ជាតិ
នយោបាយជាតិ
សម្តេច ហ៊ុន សែន នឹងយកសមិទ្ធផលកម្ពុជា ទៅប្រាប់គេនៅ UN រូបភាព៖ សម្តេច ហ៊ុន សែន ឡើងយន្តហោះទៅចូលរួមពិព័ណចិន-អាស៊ានលើកទី១៥ នៅប្រទេសចិន កាលពិថ្ងៃទី១០ ខែកញ្ញា ឆ្នាំ២០១៨
× ភ្នំពេញ៖ សម្តេចនាយករដ្ឋមន្ត្រី ហ៊ុន សែន នឹងទៅចូលរួមកិច្ចប្រជុំលើកទី៧៣ នៃមហាសន្និបាតអង្គការសហប្រជាជាតិ ចាប់ពីថ្ងៃទី២៧ ដល់ថ្ងៃទី ៣០ ខែកញ្ញា ឆ្នាំ២០១៨ នៅទីក្រុងញូវយ៉ក សហរដ្ឋមេរិក ក្រោមប្រធានបទ «ធ្វើឲ្យអង្គការសហប្រជាជាតិ មានសារៈសំខាន់ពាក់ព័ន្ធជាមួយប្រជាជនទាំងអស់ ភាពជាអ្នកដឹកនាំសកល និងការទទួលខុសត្រូវរួមសម្រាប់សង្គមប្រកបដោយសន្តិភាព សមធម៌ និង និរន្តរភាព»។
លោក ប្រាក់ សុខុន រដ្ឋមន្ត្រីក្រសួងការបរទេស លោកស្រី អ៊ឹង កន្ថាផាវី រដ្ឋមន្ត្រីក្រសួងកិច្ចការនារី និងឥស្សរជនមួយចំនួនទៀត នឹងទៅជាមួយប្រមុខរដ្ឋាភិបាល។ សេចក្តីប្រកាសព័ត៌មាននៃក្រសួងការបរទេសកម្ពុជា ដែលចេញផ្សាយនៅថ្ងៃទី២១ ខែកញ្ញា ឆ្នាំ២០១៨នេះ បានបញ្ជាក់យ៉ាងដូច្នេះថា៖«សម្តេចនាយករដ្ឋមន្ត្រី នឹងធ្វើសេចក្តីថ្លែងការណ៍មួយ ផ្តោតលើការវិវត្តនាពេលថ្មីៗ និងសមិទ្ធផលសំខាន់ៗ ដែលរដ្ឋាភិបាលសម្រេចបាន រួមទាំងបញ្ហាតំបន់ និងបញ្ហាអន្តរជាតិ ដែលជាការព្រួយបារម្ភរួម»។
ប្រភពខាងលើ បានឲ្យដឹងទៀតថា ក្រៅពីចូលរួមក្នុងកិច្ចប្រជុំមហាសន្និបាតអង្គការសហប្រជាជាតិ ប្រមុខរដ្ឋាភិបាលកម្ពុជា ក៏មានជំនួបដាច់ដោយឡែកជាមួយលោក អង់តូនីញ៉ូ ហ្គូតេរ៉េស (António Guterres) អគ្គលេខាធិការអង្គការសហប្រជាជាតិ រួមទាំងថ្នាក់ដឹកនាំតាមបណ្តាប្រទេសផ្សេងៗ ដូចជា នាយករដ្ឋមន្ត្រីប៊ុលហ្គារី និងនាយករដ្ឋមន្ត្រីនេប៉ាល់ ជាដើម។
ក្នុងពិធីសំណេះសំណាលជាមួយកម្មករ-កម្មការិនី នៅខេត្តកំពង់ស្ពឺ កាលពីថ្ងៃទី១៩ ខែកញ្ញា ឆ្នាំ២០១៨ នាយករដ្ឋមន្ត្រីកម្ពុជា បានលើកឡើងយ៉ាងដូច្នេះថា៖«ខ្ញុំទៅអង្គការសហប្រជាជាតិ ខ្ញុំចង់និយាយរឿងមួយចំនួនទាក់ទងនឹងបញ្ហាពិភពលោក។ ខ្ញុំទៅប្រាប់អគ្គលេខាធិការអង្គការសហប្រជាជាតិ ថាខ្ញុំបានត្រៀមកម្លាំងទ័ពរួចរាល់ហើយ ដើម្បីពង្រីកទៅប្រទេសមួយចំនួនទៀត ដើម្បីចូលរួមប្រតិបត្តិការរក្សាសន្តិភាពពិភពលោក។ ឥឡូវ យើងមានកងទ័ព នៅស៊ូដង់ខាងត្បូង លីបង់ ម៉ាលី និង អាហ្វ្រិកកណ្តាល......»។
លើសពីនេះ ក្នុងអំឡុងនៃការមានវត្តមានលើទឹកដីអាមេរិក មេដឹកនាំកម្ពុជា នឹងឆ្លៀតជួបសំណេះសំណាលជាមួយសហគមន៍ខ្មែរនៅទីនោះ។ នេះបើតាមសេចក្តីប្រកាសព័ត៌មានពីក្រសួងការបរទេសដដែល។
ចំណែក លោក ប្រាក់ សុខុន នឹងជួបពិភាក្សាជាមួយមន្ត្រីទូតមកពីប្រទេសនានា ដែលរួមមាន អូស្ត្រាលី កាណាដា ហ្ស៊កហ្ស៊ី អេស្តូនី ហុងហ្គ្រី ស៊ែប៊ី អាមេរិក និងអង់គ្លេស។ សេចក្តីប្រកាសព័ត៌មាន បានបញ្ជាក់ថា ប្រមុខទូតកម្ពុជា និងប្រមុខទូតអារមេនី និងចុះហត្ថលេខាជាមួយគ្នា លើអនុស្សរណៈស្តីពីការបង្កើតកិច្ចពិគ្រោះយោបល់៕
© រក្សាសិទ្ធិដោយ thmeythmey.com