អន្តរជាតិ
លោក ផេន ចោទចិនថា ចង់បានប្រធានាធិបតីផ្សេងពីលោក ត្រាំ តែចិនបដិសេធ អនុប្រធានាធិបតីអាមេរិក ម៉ៃ ផេន (រូបភាព AFP)
× អនុប្រធានាធិបតីអាមេរិក ម៉ៃ ផេន នៅថ្ងៃទី៤ ខែតុលា បានចោទប្រកាន់ចិនជាចំហចំពោះសកម្មភាពយោធានៅសមុទ្រចិនខាងត្បូង ការលួចកម្មសិទ្ធិបញ្ញាផ្នែកពាណិជ្ជកម្ម និងការកើនឡើងការបំពានសិទ្ធិមនុស្សក្នុងទឹកដីចិន។ លោក ផេន ក៏ចោទចិនថា ប្រើគ្រប់មធ្យោបាយទាំងអស់ដើម្បីបំភ័ន្តសាធារណមតិនៅអាមេរិកមុនការបោះឆ្នោតពាក់សភានៅខែក្រោយ និងចង់ប្ដូរលោក ដូណាល់ ត្រាំ ផង។ ប៉ុន្តែចិនបានបដិសេធដាច់ណាត់។
ចិនបានក្លាយជាមុខសញ្ញាថ្មីមួយទៀតសម្រាប់អាមេរិកវាយប្រហារជុំវិញការលូកលាន់ការបោះឆ្នោតរបស់ខ្លួន។ ខណៈការបោះឆ្នោតសភាពាក់កណ្ដាលអាណត្តិនឹងធ្វើឡើងនៅខែក្រោយ ហើយដែលជាការបោះឆ្នោតដ៏សំខាន់សម្រាប់ប្រធានាធិបតី ដូណាល់ ត្រាំ នោះ អនុប្រធានាធិបតីអាមេរិក ម៉ៃ ផេន បានចេញមុខចោទចិនចំៗថា បានជ្រៀតជ្រែកគ្រប់វិធីសាស្ត្រក្នុងការបោះឆ្នោតនៅអាមេរិក សំដៅធ្វើឲ្យអន្តរាយដល់លោក ត្រាំ ។
ថ្លែងទៅកាន់អង្គការមួយក្នុងទីក្រុងវ៉ាស៊ីនតោននៅថ្ងៃទី៤ ខែតុលា លោក ផេន និយាយម៉ាត់ៗថា ការដឹកនាំរបស់លោកប្រធានាធិបតី ដូណាល់ ត្រាំ កំពុងហុចផល ឯចិនចង់បានប្រធានាធិបតីផ្សេង។ នេះជារឿងមិនអាចប្រកែកបានដែលចិនកកូរកកាយប្រជាធិបតេយ្យអាមេរិក។ លោក ផេន ទំនងចង់សំដៅដល់ចំណាត់ការដំឡើងពន្ធរបស់លោក ត្រាំ លើផលិតផលចិនដើម្បីកាត់បន្ថយអតុល្យភាពជញ្ជីងពាណិជ្ជកម្ម និងបង្ខំឲ្យចិនអនុវត្តក្បួនរកស៊ីដែលយុត្តិធម៌វិញ។
សម្ដីចោទប្រកាន់របស់អនុប្រធានាធិបតីអាមេរិក ក៏ទទួលបានការឆ្លើយតបពីក្រុងប៉េកាំងវិញភ្លាមដែរ។ បើតាមទីភ្នាក់ងារព័ត៌មាន AFP អ្នកនាំពាក្យក្រសួងការបរទេសចិន Hua Chunying បានហៅការចោទរបស់លោក ផេន ជារឿងគួរឲ្យអស់សំណើច គ្មានមូលដ្ឋាន និងបានបង្ខូចបង្កាច់មុខមាត់ចិន។ អ្នកនាំពាក្យរូបនេះចាត់ទុកសម្ដីលោក ផេន ធ្វើឡើងតាមការនិយាយតគ្នា ច្រឡំខុសជាត្រូវ និងបង្កើតរឿងឡើង ហើយចិនប្រឆាំងទង្វើនេះដាច់ខាត។
«ចិនតែងតែអនុវត្តតាមគោលការណ៍មិនជ្រៀតជ្រែកកិច្ចការផ្ទៃក្នុងប្រទេសផ្សេង ហើយក៏គ្មានចំណាប់អារម្មណ៍នឹងកកូរកកាយការងារផ្ទៃក្នុង និងការបោះឆ្នោតរបស់អាមេរិកដែរ។» នេះជាការលើកឡើងរបស់លោកស្រី Hua ជុំវិញគោលនយោបាយការបរទេសរបស់ចិន និងបានទទូចឲ្យអាមេរិកកែប្រែកំហុសឆ្គងរបស់ខ្លួន ឈប់ចោទចិនដោយគ្មានមូលដ្ឋាន ដែលប៉ះពាល់ផលប្រយោជន៍ចិន ក៏ដូចជាទំនាក់ទំនងចិន-អាមេរិកផង។
ការបោះឆ្នោតខែវិច្ឆិកាខាងមុខ ជាចំណុចរបត់ដ៏សំខាន់សម្រាប់លោក ត្រាំ និងបក្សសាធារណរដ្ឋផង។ ក្នុងករណីបក្សសាធារណរដ្ឋបាត់បង់សំឡេងភាគច្រើនរបស់ខ្លួននៅសភាទៅឲ្យបក្សប្រជាធិបតេយ្យ គោលនយោបាយរបស់លោក ត្រាំ ដែលចម្រូងចម្រាស់ខ្លាំងដូចជាបញ្ហាអន្តោប្រវេសន៍ និងការសាងសង់ជញ្ជាំងព្រំដែន ប្រាកដជារាំងស្ទះមិនខាន។ កាន់តែធ្ងន់ធ្ងរទៅទៀតនោះ លោក ត្រាំ ក៏អាចប្រឈមមុខនឹងការទម្លាក់ពីតំណែងផងដែរ៕
Tag:
អាមេរិក
ចិន
ម៉ៃ ផេន
© រក្សាសិទ្ធិដោយ thmeythmey.com