ជាតិ
ក្រសួងអប់រំ បង្កើតគណៈកម្មការកោសល្យវិច័យ ពិនិត្យដោះស្រាយការមិនពេញចិត្តនឹងលទ្ធផលបាក់ឌុប
× ភ្នំពេញ៖ក្រសួងអប់រំ យុវជន និងកីឡា បានរៀបចំគណៈកម្មការកោសល្យវិច័យ ដើម្បីពិនិត្យ និងដោះស្រាយ ការមិនពេញចិត្តនឹងលទ្ធផលប្រឡងបាក់ឌុបឆ្នាំ២០១៨ ជូនដល់បេក្ខជន មាតាបិតា អាណាព្យាបាល និងអ្នកពាក់ព័ន្ធ ប្រកបដោយវិជ្ជាជីវៈ និងស្មារតីទទួលខុសត្រូវ។ នេះបើតាមសេចក្តីប្រកាសព័ត៌មានរបស់ក្រសួងអប់រំ ចេញផ្សាយនៅព្រឹកថ្ងៃទី១២ ខែកញ្ញា។
តាមប្រកាសព័ត៌មានដដែល គណៈកម្មការកោសល្យវិច័យ ចាប់ផ្តើមដំណើរការការងាររយៈពេល១សប្តាហ៍ គិតចាប់ពីថ្ងៃទី១២ ខែកញ្ញានេះតទៅ។
ទាក់ទងនឹងលទ្ធផលបាក់ឌុបឆ្នាំ២០១៨នេះ ដើមឡើយទាំងក្រសួងអប់រំ និងអង្គភាពប្រឆាំងអំពើពុករលួយដែលបានចូលរួមសង្កេតការណ៍តាំងពីប្រឡង រហូតដល់ប្រកាសលទ្ធផល បានប្រកាសពីជោគជ័យរបស់ខ្លួន ដោយលទ្ធផលគឺមានអ្នកប្រឡង ជាប់ជាង៦៦ភាគរយ។ ប៉ុន្តែបេក្ខជនមួយចំនួនដែលបានប្រឡងជាប់ ហាក់មិនអស់ចិត្តនោះ គឺមុខវិជ្ជាគណិតវិទ្យា ដែលពួកគេគិតថាពួកគេធ្វើបានល្អនោះ បែរជាបានលទ្ធផលមិនល្អ ហើយមានអ្នកខ្លះធ្លាក់មុខវិជ្ជានេះទៀតផង។ ក្នុងចំណោមបេក្ខជនដែលធ្លាក់ ក៏មាន យុវជន ឆាយ លីអាន ដែលជាសិស្សពូកែទូទាំងប្រទេសប្រចាំឆ្នាំ២០១៨ផ្នែកគណិតវិទ្យានេះផងដែរ។ ការណ៍នេះ បានក្លាយជាសម្ពាធសម្រាប់ក្រសួងអប់រំ សម្រេចរៀបចំគណៈកម្មការកោសល្យវិច័យ ពិនិត្យ និងដោះស្រាយបញ្ហានេះ៕
© រក្សាសិទ្ធិដោយ thmeythmey.com