ជាតិ
សង្គមជាតិ
មន្ត្រីអាដហុក ដែលពាក់ព័ន្ធរឿងស្រីមុំ ត្រូវកាត់ទោស៥ឆ្នាំ តែមិនជាប់ឃុំទេ
× ភ្នំពេញ៖ អាចនិយាយបានថា សំណុំរឿងរបស់មនុស្ស៥នាក់ ជាប់ពាក់ព័ន្ធនឹងរឿងអាស្រូវស្នេហារវាងអតីតប្រធានគណបក្សប្រឆាំង និងនារីជាជាងកាត់សក់ម្នាក់ ដែលអូសបន្លាយពេលវេលាជិត២ឆ្នាំកន្លះមកនេះ បានឈានដល់ទីបញ្ចប់ហើយ។ នៅរសៀល ថ្ងៃទី២៦ ខែកញ្ញា ឆ្នាំ២0១៨នេះ ចៅក្រមនៃសាលាដំបូងរាជធានីភ្នំពេញ បានប្រកាសសាលក្រម ដោយកំណត់ឲ្យពួកគេម្នាក់ៗ ជាប់ទោស៥ឆ្នាំ តែនៅក្រៅពន្ធនាគារ។
លោក សំ សុគង់ មេធាវីម្នាក់របស់អ្នកទាំង៥ ដោយ៤នាក់ ជាមន្ត្រីអាដហុក និងម្នាក់ទៀត ជាមន្ត្រីគណៈកម្មាធិការជាតិរៀបចំការបោះឆ្នោត (គ.ជ.ប) បានប្រាប់សារព័ត៌មានថ្មីៗថា ចៅក្រមកំណត់ ឲ្យពួកគេ អនុវត្តទោសជាង១ឆ្នាំ ក្នុងពន្ធនាគារ ហើយជាង៣ឆ្នាំទៀត ត្រូវព្យួរ។ លោកបន្តថា ទោសជាង១ឆ្នាំនោះ គឺពួកគេ បានអនុវត្តរួចហើយ។
លោកមេធាវី ពន្យល់បែបនេះថា៖«ចំពោះការអនុវត្តទោស ដែលចៅក្រម កំណត់នោះ គឺពួកគាត់ មិនត្រូវអនុត្តទៀតទេ ព្រោះពួកគាត់ អនុវត្តរួចហើយ ចាប់តាំងពីពេលដែលចាប់ខ្លួន រហូតដល់ដោះលែងវិញ។ អ៊ីចឹង ពួកគាត់ ត្រូវនៅក្រៅឃុំពីពេលនេះទៅ»។
អ្នកទាំង៥នាក់ ដែលរួមមាន លោក នី សុខា លោក ណៃ វង់ដា លោក យី សុខសាន្ត និងលោកស្រី លឹម មុន្នី ជាមន្ត្រីអាដហុក ព្រមទាំងលោក នី ចរិយា ដែលធ្លាប់ជាមន្ត្រីអាដហុក ហើយបច្ចុប្បន្នជាអគ្គលេខាធិការរងគ.ជ.ប ត្រូវបានចាប់ខ្លួនកាលពីអំឡុងខែមេសា ឆ្នាំ២០១៦ ហើយរហូតដល់អំឡុងខែមិថុនា ឆ្នាំ២០១៧ ពួកគេ ក៏ត្រូវបានដោះលែងឲ្យនៅក្រៅឃុំ។
សមត្ថកិច្ច និងតុលាការ សង្ស័យថា ពួកគេទាំង៥ បានឲ្យប្រាក់ដល់នារីជាជាងកាត់សក់ម្នាក់ឈ្មោះស្រីមុំ ដើម្បីបញ្ចុះបញ្ចូលនាង មិនឲ្យនិយាយការពិតពីទំនាក់ទំនងរបស់នាងជាមួយលោក កឹម សុខា អតីតប្រធានគណបក្សប្រឆាំង។ ហេតុដូច្នេះ ទើបមន្ត្រីអាដហុកទាំង៤នាក់ រងបទចោទ «សូកប៉ាន់សាក្សី» និងមន្ត្រីគ.ជ.ប រងបទចោទ «សមគំនិតក្នុងអំពើសូកប៉ាន់សាក្សី»៕
Tag:
រឿងស្រីមុំ
អាដហុក
គជប
តុលាការ
មេធាវី
© រក្សាសិទ្ធិដោយ thmeythmey.com