សេដ្ឋកិច្ច
×![]()
ភ្នំពេញ៖ ស្ថានទូតអាមេរិក បានរៀបចំកម្មវិធីពាណិជ្ជកម្មលើផ្នែកកសិកម្ម ជាលើកដំបូងរបស់ខ្លួននៅកម្ពុជា។ កម្មវិធីនេះ ជាឱកាសឲ្យប្រតិភូរបស់ក្រុមហ៊ុនល្បីៗមួយចំនួនរបស់អាមេរិក ស្វែងយល់ពីសក្ដានុពលវិស័យកសិកម្មរបស់កម្ពុជានាពេលបច្ចុប្បន្ននេះ។ ក្រុមហ៊ុនអាមេរិកចាប់ផ្ដើមសម្លឹងឱកាសវិនិយោគក្នុងវិស័យកសិកម្មរបស់កម្ពុជា ។ 
«ក្នុងរយៈពេល១០ឆ្នាំចុងក្រោយ ក្រុមហ៊ុនផ្នែកកសិកម្មរបស់កម្ពុជា មានការរីកចម្រើន ឥឡូវនេះជាពេលល្អ ដែលក្រុមហ៊ុនប្រទេសទាំងពីរចាប់ដៃគ្នា»។នេះជាប្រសាសន៍របស់លោក William Heidt ឯកអគ្គរដ្ឋទូតសហរដ្ឋអាមេរិកប្រចាំកម្ពុជា ។
លោកឯកអគ្គរដ្ឋទូត បន្ថែមទៀតថា ក្រុមហ៊ុនអាមេរិកអាចជួយវិស័យកសិកម្មកម្ពុជា ដែលមានកំណើនយឺត និងកំពុងប្រឈមបញ្ហាលក្ខខណ្ឌគុណភាព និងសុវត្ថិភាពក្នុងប៉ុន្មានឆ្នាំចុងក្រោយនេះ ឲ្យនាំចេញផលិតផលទៅទីផ្សារអន្តរជាតិ។ លោក William Heidt បានលើកឡើងក្នុងកម្មវិធីពាណិជ្ជកម្មលើផ្នែកកសិកម្មដូច្នេះថា៖«កសិកម្មរបស់កម្ពុជាប្រឈមរបាំងស្មុគស្មាញ ដូចជាស្ដង់ដារអនាម័យ និងភូតគាមអនាម័យ ដែលជាឧបសគ្គក្នុងការធ្វើពិពិធកម្មនាំចេញ។ ក្រុមហ៊ុនអាមេរិក អាចជួយកម្ពុជាដោះស្រាយបញ្ហាទាំងនោះបាន និងឡើងទៅកម្រិតខ្ពស់ជាងនេះ»។
លោក William Heidt បន្ថែមថា ក្រុមហ៊ុនអាមេរិកទាំងនោះ បានប្រតិបត្តិការជោគជ័យនៅអាស៊ីអាគ្នេយ៍ និងដឹងពីទីផ្សារតំបន់យ៉ាងច្បាស់។ លោកបន្តថា៖«ក្រុមហ៊ុនទាំងនោះនឹងផ្ដល់បច្ចេកវិទ្យា ឧបករណ៍ សេវាកម្ម ដែលអាចជួយកម្ពុជា បង្កើនផលិតកម្ម ទិន្នផល និងលើកកម្ពស់សមត្ថភាពផលិតវេចខ្ចប់»។
តែលោក William Heidt មិនអាចបញ្ជាក់បានថានឹងការចុះអនុស្សារណៈរវាងក្រុមហ៊ុនប្រទេសទាំងពីរ បន្ទាប់ពីកម្មវិធីដែលមានរយៈពេលពីរថ្ងៃនេះបញ្ចប់ ឬយ៉ាងណានោះទេ?
គួរបញ្ជាក់ថា ពាណិជ្ជកម្មទ្វេភាគីកម្ពុជា និងអាមេរិកសម្រេចបាន ៣,៥ពាន់លានដុល្លារនៅឆ្នាំ២០១៧។ ក្នុងនោះអាមេរិកនាំចូលកម្ពុជាទំហំ ៤០០លានដុល្លារ កើនឡើង ១១ភាគរយ។ ហើយការនាំចូលរបស់កម្ពុជាទៅអាមេរិកមានចំនួន ៣,១ពាន់លានដុល្លារ។ ក្នុងឆ្នាំ២០១៧នោះដែរ ការវិនិយោគផ្ទាល់ពីអាមេរិកនៅកម្ពជាមានទឹកប្រាក់ ១៥១លានដុល្លារ កើនឡើងជិត ១២ភាគរយ៕
Tag:
កសិកម្ម
ទូតអាមេរិក
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
1 សប្តាហ៍
