កីឡាអន្តរជាតិ
អន្តរជាតិ
Man Utd កក់ Zidane ទុករួចហើយ ប្រសិន Mourinho ត្រូវបញ្ចប់តំណែង
× Manchester United បានកក់ទុកលោក Zinedine Zidane រួចហើយដើម្បីទទួលយកការងារជាអ្នកចាត់ការទូទៅ ប្រសិនបើក្លិបនេះបញ្ចប់តំណែង Jose Mourinho។ Zidane ក៏បានបង្ហាញអារម្មណ៍ចង់ធ្វើការជាមួយ Paul Pogba ផងដែរ។
អ្នកចាត់ការសញ្ជាតិបារាំង វ័យ ៤៦ឆ្នាំ មានអារម្មណ៍ថាខ្លួនមិនចាំបាច់ត្រូវធ្វើតេស្តខ្លួនឯងនៅក្នុងក្រុមដែលបរាជ័យក្នុងការប្រជែងដណ្តើមយកពានរង្វាន់ធំៗ នោះទេ។
ការលើកឡើងខាងលើត្រូវបានគេយល់ឃើញថា ការរំពឹងដើម្បីទទួលយកតំណែងគ្រូនៅ Man Utd ដែលត្រូវតែមានការផ្លាស់ប្តូរដ៏ធំនោះ មិនមែនជាការចង់បានរបស់អតីតអ្នកចាត់ការ Real Madrid នោះទេ។ ប៉ុន្តែគំនិតនៃការចង់ធ្វើការជាមួយ Paul Pogba និងការទទួលបានភាពល្អឥតខ្ចោះពីកីឡាករបារាំងទៅវិញទេដែលធ្វើឲ្យ Zidane មានការចាប់អារម្មណ៍។ នេះបើតាមការផ្សាយរបស់ The Sun។
លោក Jose Mourinho កំពុងស្ថិតនៅក្រោមសម្ពាធនៅ Old Trafford ហើយក្រុមបិសាចក្រហម ក៏កំពុងពិចារណាកៅអីរបស់អ្នកចាត់ការសញ្ជាតិព័រទុយហ្គាល់នេះដែរ បន្ទាប់ពីចាប់ផ្តើមរដូវកាលមិនបានល្អសោះ។ តែយ៉ាងណាក៏ដោយ Zidane ដែលត្រូវបានគេរាយការណ៍ថាបានចាប់ផ្តើមរៀនភាសាអង់គ្លេសបណ្តើរៗ បានខលទៅ Mourinho ដើម្បីបន្ថយភាពតានតឹងពីការបាត់បងតំណែងនេះ។
ក្រៅពី Man Utd ក្លិបជើងឯកអ៊ីតាលី Juventus ក៏ចង់បាន Zidane ទៅធ្វើជានាយកប្រតិបត្តិរបស់ក្លិបផងដែរ៕
Tag:
បាល់ទាត់
Manchester United
Zinedine Zidane
Jose Mourinho
© រក្សាសិទ្ធិដោយ thmeythmey.com