្ជី ៣បេក្ខភាពចុងក្រោយ

09, Sep 2018 , 5:39 pm

រូបភាព

ដោយ: ទេព ពិទូរ្យ

ពានរង្វាន់អ្នកគាំទ្រឆ្នើមបំផុតប្រចាំឆ្នាំ២០១៨ (FIFA Fan Award) ៣បេក្ខភាពចុងក្រោយ ត្រូវបានប្រគល់ជូនអ្នកគាំទ្រក្រុមជម្រើសជាតិប៉េរូនៅឯការប្រកួត World Cup និង សកម្មភាពគំរូក្នុងកីឡដ្ឋានរបស់ក្រុមអ្នកគាំទ្រក្រុមជម្រើសជាតិជប៉ុនរួមជាមួយសេណេហ្គាល់នៅរុស្ស៊ី។ អ្នកគាំទ្រជនជាតិស៊ីលោក Sebastian Carrera បានធ្វើដំណើរចម្ងាយ ១៥០០គីឡូម៉ែត្រដើម្បីទៅគាំទ្រក្រុម Deportes de Puerto Montt។

មិនត្រឹមតែផ្តល់ពានរង្វាន់សម្រាប់កីឡាករបាល់ទាត់ គ្រូបង្វឹកឆ្មើមប្រចាំឆ្នាំនោះទេ ប៉ុន្តែសហព័ន្ធកីឡាបាល់ទាត់អន្តរជាតិ FIFA ក៏បានប្រគល់រង្វាន់ជ័យលាភីជាច្រើនទៀតដែលក្នុងនោះក៏មានពានរង្វាន់អ្នកគាំទ្រឆ្នើមបំផុតប្រចាំឆ្នាំ (FIFA Fan Award) ផងដែរ។

FIFA បានសម្រេចជ្រើសយក ៣បេក្ខភាពចុងក្រោយដើម្បីប្រជែងពានអ្នកគាំទ្រឆ្នើមបំផុតប្រចាំឆ្នាំ២០១៨ រួមមាន៖

អ្នកគាំទ្រជនជាតិស៊ីលីឈ្មោះ Sebastian Carrera ដែលបានធ្វើដំណើរដោយខ្លួនឯងដល់ទៅ ១៥០០គីឡូម៉ែត្រដើម្បីទៅគាំទ្រក្រុមកីឡាបាល់ទាត់ Deportes de Puerto Montt នៃលីគលំដាប់ទី២ស៊ីលី Primera B ។

Carrera បានធ្វើឲ្យក្រុម Puerto Montt ភ្ញាក់ផ្អើលយ៉ាងខ្លាំង ព្រោះទឹកចិត្តគាំទ្រដ៏ស្មោះស្ម័គ្ររបស់គេដោយសុខចិត្តធ្វើដំណើរទៅរហូតដល់រយៈពេល២ថ្ងៃ និង២ថ្ងៃមកវិញក្នុងរយៈចំងាយសរុប៣០០០គីឡូម៉ែត្រ។

ចំណែកក្រុមអ្នកគាំទ្រជម្រើសជាតិប៉េរូក៏ស្ថិតក្នុងបញ្ជីបេក្ខភាពដើម្បីប្រជែងពានរង្វាន់ FIFA Fan Award នេះដែរ។ អ្នកគាំទ្រប៉េរូចំនួន៤០០០០នាក់ បានធ្វើដំណើរទៅរុស្ស៊ីដើម្បីគាំទ្រក្រុមជម្រើសជាតិខ្លួនដែលបានកៅអីលើកដំបូងក្នុងរយៈពេល៣៦ឆ្នាំ ក្នុងការប្រកួតកីឡាបាល់ទាត់ World Cup ឆ្នាំ២០១៨។ ចំនួនអ្នកគាំទ្រដ៏ច្រើនសន្ធឹកជាមួយនឹងឯកសណ្ឋានព័ណ៌ក្រហមបានធ្វើឲ្យមានភាពស្រស់បំព្រង និងទាក់ទាញនៅក្នុងកីឡដ្ឋានរាល់ពេលការប្រកួតរបស់ក្រុមជម្រើសជាតិប៉េរូ។

បេក្ខភាពចុងក្រោយសម្រាប់ពានរង្វាន់នេះ ស្ថាប័នគ្រប់គ្រងកីឡាពិភពលោកបានជ្រើសយកសកម្មភាពគំរូដល់សង្គមរបស់ក្រុមអ្នកគាំទ្រជប៉ុន និងសេណេហ្គាល់នាការប្រកួត World Cup នៅរុស្ស៊ីកន្លងមក។ អ្នកគាំទ្រក្រុមទាំងពីរបានបង្ហាញពីការគិតគូបរិដ្ឋានដ៏គួរឲ្យគោរព ដោយដើររើសសំរាមដែលនៅរាយប៉ាយក្នុងកីឡដ្ឋាននៅរៀងរាល់ក្រោយការប្រកួតបើទោះបីក្រុមរបស់ពួកគេចាញ់ ឬឈ្នះក៏ដោយ។ សកម្មភាពទាំងអស់នោះក៏បានទទួលការកោតសរសើរយ៉ាងខ្លាំងក្លាពីសំណាក់អ្នកគាំទ្រផ្សេងទៀតនៅជុំវិញពិភពលោក។