ជាតិ
សង្គមជាតិ
អ្នកសារព័ត៌មានតំបន់អាស៊ីអាគ្នេយ៍ជជែកគ្នារកវិធានការប្រយុទ្ធប្រឆាំង Fake News
×![]()
ដោយ: តន ចាន់រិទ្ធារ៉ា
បាងកក៖ ព័ត៌មានក្លែងបន្លំ (Fake News) បានក្លាយជាបញ្ហាប្រឈមមួយសម្រាប់ប្រទេសក្នុងតំបន់អាស៊ីអាគ្នេយ៍។ ការសាយភាយយ៉ាងឆាប់រហ័សនៃព័ត៌មានក្លែងបន្លំក្នុងយុគសម័យប្រព័ន្ធអ៊ីនធឺណិត ដែលវិវត្តយ៉ាងលឿន បង្កការគំរាមកំហែងខ្លាំងដល់វិស័យសារព័ត៌មាន និងអ្នកសារព័ត៌មានផង។ ចាប់ថ្ងៃទី២៨ ដល់ទី២៩ ខែកញ្ញា អ្នកជំនាញផ្នែកប្រព័ន្ធផ្សព្វផ្សាយជាច្រើននាក់មកពីប្រទេសក្នុងតំបន់ បានជួបជុំគ្នាដើម្បីផ្លាស់ប្ដូរយោបល់ និងស្វែងរកដំណោះស្រាយនៃបញ្ហានេះ។
ក្នុងសន្និសីទតំបន់ស្ដីពីការប្រយុទ្ធប្រឆាំងព័ត៌មានក្លែងបន្លំ ដែលរៀបចំដោយសម្ព័ន្ធប្រព័ន្ធផ្សព្វផ្សាយអាស៊ីអាគ្នេយ៍ (SEAPA) ចាប់ពីថ្ងៃទី២៨ ដល់ថ្ងៃទី២៩ ខែកញ្ញា អ្នកសារព័ត៌មាន សកម្មជនការពារសិទ្ធិមនុស្ស និងការលើកកម្ពស់សេរីភាពសារព័ត៌មានមកពីប្រទេសនានាក្នុងតំបន់អាស៊ីអាគ្នេយ៍ បានជជែកគ្នាពីការគំរាមកំហែងរបស់ព៌ត៌មានក្លែងបន្លំ ដែលកំពុងតែរីដុសដាលខ្លាំងនៅតាមប្រទេសនានាក្នុងតំបន់។
ប្រធានបទសំខាន់ជាច្រើនទាក់ទងនឹងឥទ្ធិពលរបស់ព័ត៌មានក្លែងបន្លំត្រូវបានលើកឡើងក្នុងសន្និសីទនេះដូចជាស្ថានភាពប្រព័ន្ធផ្សព្វផ្សាយក្នុងតំបន់ និន្នាការនៃព័ត៌មានក្លែងបន្លំ និងការអធិប្បាយនាំឲ្យមានការរើសអើង តួនាទីនៃក្រុមហ៊ុនបច្ចេកវិទ្យាក្នុងការទប់ស្កាត់ព័ត៌មានមិនពិត និងគំនិតផ្ដួចផ្ដើមក្នុងការផ្ដល់ព័ត៌មានពិតជាដើម។ ឥទ្ធិពលនៃព័ត៌មានបន្លំក្នុងវិស័យនយោបាយ ក៏ត្រូវបានលើកយកមកជជែកផងដែរ។
អគ្គរដ្ឋទូតស៊ុយអែតប្រចាំទីក្រុងបាងកកលោក Steffan Herrstrom និយាយថា សិទ្ធិទទួលបានព័ត៌មាន គឺជាសិទ្ធិមូលដ្ឋានរបស់មនុស្ស ហើយក៏ជាឧបករណ៍សម្រាប់ការប្រយុទ្ធប្រឆាំងអំពើពុករលួយ ដំណើរការសម្រេចចិត្តមិនត្រឹមត្រូវ និងការគ្រប់គ្រងខុសឆ្គងជាដើម។ លោកក៏សង្កត់ធ្ងន់ដែរថា សិទ្ធិមនុស្ស មិនមែនជាគុណតម្លៃរបស់ប្រទេសលោកខាងលិចតែឯងឡើយ តែជាគុណតម្លៃរបស់សាកលលោកទាំងមូល។
ជុំវិញប្រធានបទព័ត៌មានក្លែងបន្លំនេះដែរ ប្រទេសនានាក្នុងតំបន់បានជួបបញ្ហាជាច្រើនពាក់ព័ន្ធនឹងការប្រើប្រាស់ព័ត៌មានដើម្បីកេងចំណេញប្រយោជន៍ផ្នែកនយោបាយ។ គួបផ្សំនឹងការកើនឡើងបណ្ដាញសង្គម ព្រមគ្នានឹងកំណើនអ្នកប្រើប្រាស់ប្រព័ន្ធអ៊ីនធឺណិតផងនោះ ព័ត៌មានក្លែងបន្លំបានរីកសាយភាយកាន់តែខ្លាំងគួរឲ្យព្រួយបារម្ភ។
ជាមួយនឹងបញ្ហាជាច្រើនកើតចេញពីព័ត៌មានក្លែងបន្លំនេះ អ្នកចូលរួមទាំងអស់បានលើកឡើងជាគំនិតយោបល់ជាច្រើនដើម្បីដោះស្រាយការប្រឈមមុខមួយនេះ។ ការជំរុញអក្ខរកម្មផ្នែកប្រព័ន្ធផ្សព្វផ្សាយ គឺជាកត្តាសំខាន់ក្នុងការពង្រឹងប្រសិទ្ធភាព និងគុណភាពនៃព័ត៌មាន ក្នុងយុគសម័យដែលព័ត៌មានក្លែងបន្លំរាលដាលឆាប់រហ័ស។ ជាមួយគ្នានេះ ការបង្កើតស្តង់ដាព័ត៌មានរួមមួយក្នុងតំបន់ ក៏អាចជាចំណាត់ការមួយក្នុងការទប់ស្កាត់ព័ត៌មានមិនពិតដែរ។
មិនមែនតែអ្នកសារព័ត៌មាន និងអ្នកពាក់ព័ន្ធដោយផ្ទាល់ក្នុងវិស័យនេះត្រូវដើរតួនាទីដោយផ្ទាល់ឡើយ ក្រុមហ៊ុនបច្ចេកវិទ្យាធំៗក៏មានចំណែកក្នុងការប្រយុទ្ធប្រឆាំងព័ត៌មានក្លែងបន្លំដែរ ជាពិសេសបណ្ដាញសង្គម Facebook តែម្ដង។ ភាគច្រើននៃប្រទេសក្នុងតំបន់ ព័ត៌មានមិនពិតបានហូរហៀដោយសារបណ្ដាសង្គមមួយនេះតែម្ដង។ បណ្ដាក្រុមហ៊ុនទាំងនេះ ក៏ត្រូវពង្រឹងសមត្ថភាពតាមដាន និងវាយតម្លៃព័ត៌មានទាំងឡាយដែលត្រូវបានបង្ហោះក្នុងប្រព័ន្ធរបស់ខ្លួនដែរ៕
Tag:
អាស៊ាន
Fake News
© រក្សាសិទ្ធិដោយ thmeythmey.com
