ពីនេះ ពីនោះ
អាជីពដែលលោកអ្នកគួរដឹងជាមុនថាមិនអាចក្លាយជាអ្នកមាន…តែជួយសង្គមបានច្រើន!
×![]()
ដោយ: ថ្មីៗ
ភ្នំពេញ៖ កើតមកនៅលើផែនដីនេះ គ្មាននរណាម្នាក់មិនចង់ក្លាយជាមាន ឬអ្នកមានកិត្តិយសនៅក្នុងសង្គមឡើយ។ តែពេលខ្លះ គេក៏អាចដឹងជាមុនថា អាជីពមួយចំនួនមិនអាចអនុញ្ញាតឲ្យលោកអ្នកក្លាយជាអ្នកមានខ្លាំងឡើយ។ តែអាជីពទាំងនោះជួយសង្គមបានច្រើន។ តើអាជីពទាំងនោះមានអ្វីខ្លះ? 
អាជីពគ្រូបង្រៀន គឺជាអាជីពម្យ៉ាងដែលជួយសង្គមបានច្រើនណាស់ ព្រោះ វា គឺជាអាជីពដែលបង្កើតអាជីពដទៃទៀត។ វា គឺជា«ឪពុកម្តាយ»នៃអាជីពដទៃទៀត។ ស្ទើរតែនៅលើពិភពលោកទាំងមូលទៅហើយ ប្រសិនបើលោកអ្នកចាប់យកអាជីពនេះ លោកអ្នកមិនអាចក្លាយជាអ្នក«មានខ្លាំង»បានឡើយ។ ប៉ុន្តែ លោកអ្នកប្រាកដច្បាស់ខ្លួនឯងថា លោកអ្នកបានជួយមនុស្សជាច្រើនឲ្យមានចំណេះដឹងទូទៅ និងចំណេះជំនាញដើម្បីចិញ្ចឹមជីវិតរបស់ពួកគេនាពេលអនាគត។
ត្រឹមតែធ្វើជាគ្រូ ឬជាស្ត្រាចារ្យ ពិតជាមិនអាចក្លាយជាអ្នកមានធំបានឡើយ។ តែក៏មិនមែនជាអ្នកក្រដែរ។ ប៉ុន្តែ ប្រសិនបើលោកអ្នកសាកល្បងធ្វើជំនួញពីអាជីពគ្រូបង្រៀន ដូចជា បង្កើតសាលាបណ្តុះបណ្តាល នោះលោកអ្នកអាចក្លាយជាអ្នកមានធំ ប្រសិនបើជំនួញនោះជោគជ័យ។ តែលោកអ្នកអាចធ្លាក់ខ្លួនក្រមកវិញ ប្រសិនបើអាជីពនោះ បរាជ័យ។ បើធ្វើត្រឹមជាគ្រូបង្រៀនធម្មតា អ្វីដែលប្រាកដ គឺថា មិនក្រ ហើយក៏មិនមានធំដែរ។
អាជីពវេជ្ជបណ្ឌិត (គ្រូពេទ្យ) គឺជាអាជីពដែលត្រូវតែជួយសង្គ្រោះជីវិតមនុស្ស។ ការជួយសង្គ្រោះជីវិត គឺជាអ្វីដែលគ្រូវពេទ្យទាំងឡាយត្រូវធ្វើមុនគេ។ លុយកាក់ គឺជារឿងក្រោយ។ គ្រូពេទ្យ ជួយសង្គ្រោះមនុស្សដោយមិនប្រកាន់ភេទ អាយុ វណ្ណៈ ជាតិសាសន៍…។ ដូចអាជីពគ្រូបង្រៀនខាងលើដែរ ប្រសិនបើលោកធ្វើជំនួញពីអាជីពនេះ លោកអ្នកអាចក្រ ឬក៏អាចក្លាយជាអ្នកមាន អាស្រ័យលើភាពជោគជ័យ ឬបរាជ័យ។
អាជីពអ្នកសារព័ត៌មាន, បុគ្គលិកអង្គសង្គមស៊ីវិល, មេធាវី, អាជីពអ្នកស្រាវជ្រាវ ឬអាជីព អ្នកនយោបាយ ក៏សឹងតែដូចគ្នាទៅនឹងខាងលើដែរ ព្រោះ ក្រមសីលធម៌នៃអាជីពខាងលើ បានតម្រូវឲ្យពួកគេជួយសង្គមជាមុនសិន។
សរុបសេចក្តីមក ប្រសិនបើលោកអ្នកចង់មាន-ចង់បានលឿន។ លោកអ្នកមិនគួរចាប់យកអាជីពខាងលើឡើយ។ ប្រសិនបើលោកអ្នកចង់មាន-ចង់បានលឿន លោកអ្នកគួរតែធ្វើជំនួញតែម្តងទៅ។ តែការធ្វើជំនួញ ជួនកាល ជោគជ័យ ជួនកាលក៏បរាជ័យ៕
© រក្សាសិទ្ធិដោយ thmeythmey.com
