អន្តរជាតិ
លោក ប្រាយុទ្ធ សោកស្ដាយ ក្រោយបែកធ្លាយវីដេអូសន្តិសុខថៃវាយអ្នកទេសចរចិន រូបភាព The Nation
× នាយករដ្ឋមន្ត្រីថៃ ប្រាយុទ្ធ ចន្ទអូចា បានបញ្ជាឲ្យអាជ្ញាធរពាក់ព័ន្ធបង្កើនទំនុកចិត្តពីទេសចរចិនឡើងវិញ បន្ទាប់ពីការបែកធ្លាយវីដេអូមួយដែលសន្តិសុខថៃបានវាយអ្នកទេសចរចិននៅឯព្រលានយន្តហោះដនមឿងក្នុងទីក្រុងបាងកកកាលពីសប្ដាហ៍មុន។ អ្នកនាំពាក្យរដ្ឋាភិបាលថៃ Sansern Kaewkamnerd និយាយថា លោក ប្រាយុទ្ធ សោកស្ដាយជាខ្លាំងចំពោះករណីនេះ បើទោះជាហេតុការណ៍ផ្ដើមចេញពីជនជាតិចិនក្ដី។
ករណីហិង្សាលើជនជាតិនៅឯព្រលានយន្តហោះអន្តរជាតិដនមឿង ធ្វើឲ្យនាយករដ្ឋមន្ត្រីថៃ ប្រាយុទ្ធ ចន្ទអូចា បារម្ភយ៉ាងខ្លាំង ជាពិសេសបារម្ភពីផលប៉ះពាល់លើអារម្មណ៍របស់ទេសចរចិនទៅលេងថៃ។ នេះបើតាមការលើកឡើងរបស់លោកឧត្តមសេនីយ៍ Sansern Kaewkamnerd នៅថ្ងៃទី៣០ ខែកញ្ញា។ អ្នកនាំពាក្យរដ្ឋាភិបាលថៃរូបនេះនិយាយថា សកម្មភាពហិង្សានេះបានប៉ះពាល់មុខមាត់ប្រទេសជាខ្លាំង។
ប្រព័ន្ធផ្សព្វផ្សាយចិនបានផ្សាយពីហេតុការណ៍នេះយ៉ាងទូលំទូលាយ ហើយសន្តិសុខថៃក៏បានរងការរិះគន់ខ្លាំងផងដែរ។ បើតាមកាសែត The Nation សន្តិសុខថៃបានទាស់សម្ដីជាមួយអ្នកទេសចរចិន និងបានលើកដៃប្រុងវាយ ឯជនជាតិចិនបានគេចផុត មុននឹងសន្តិសុខម្នាក់ទៀតចូលអន្តរាគមន៍។ ក្រោយហេតុការណ៍នេះ ក្រុមហ៊ុនអាកាសយានដ្ឋានថៃ បានព្យួរការងារអ្នកចាត់ការព្រលានយន្តហោះដនមឿង និងអ្នកចាត់ការផ្នែកសន្តិសុខម្នាក់ផង ហើយមន្ត្រីសន្តិសុខដែលពាក់ព័ន្ធក្នុងករណីនេះ ក៏ត្រូវព្យួរតំណែង ហើយអាចនឹងបាត់បង់ការងារផង។
ពាក់ព័ន្ធដើមហេតុនៃហេតុការណ៍នេះ ក្រុមហ៊ុនខាងលើអះអាងថា អ្នកទេសចរចិនដែលមានឈ្មោះថា Mei Ji បានទៅដល់ព្រលានដនមឿង តាមជើងហោះហើរពីក្រុងហ្សាការតា ប៉ុន្តែមិនត្រូវបានអនុញ្ញាតឲ្យចូលទឹកដីថៃឡើយ ព្រោះគ្មានលិខិតបញ្ជាក់ពីគោលដៅធ្វើដំណើរ ទីតាំងស្នាក់នៅ ឬក៏ទឹកប្រាក់គ្រប់គ្រាន់សម្រាប់ការស្នាក់នៅបាងកក។ លើសពីនោះ ជនជាតិចិនរូបនេះក៏បដិសេធរង់ចាំក្នុងបន្ទប់ទៅទៀត តែចុងក្រោយក៏បានចាកចេញពីទឹកដីថៃទៅ។
តាមរយៈលោក Sansern នាយករដ្ឋមន្ត្រីថៃលើកឡើងថា ទោះជាជនជាតិចិនមិនអាចបញ្ជាក់ពីលិខិតស្នាមស្នាក់នៅ ឬមិនរង់ចាំក្នុងបន្ទប់ឃុំខ្លួនក្ដី ហើយបញ្ចេញសកម្មភាពមិនសមរម្យក៏ដោយ សន្តិសុខជនជាតិថៃគួរគ្រប់គ្រងអារម្មណ៍ និងចាត់វិធានការតាមច្បាប់អន្តរជាតិ។ លោក Suthirawat Suwannarat អ្នកចាត់ការព្រលានយន្តហោះដែលត្រូវបានព្យួរការងារនោះ បានទទួលកំហុស និងសុំទោសទេសចរចិន។
ចំណាត់ការឆាប់រហ័សរបស់អាជ្ញាធរថៃ គឺជាការពង្រឹងទំនុកចិត្តភ្ញៀវទេសចរចិន ដែលជាប្រភពចំណូលដ៏ធំរបស់ថៃ។ កាលពីឆ្នាំ២០១៧ អ្នកទេសចរចិនមានចំនួនប្រមាណមួយភាគបួននៃចំនួនអ្នកទេសចរចំនួន៣៥លាននាក់។ ប៉ុន្តែជនជាតិចិនទៅលេងថៃ បានធ្លាក់ចុះក្រោយហេតុការណ៍លិចទូកនៅភូកេតដែលសម្លាប់៥២នាក់កាលពីខែកក្កដា៕
Tag:
ថៃ
ចិន
ប្រាយុទ្ធ ចន្ទអូចា
© រក្សាសិទ្ធិដោយ thmeythmey.com