ជាតិ
នយោបាយជាតិ
សម្ដេច ហ៊ុន សែន ៖ បញ្ហាសិទ្ធិមនុស្ស កំពុងក្លាយជាបេសកកម្មអរិយធម៌របស់មហាអំណាច ក្នុងការជ្រៀតជ្រែករដ្ឋឯករាជ្យ
× ភ្នំពេញ៖ បញ្ហាសិទ្ធិមនុស្ស កំពុងក្លាយទៅជា«បេសកកម្មដើម្បីបំពាក់អរិយធម៌» សម្រាប់ប្រទេសមហាអំណាច ក្នុងការជ្រៀតជ្រែកប្រទេសដទៃ ក្រោមស្លាកការពារសិទ្ធិនយោបាយ។ នេះជាការថ្លែងរបស់សម្ដេច ហ៊ុន សែន នៅចំពោះមុខមេដឹកនាំបណ្ដាប្រទេសជុំវិញពិភពលោក ក្នុងមហាសន្និបាតអង្គការសហប្រជាជាតិ នៅទីក្រុងញូវយ៉ក សហរដ្ឋអាមេរិក កាលពីថ្ងៃទី២៨ កញ្ញា។
សម្ដេច ហ៊ុន សែន បានលើកយកភាពជោគជ័យរបស់កម្ពុជា ក្នុងការរើបម្រាសចេញពីភ្លើងសង្គ្រាម ហើយផ្លាស់ប្តូរមុខមាត់ថ្មី ក្លាយទៅជាប្រទេសដែលមានកំណើនសេដ្ឋកិច្ចលឿនបំផុយមួយ នៅក្នុងពិភពលោក ទៅថ្លែងចំពោះមុខថ្នាក់ដឹកនាំបណ្ដាប្រទេសនានាមុនគេ ។ បន្ទាប់ពីលើកពីភាពជោគជ័យរបស់រដ្ឋាភិបាលហើយ សម្ដេច ហ៊ុន សែន ក៏បន្តរាយការណ៍ពីស្ថានភាពបោះឆ្នោតនៅកម្ពុជាកាលពីពេលថ្មីៗនេះ ដោយមានពីរចំណុចផ្សេងគ្នា។
ត្រង់ចំណុចនេះសម្ដេច ហ៊ុន សែន បាននិយាយពីចំណុចវិជ្ជមាន នៃចំនួនអ្នកបោះឆ្នោត៨៣, ០២ ភាគរយ ដែលសម្ដេច ចាត់ទុកថា ជាការបង្ហាញពីដំណើរការលទ្ធិប្រជាធិបតេយ្យ ស្ថិរភាពនិងការអភិវឌ្ឍនៅកម្ពុជា។ និយាយចំណុចនេះហើយ ប្រមុខរដ្ឋាភិបាល ក៏ផ្ដើមថ្លែងបែបការទូត ទៅកាន់ប្រទេសមួយចំនួន ដែលធ្លាប់រិះគន់ និងប្រឆាំងការបោះឆ្នោតកម្ពុជា យ៉ាងដូច្នេះថា៖«មជ្ឈដ្ឋានខាងក្រៅមួយចំនួន ដែលចិញ្ចឹមជាប់នូវមហិច្ឆតាប៉ុនប៉ងជ្រៀតជ្រែកចូលកិច្ចការផ្ទៃក្នុងរបស់កម្ពុជា នៅតែធ្វើជាមើលមិនឃើញនូវគុណភាព និងសុចរិតភាពនៃដំណើរការបោះឆ្នោតរបស់យើង តាមរយៈការចេញសេចក្តីថ្លែងការណ៍នានាប្រឆាំងនឹង ឬវាយប្រហារលើលទ្ធផលនៃការបោះឆ្នោតនេះ ដែលទង្វើបែបនេះ គឺជាការប្រមាថយ៉ាងធ្ងន់ធ្ងរចំពោះឆន្ទៈរបស់ប្រជាជនកម្ពុជា»។
ដោយមិនទាន់អស់សេចក្តីនោះ សម្ដេច ហ៊ុន សែន បាននិយាយដោយប្រយោលពីសកម្មភាពប្រទេសមហាអំណាចមួយចំនួន ដែលបានប្រើប្រាស់បញ្ហាសិទ្ធិមនុស្ស ដើម្បីជ្រៀតជ្រែកកិច្ចការផ្ទៃក្នុងប្រទេសដទៃ។ សម្ដេច កត់សម្គាល់ឃើញថា បញ្ហាសិទ្ធិមនុស្សកំពុងក្លាយជាលេសមួយ សម្រាប់ពួកគេលូកដៃចូលអធិបតេយ្យរបស់រដ្ឋឯករាជ្យ។
«ខ្ញុំសូមទាញអារម្មណ៍សមាជិកអង្គការសហប្រជាជាតិទាំងអស់ អំពីសារៈសំខាន់នៃធម្មនុញ្ញអង្គការសហប្រជាជាតិ។ វាអាស្រ័យលើយើងគ្រប់គ្នា នៅក្នុងការផ្ដល់ការគោរពដ៏ត្រឹមត្រូវចំពោះធម្មនុញ្ញដ៏មានសារៈសំខាន់នេះ ដោយត្រូវចៀសវាងការជ្រៀតជ្រែក ការធ្វើឲ្យអន្តរាយ ឬការរំខានដល់កិច្ចការអធិបតេយ្យរបស់រដ្ឋឯករាជ្យ។ យើងមានការសោកស្ដាយជាពន់ពេក ក្នុងការរំលេចនូវតថភាពដែលថាសិទ្ធិមនុស្សនាពេលបច្ចុប្បន្ននេះ បានក្លាយទៅជា«បេសកកម្មដើម្បីបំពាក់អរិយធម៌» សម្រាប់ប្រទេសមានអំណាចមួយចំនួន ឬក៏អាចនិយាយបានថា ជានិយាមប្រតិបត្តិថ្មីរបស់ពួកគេ ដែលជាលេសសម្រាប់រាល់ការលូកដៃជ្រៀតជ្រែក ក្រោមផ្លាកការពារសិទ្ធិនយោបាយ»។ នេះជាការលើកឡើងរបស់សម្ដេច ហ៊ុន សែន។
លោកនាយករដ្ឋមន្ត្រីកម្ពុជា បាននិយាយបន្ថែមថា សម័យកាលចក្រពត្តិនិយម និងអាណានិគមនិយមសម្រាប់ពិភពលោក វាបានក្លាយទៅជាព្រឹត្តិការណ៍ប្រវត្តិសាស្ត្រទៅហើយ។ ដូច្នេះប្រទេសធំៗ មិនគួរដាក់បន្តុបប្រព័ន្ធគ្រប់គ្រងរដ្ឋបាលរបស់ពួកគេមកលើប្រទេសនានា ដែលតូចជាងខ្លួននោះឡើយ ព្រោះប្រទេសតូចៗទាំងនេះ ក៏មានអធិបតេយ្យភាព និងមានសេចក្តីប្រាថ្នាស្របច្បាប់ក្នុងការរក្សានូវអត្តសញ្ញាណរបស់ខ្លួន។
សម្រាប់សម្ដេច ហ៊ុន សែន សម័យកាលបច្ចុប្បន្ននេះ ជាសម័យកាលដែលប្រទេសទាំងអស់នៅលើពិភពលោកពឹងផ្អែកគ្នាទៅវិញទៅមក ហើយផ្នត់គំនិតចាប់បង្ខំដ៏ចាស់គំរិលនោះ គួរតែត្រូវបានបានបញ្ចប់។ «ទាំងអស់គ្នា ទាំងប្រទេសធំ ប្រទេសតូច ត្រូវតែរួមគ្នាគោរព និងលើកតម្កើងវិធាននៃច្បាប់អន្តរចាតិ និងធម្មនុញ្ញអង្គការសហប្រជាជាតិ »។ នេះការថ្លែងរបស់ប្រមុខរដ្ឋាភិបាល៕
Tag:
ហ៊ុន សែន
UN
សិទ្ធិមនុស្ស
© រក្សាសិទ្ធិដោយ thmeythmey.com