លោក សួន សេរីរដ្ឋា ស្នើឲ្យមហាផ្ទៃផ្អាកដំណើរការគណបក្សអំណាចខ្មែរបណ្ដោះអាសន្ន

ជាតិ

នយោបាយជាតិ

លោក សួន សេរីរដ្ឋា ស្នើឲ្យមហាផ្ទៃផ្អាកដំណើរការគណបក្សអំណាចខ្មែរបណ្ដោះអាសន្ន

28, Sep 2018 , 1:19 pm

រូបភាព

ដោយ: ថ្មីៗ

ភ្នំពេញ៖ ជម្លោះដណ្ដើមបក្ស! លោក សួន សេរីរដ្ឋា ស្នើឲ្យក្រសួងមហាផ្ទៃផ្អាកដំណើរការគណបក្សអំណាចខ្មែរបណ្ដោះអាសន្ន ដើម្បីដោះស្រាយភាពស្របច្បាប់រវាងលោក និងលោក សួង សោភណ្ឌ ក្នុងការដឹកនាំគណបក្សមួយនេះ។ ក្រសួងមហាផ្ទៃ ហៅលោក សួន សេរីរដ្ឋា និងលោក សួង សោភណ្ឌ ទៅដោះស្រាយបញ្ហាគណបក្សអំណាចខ្មែរនេះ។

ក្រសួងមហាផ្ទៃ បានហៅលោក សួន សេរីរដ្ឋា ទៅបកស្រាយហេតុផលខ្លួន ដែលបានអះអាងថា លោក សួង សោភណ្ឌ បានបន្លំឯកសារ ក្នុងគោលបំណងក្តោបតំណែងប្រធាន និងអំណាចបក្ស។ ក្រោយពេលបកស្រាយហេតុផលរួច លោក សួន សេរីរដ្ឋា បានលើកសំណើ៣ចំណុច ទៅក្រសួងមហាផ្ទៃ ដើម្បីជួយដោះស្រាយបញ្ហាជម្លោះគណបក្សអំណាចខ្មែរ។ ចំណុចទី១ លោក សួន សេរីរដ្ឋា បានស្នើឲ្យក្រសួងធ្វើកោសល្យវិច្ច័យទៅលើហត្ថលេខា នៅក្នុងលិខិតលាលែងពីបក្សខ្លួន ។ ចំណុចទី២ លោកស្នើឲ្យក្រសួងច្រានចោលលក្ខន្តិកថ្មី ដែលក្រុមលោក សួង សោភណ្ឌ បានធ្វើសោធនកម្មលើច្បាប់ចាស់ ដែលគណបក្សបានតម្កល់នៅក្រសួងមហាផ្ទៃ និងចុងក្រោយ គឺសុំឲ្យផ្អាកដំណើរការគណបក្សអំណាចខ្មែរបណ្ដោះអាសន្ន។

លោក សួន សេរីរដ្ឋា ដែលបានទៅជួបជាមួយមន្ត្រីជាន់ខ្ពស់ក្រសួងមហាផ្ទៃ ដើម្បីដោះស្រាយបញ្ហាគណបក្សនេះ បានប្រាប់សារព័ត៌មានថ្មីៗ ដូច្នេះថា៖«ជាលទ្ធផលអ្វីដែលយើងបានស្នើសុំទៅគេ ក្រសួងមហាផ្ទៃទទួលយក ដើម្បីយកមកផ្ទៀងផ្ទាត់។ គេសួររកលិខិតលាលែងរបស់ខ្ញុំ ហើយខ្ញុំមិនដែលបានចុះហត្ថលេខាលើលិខិតលាលែងហ្នឹង ខ្ញុំក៏ស្នើសុំឲ្យធ្វើកោសល្យវិច្ច័យ ពីព្រោះគាត់(សួង សោភណ្ឌ) គាត់បានផ្សព្វផ្សាយតាមបណ្ដាញសង្គម។ ទី២ យើងបានស្នើសុំឲ្យក្រសួងពិនិត្យផ្ទៀងផ្ទាត់លើលក្ខន្តិកដើម គឺអត់យកលក្ខន្តិកដែលក្រុមលោក សួង សោភណ្ឌ ធ្វើវិសោធនកម្ម ។ ទី៣ គឺយើងបានស្នើសុំឲ្យមានការផ្អាកសកម្មភាព(គណបក្សអំណាចខ្មែរ)ជាបណ្ដោះអាសន្ន។ ប៉ុន្តែគេមិនទាន់ឆ្លើយថាយ៉ាងម៉េចទេ »។

ក្រៅពីសាកសួរលោក សួន សេរីរដ្ឋា ក្រសួងមហាផ្ទៃ ក៏ហៅប្រធានគណបក្សអំណាចខ្មែរបច្ចុប្បន្នលោក សួង សោភណ្ឌ និងគណៈកម្មាធិការនាយកបក្ស ចូលទៅពន្យល់ហេតុផល ជុំវិញបញ្ហាគណបក្ស នៅព្រឹកថ្ងៃទី២៨ កញ្ញានេះដែរ ដើម្បីពិនិត្យ និងសម្រេចលើភាពស្របច្បាប់ថាតើ បុគ្គលរូបណា ដែលមានសិទ្ធិដឹកនាំគណបក្សអំណាចខ្មែរ។

អត្ថបទទាក់ទង

មេបក្សអសមត្ថភាព និង មេបក្សហាងកាហ្វេ! ជាពាក្យចោទគ្នារវាងលោក សួន សេរីរដ្ឋា និងលោក សួង សោភ័ណ្ឌ

លោក សួន សេរីរដ្ឋា ត្រូវបានសមត្ថកិច្ចចាប់ខ្លួន

ជុំវិញបញ្ហា លោក សួង សោភណ្ឌ ធ្លាប់ប្រាប់សារព័ត៌មានថ្មីៗថា លោកមានឯកសារ និងភស្តុតាងគ្រប់គ្រាន់ ដែលបង្ហាញថា លោក សួន សេរីរដ្ឋា បានលាលែងពីគណបក្ស។ ហើយលោក នឹងយកឯកសារទាំងនោះ ទៅបង្ហាញចំពោះមុខក្រសួងមហាផ្ទៃ ដើម្បីបញ្ជាក់ពីភាពត្រឹមត្រូវរបស់ខ្លួន។ មិនតែប៉ុណ្ណោះ លោក សួង សោភណ្ឌ ហ៊ានទាំងអះអាងថា លោកនឹងសុខចិត្តដើរចេញពីតំណែង បើសិនជាលោក សួន សេរីរដ្ឋា មានភស្តុតាងថា ខ្លួនបានបន្លំឯកសារមែននោះ។

គួរបញ្ជាក់ថា គណបក្សអំណាចខ្មែរ បានបង្កើតឡើងកាលពីឆ្នាំ២០១៥ ដោយមានលោក សួន សេរីរដ្ឋា ជាប្រធានបក្ស។ ហើយគណបក្សអំណាចខ្មែរ បានធ្លាក់ក្រោមការដឹកនាំរបស់លោក សួង សោភ័ណ្ឌ នៅឆ្នាំ២០១៧ នៅគ្រាដែលលោក សួន សេរីរដ្ឋា ត្រូវបានសមត្ថកិច្ចចាប់ខ្លួន ពីបទល្មើសព្រហ្មទណ្ឌជាក់ស្តែង ដោយសារលោក សួន សេរីរដ្ឋា សរសេរនៅលើគណនីហ្វេសប៊ុករបស់លោក «ញុះញង់ដល់កម្លាំងកងទ័ព មិនឲ្យស្តាប់បទបញ្ជា ដែលធ្វើឲ្យប៉ះពាល់ដល់កិច្ចការការពារជាតិ»។ តាមរយៈបទចោទនេះ តុលាការបានសម្រេចផ្តន្ទាទោសលោក សួន សេរីរដ្ឋា ឲ្យជាប់ពន្ធនាគារ៥ឆ្នាំ និងពិន័យប្រាក់១០លានរៀល កាលពីថ្ងៃទី២៥ សីហា ឆ្នាំ២០១៧។ អតីតប្រធានគណបក្សអំណាចខ្មែររូបនេះ ត្រូវបានព្រះមហាក្សត្រលើកលែងទោស កាលពីថ្ងៃទី១៧ សីហា ឆ្នាំ២០១៧៕