កីឡាជាតិ
ជាតិ
សឿត ណាវ៉ា ជាយុវជនសាលាបាល់ទាត់ជាតិម្នាក់ទៀត ដែលចូលរួមជាមួយបឹងកេត កីឡាករ សឿត ណាវ៉ា ពេលបង្ហាញខ្លួនជាមួយក្លិបបឹងកេតក្រោយចុះកិច្ចសន្យារួច
× ខ្សែការពារ សឿត ណាវ៉ា នៅថ្ងៃទី៤ ខែតុលានេះ បានចុះកិច្ចសន្យា២ឆ្នាំលេងឲ្យក្លិបបឹងកេត បន្ទាប់ពីរូបគេផុតកិច្ចសន្យាជាមួយសាលាបាល់ទាត់ជាតិបាទី។ ណាវ៉ា បានក្លាយជាម្ចាស់អាវលេខ៥ ជំនួសកីឡាករ សុខ សុវណ្ណ ដែលបានចាកចេញទៅរួមរស់ជាមួយវិសាខាកាលពីពាក់កណ្តាលរដូវកាលឆ្នាំ២០១៨។
សឿត ណាវ៉ា ជាកីឡាករមកពីសាលាបាល់ទាត់ជាតិបាទីទី២ ដែលបានចុះកិច្ចសន្យាលេងឲ្យក្លិបបឹងកេត បន្ទាប់ពីអ្នកចាំទី ហ៊ុល គឹមហ៊ុយ បានចុះកិច្ចសន្យាកាលពីថ្ងៃទី២ ខែតុលា កន្លងទៅ។ បើតាមលោក បែ មករា ចាត់ការទូទៅក្លិបបឹងកេត ទាំងកីឡាករ សឿត ណាវ៉ា និង ហ៊ុល គឹមហ៊ុយ សុទ្ធតែបានចុះកិច្ចសន្យារយៈពេល២ឆ្នាំដូចគ្នា។
កីឡាករ សឿត ណាវ៉ា ជាអតីតកីឡាករជម្រើសជាតិអាយុក្រោម១៦ឆ្នាំ ១៨ឆ្នាំ និង១៩ឆ្នាំ។ ការមកចូលរួមជាមួយបឹងកេត បន្ទាប់ពីរូបគេផុតអាយុលេងឲ្យក្រុមសាលាបាល់ទាត់ជាតិបាទី។ «សហព័ន្ធបានរំលាយកីឡាករយុវជនរបស់បាទីជាង១០នាក់ ដោយពួកគេត្រូវផុតអាយុស់នៅសាលាលបាល់ជាតិបាទី។ ហើយសហព័ន្ធបានប្រាប់ទៅបណ្តាក្លិបឲ្យទំនាក់ទំនងទៅកីឡាករផ្ទាល់ បើចង់បានកីឡាករណាមួយមកចូលរួម»។ នេះជាការបញ្ជាក់របស់លោក បែ មករា ពីហេតុផលដែលយុវជនបាទីមកចូលរួមជាមួយក្លិបអាជីព។
ក្រៅពីកីឡាករទាំងពីររូបខាងលើ អ្នកចាត់ការទូទៅរូបនេះកំពុងសម្លឹងកីឡាករយុវជនបាទីផ្សេងទៅ ដើម្បីចូលរួមជាមួយក្លិបបឹងកេត។ ក្រៅពីនេះ លោកក៏កំពុងសម្លឹងមើលកីឡាករល្អៗនៅតាមអាជីពមួយចំនួនទៀតផងដែរ។ សម្រាប់លោក បែ មករា ការងាកមករកកីឡាករយុវជនបាទីនេះ ដោយសារពួកគេមានសមត្ថភាព និងទេពកោសល្យល្អ។ ម្យ៉ាងទៀតចង់ផ្តល់ឱកាសឲ្យពួកគេបានបង្ហាញសមត្ថភាពជាមួយក្លិបអាជីព ដើម្បីរួមចំណែកអភិវឌ្ឍន៍វិស័យកីឡាបាល់ទាត់នៅកម្ពុជា៕
Tag:
បាល់ទាត់
សឿត ណាវ៉ា
បឹងកេត
© រក្សាសិទ្ធិដោយ thmeythmey.com