អន្តរជាតិ
ឧត្តមនាវី James Foggo ក្នុងសន្និសីទសារព័ត៌មាននៅមន្ទីរបញ្ចកោណ (រូបភាព AFP)
×![]()
ដោយ: តន ចាន់រិទ្ធារ៉ា
មេទ័ពជើងទឹកអាមេរិកប្រចាំសម្ព័ន្ធយោធាណាតូ James Foggo នៅថ្ងៃទី៥ ខែតុលា ព្រមានថា រុស្ស៊ីកំពុងបង្កើនសមត្ថភាពប្រយុទ្ធក្រោមទឹករបស់ខ្លួន ដើម្បីប្រឈមមុខដោយផ្ទាល់ជាមួយកម្លាំងអាមេរិកនៅសមុទ្រអាត្លង់ទិក និងម៉េឌីទែរ៉ាណេ។ បើតាមមន្ត្រីយោធាជាន់ខ្ពស់អាមេរិកដដែលនេះ រុស្ស៊ីប្រឹងពង្រឹងសមត្ថភាពក្រោមទឹករបស់ខ្លួនឲ្យកាន់តែខ្លាំង ក៏ព្រោះរុស្ស៊ីមិនគ្មានសមត្ថភាពតទល់ជាមួយអាមេរិកសម្រាប់សមរភូមិលើទឹកឡើយ។
ឧត្តមនាវី James Foggo មេបញ្ជាការទីបញ្ជាការសម្ព័ន្ធមិត្តចម្រុះនៃសម្ព័ន្ធយោធាណាតូនៅ Naples និយាយថា រុស្ស៊ីបានវិនិយោគយ៉ាងច្រើនសន្ធឹកសន្ធាប់លើកម្លាំងនាវាមុជទឹករបស់ខ្លួន ហើយចង់បង្កើតការគំរាមកំហែងឲ្យអាមេរិក និងសម្ព័ន្ធយោធាណាតូទៀតផង។ លោក Foggo ក៏ព្រមានពីការគំរាមកំហែងលើសន្តិសុខតំបន់អឺរ៉ុបពីសំណាក់រុស្ស៊ីដែរ ព្រោះរុស្ស៊ីក៏បានពង្រាយនាវាមុជទឹករបស់ខ្លួននៅតំបន់សមុទ្រក្បែរអឺរ៉ុប។
បើតាមទីភ្នាក់ងារព័ត៌មាន AFP មេទ័ពជនជាតិអាមេរិករូបនេះបានពន្យល់ពីមូលហេតុដែលរុស្ស៊ីព្យាយាមបង្កើនសមត្ថភាពក្រោមទឹកនេះ។ លោក Foggo បានប្រាប់អ្នកសារព័ត៌មាននៅឯមន្ទីរបញ្ចកោណថា កម្លាំងជើងទឹករុស្ស៊ីដឹងពីសមត្ថភាពរបស់ខ្លួនដែលមិនអាចប្រជែងនឹងអាមេរិកបានឡើយលើកម្រិតនាវាដឹកយន្តហោះ និងនាវាមានទំហំធំ ដូចនេះទើបបានជារុស្ស៊ីបន្តការស្រាវជ្រាវ និងអភិវឌ្ឍ និងពង្រឹងសមត្ថភាពក្រោមទឹក។
មេទ័ពអាមេរិកដដែលអះអាងថា រុស្ស៊ីមាននាវាមុជទឹកដើរដោយថាមពលប្រេង និងអគ្គីសនីធុន Kilo ចំនួន៦គ្រឿងនៅសមុទ្រខ្មៅ និងម៉េឌីទែរ៉ាណេខាងកើត។ ឆ្លើយតបនឹងសំណួរថា ទ័ពជើងទឹកអាមេរិកដឹងពីដំណើររបស់នាវារុស្ស៊ីឬយ៉ាងណានោះ លោក Foggo ដែលធ្លាប់បញ្ជានាវាមុជទឹកដែរនោះ មិនបាននិយាយអ្វីឡើយ តែបង្ហើបថា អាមេរិកមានសមត្ថភាពខ្លាំងជាងរុស្ស៊ី ព្រោះមានបច្ចេកវិទ្យាស្ដាប់សំឡេងនាវាមុជទឹក។
អ្វីដែលលោក Foggo បារម្ភ គឺមីស៊ីល Kalibr ដែលបំពាក់លើនាវាមុជទឹកទាំងនោះ។ ក្នុងករណីរុស្ស៊ីបាញ់មីស៊ីលដ៏មានឥទ្ធិពលចេញពីតំបន់សមុទ្រណាមួយក៏ដោយដែលនៅជុំវិញតំបន់អឺរ៉ុប មេទ័ពជើងទឹកអាមេរិករូបនេះ បញ្ជាក់ថា រដ្ឋធានីរបស់ប្រទេសនៅអឺរ៉ុបទាំងអស់ សុទ្ធតែជាគោលដៅរបស់មីស៊ីលមួយនេះ។
មេបញ្ជាការកងទ័ពណាតូដដែលនេះ ក៏បាននិយាយដល់គម្រោងសមយុទ្ធយោធានៅន័រវ៉េស ដែលជាសមយុទ្ធយោធាដ៏ធំមិនធ្លាប់មានមករបស់ណាតូចាប់តាំងពីសង្គ្រាមត្រជាក់មក។ បើតាមលោក Foggo សមយុទ្ធនេះមានគោលដៅបង្ហាត់កងទ័ពបណ្ដេញសត្រូវដែលឆ្លងកាត់ព្រំដែនរបស់ប្រទេសណាតូ និងជាសារព្រមានផងដែរ៕
Tag:
អាមេរិក
រុស្ស៊ី
James Foggo
© រក្សាសិទ្ធិដោយ thmeythmey.com
