ភាសាបាលីធ្លាក់ចុះអ្នករៀន ព្រោះគ្មានទីផ្សារការងារ

បទយកការណ៍ / បទសម្ភាសន៍

ភាសាបាលីធ្លាក់ចុះអ្នករៀន ព្រោះគ្មានទីផ្សារការងារ

30, Sep 2018 , 8:59 pm

រូបភាព

ដោយ: ប៉ូ សាគុន

ភ្នំពេញ៖ ការរៀនភាសាបាលីនៅក្នុងពេលបច្ចុប្បន្ននេះ ហាក់មានការធ្លាក់ចុះជាគំហុក មិនថាព្រះសង្ឃឬគ្រហស្ថ។ បាលី គឺជាភាសាមួយដែលបានកត់ត្រា គម្ពីព្រះត្រៃបិដក និងពុទ្ធឱវាទជាច្រើនរបស់ព្រះពុទ្ធសាសនា។ ដោយសារតែសង្គមចេះតែវិវឌ្ឍន៍ទៅមុខ ហើយទីផ្សារការងារមិនសូវអំណោយផងនោះ ភាសាបាលីមិនត្រូវបានគ្រហស្ថធម្មតាចាប់អារម្មណ៍រៀនច្រើនឡើយ។

ដើម្បីបានជ្រាបច្បាស់ សូមស្ដាប់បទយកការណ៍ដែលរៀបរៀងដោយកញ្ញា ប៉ូ សាគុន ដូចតទៅ៖

នៅក្នុងបន្ទប់រៀនភាសាបាលីនិងសំស្ត្រឹតមួយដែលមានទំហំប្រមាណជា១០ម៉ែត្រការ៉េ នៃសាលាពុទ្ធិកសាកលវិទ្យាល័យព្រះសីហនុរាជ ដែលមានទីតាំងនៅជិតព្រះបរមរាជវាំង មានសិស្សជាព្រះសង្ឃចំនួនតែ៣អង្គតែប៉ុណ្ណោះ កំពុងរៀនភាសាបាលីពីគ្រូជាគ្រហស្ថវ័យ៨៥ឆ្នាំ។ មិនមែនមានតែបន្ទប់មួយនេះទេ ដែលខ្សត់សិស្ស បន្ទប់ទល់មុខបន្ទប់នេះ ក៏មានសិស្សតែ២នាក់មករៀនដែរ។

មិនបានបំពេញតម្រូវការទីផ្សារការងារទូលំទូលាយផង និងជាភាសាគ្រឹះសម្រាប់តែខាងសាសនាផងនោះ មនុស្សភាគច្រើន មិនបានចាប់អារម្មណ៍មករៀនភាសានេះឡើយ។ ទោះជាយ៉ាងណាកក៏ដោយ ភាសាបាលី នៅតែដើរតួនាទីសំខាន់ក្នុងជីវិតមនុស្សនិងសង្គម។

គរុពហូស្សូតបណ្ឌិត ជិត ជន គឺជាគ្រូបង្រៀនភាសាបាលីនិងសំស្ត្រឹតជិត៥០ឆ្នាំ បានលើកឡើងថា មកដល់ពេលបច្ចុប្បន្ននេះ សិស្សរៀនភាសាបាលីនឹងសំស្ត្រឹត មានការធ្លាក់ចុះច្រើន បើប្រៀបជាមួយសម័យដើម ដែលលោកថា សិស្សច្រើនរហូតរកសាលារៀនគ្មាន។ ជាភាសាមួយកត់ត្រារាល់គម្ពីព្រះពុទ្ធសាសនា ដែលជាសាសនារបស់រដ្ឋ ភាសាបាលី និងសំស្ត្រឹត សព្វថ្ងៃសូម្បីតែព្រះសង្ឃក៏មិនសូវឃើញរៀនច្រើនដែរ។ ទោះភាសានេះ មិនត្រូវបានមនុស្សសម័យបច្ចុប្បន្នឱ្យតម្លៃច្រើនក៏ដោយចុះ តែលោក ជិត ជន នៅតែមើលឃើញថាវាជាភាសាដែលអាចនាំមនុស្សដឹងពីឬសគល់នៃភាសាខ្មែរផង ភាសាសកលផង នឹងដឹងពីមូលដ្ឋានគ្រឹះរបស់ពាក្យផងដែរ។ បណ្ឌិត ជិត ជន បញ្ជាក់៖ «អក្សរសាស្ត្រខ្មែរទាំងអស់ បើយើងមិនចេះបាលី យើងមិនដឹងថាសរសេរហ្នឹងត្រូវឬសខុសទេ ដូច្នេះចេះបាលីនេះវិសេសវិសាលណាស់។ កាលពីជំនាន់ខ្ញុំរៀន ប្រឡង៨ពាន់នាក់យកតែ១០០នាក់ ដូច្នេះនាក់ដែលជាប់នោះដល់តែពូកែណាស់»។

ព្រះភិក្ខុ រឿន សំបូ មកពីខេត្តព្រៃវែង ដែលរៀនភាសាបាលីនៅសាលាពុទ្ធិកសាកលវិទ្យាល័យព្រះសីហនុរាជ មានថេរដីកាថា ការរៀនភាសាបាលីមិនមែនដើម្បីប្រយោជន៍ផ្លូវលោកឡើយ តែជាប្រយោជន៍សម្រាប់បរលោកនាយ។ ត្រូវចំណាយពេល១៤ឆ្នាំរៀន និងត្រូវទន្ទិញឱ្យចាំស្ទាត់វេយ្យាករណ៍បាលីផងនោះ ព្រះភិក្ខុ សំបូរ នៅតែមិនទាន់ចេះស្ទាត់ភាសានេះនៅឡើយ ព្រោះវាមានចំណុចលំបាកច្រើន។

ត្រូវនិមន្តតាមម៉ូតូកង់បីប្រចាំវត្ត មកសាលាតាំងពីព្រឹកព្រលឹមជារៀងរាល់ថ្ងៃ ព្រះភិក្ខុ សំបូរ ត្រូវខ្ចប់ចង្ហាន់ពីវត្តមកជាមួយ ទុកឆាន់ពេលថ្ងៃត្រង់ ដើម្បីកាត់បន្ថយការចំណាយ។ ហេតុផលដែលព្រះភិក្ខុ សំបូ រៀនភាសាពុទ្ធវចនៈនេះ ក៏ដើម្បីទ្រទ្រង់ព្រះពុទ្ធសាសនាផង នឹងដើម្បីសន្យំឧបនិស្ស័យបណ្ដុះពូជបញ្ញាដល់ខ្លួនព្រះអង្គផង។ «ត្រូវចំណាយពេលមកពីព្រឹក ព្រោះជិះកង់បីដាក់ខែ បើយើងមកថ្ងៃទៅវិញទៅមក២ម៉ឺន។ ចំពោះអាត្មាវិញចង់រៀន ព្រោះភាសាបាលី សិក្សាពីកម្រិតវប្បធម៌ទូន្មាន សូម្បីតែពិភពលោកក៏គេឱ្យតម្លៃទស្សនៈរបស់ព្រះពុទ្ធជាទស្សនៈឯកដែរ។ នេះជាការបញ្ជាក់បន្ថែមរបស់ព្រះភិក្ខុ រឿន សំបូ។

ចំណែក ព្រះភិក្ខុ ខៀវ ខន និមន្តមកពីខេត្តតាកែវវិញ មានថេរដីកាថា ក្នុងនាមជាព្រះសង្ឃការសិក្សាភាសាបាលី ជាការចាំបាច់មួយ ទោះគម្ពីរបស់ព្រះពុទ្ធសាសនា បានប្រែជាខេមរៈភាសាក្ដី តែឬសគល់របស់ពាក្យ និងការសិក្សាពីហេតុនិងផលរបស់ច្បាប់ធម្មជាតិ មានច្រើនទៀតដែលមិនទាន់ប្រែ។ ចំណាយពេលរៀន អស់១៣ឆ្នាំទៅហើយក្ដី តែព្រះអង្គនៅតែមិនទាន់ជ្រៅជ្រះក្នុងភាសានេះនៅឡើយ ដោយសារភាសាបាលី ជាភាសាពិបាករៀននិងចាំ។ ព្រះភិក្ខុអង្គនេះ បានចាត់ទុកភាសាបាលីសំស្ត្រឹតជាផែនទី និងជាថ្នាំពេទ្យដ៏សំខាន់មួយ ដើម្បីរៀបចំដំណើរជីវិត ប្រកបដោយគុណភាព។ ព្រះភិក្ខុ ខៀវ ខន បញ្ជាក់យ៉ាងដូច្នេះថា៖«បុគ្គលដែលបានសិក្សាភាសាបាលីបានជ្រៅជ្រះ បានន័យថាជាបុគ្គលក្លាក្នុងព្រះពុទ្ធសាសនា។ លោកប្រៀបប្រដូចការសិក្សាភាសាបាលីទៅនឹងផែនទីមួយ ដើម្បីបង្ហាញផ្លូវ។ គោលដៅរៀនភាសាបាលី បានន័យថាយើងបាលយល់ច្បាស់ក្នុងពុទ្ធវចនៈ ក៏ជាប្រយោជន៍ក្នុងសង្គមជាតិផងដែរ»។

ដូចគ្នានឹងព្រះសង្ឃខាងលើដែរ ព្រះភិក្ខុ ឡាន ឡា កំពុងស្ថិតក្នុងថ្នាក់រៀនភាសាបាលី។ និមន្តមកពីខេត្តព្រៃវែងព្រះអង្គ ឡាន ឡា ទើបតែរៀនភាសាបាលីបានរយៈពេលប្រាំឆ្នាំតែប៉ុណ្ណោះ។ រៀនមិនបានតាមលំដាប់ដូចជាព្រះសង្ឃអង្គដទៃទៀត ព្រោះការខ្វះសាលា និងគ្រូផង ព្រះភិក្ខុ ឡាន ឡា ត្រូវរៀនផ្លោះរហូត ដែលជាហេតុឱ្យព្រះអង្គមានការលំបាករៀនកាន់តែខ្លាំង។ ព្រះភិក្ខុដែលមានរាងកាយស្គមស្គាំងខ្លាំងរូបនេះ បានបញ្ជាក់ថា ប្រសិនបើទៅមុខកាន់តែខ្សត់អ្នករៀនភាសាបាលី នោះអាចនឹងប៉ះពាល់ដល់សាសនាព្រះពុទ្ធ ព្រោះគម្ពីនិងព្រះត្រៃបិដក សុទ្ធសឹងតែជាភាសាបាលីនិងសំស្ត្រឹត។ ព្រះអង្គ ឡាន ឡា បន្ថែម៖«ក្នុងគម្ពីព្រះត្រៃបិដកទាំង១១៧ ពោរពេញដោយភាសាបាលី ក្រោយមកអ្នកប្រាជ្ញខ្មែរបានប្រែមកជាភាសាខ្មែរ។ បើសិនជាបាត់បង់អ្នកចេះភាសាបាលី ប្រហែលជាប៉ះពាល់ដល់ព្រះពុទ្ធសាសនា»។

ត្រឡប់មកគរុពហូស្សូតបណ្ឌិត ជិត ជន វិញ លោកថាអ្នករៀនភាសាបាលី និងសំស្ត្រឹត ជាអ្នកដែលមានឧបនិស្ស័យខ្ពស់ក្នុងព្រះពុទ្ធសាសនា និងជាអ្នកខំសន្សំបុណ្យសម្រាប់បរលោកនាយផង។ ទោះភាសាបាលីនិងសំស្ត្រឹតជាភាសាគ្រឹះរបស់សាសនាក្ដី ប៉ុន្តែទីផ្សារការងារនៅតែមាន ដោយធ្វើនៅក្រសួងមួយចំនួន និងបកប្រែសម្រាប់ស្ថាប័នផ្សេងៗ។ គរុពហុស្សូត ជិត ជន សង្កត់ធ្ងន់ថា អ្នករៀនភាសាបាលី និងសំស្ក្រឹតច្បាស់ នោះគេនឹងរៀនភាសាបរទេសផ្សេងៗឆាប់យល់ឆាប់ចេះ ព្រោះភាសាទាំងពីនេះជាភាសាដើមនៃភាសាផ្សេងៗ។« អ្នកចេះបាលីច្បាស់ទៅរៀនសំស្ត្រឹតក៏ស្រួល ទៅរៀនបារាំង អង់គ្លេសក៏ស្រួល។ ភាសាបាលីនេះពិបាកណាស់ សិស្សឥឡូវនេះរៀនបាលី១០ឆ្នាំហើយមិនទាន់ចេះផង។ មិនចេះហ្នឹងមកពីមិនយល់ផង មិនចាំផង»។ គរុពហូស្សូតបណ្ឌិត ជិត ជន បញ្ជាក់បន្ថែម៕

‬