ជាតិ
សត្វកម្រជាច្រើនប្រភេទ កំពុងមានវត្តមាននៅឧទ្យានជាតិវីរៈជ័យ ក្នុងខេត្តរតនគិរី រូបភាព បានពីក្រសួងបរិស្ថាន
× ភ្នំពេញ៖ សត្វកម្រជាច្រើនប្រភេទកំពុងតែរស់នៅក្នុងឧទ្យានជាតិវីរៈជ័យ ក្នុងខេត្តរតនគិរី។ សត្វកម្រទាំងនេះមាន សត្វខ្លាឃ្មុំ ស្វាក្រវ៉ាត់ មាន់ព្រៃ សំពោចភ្នំ ឈ្លូស ដំរី ខ្លាឃ្មុំ ខ្លាពពក និងខ្ទីងជាដើម។ នេះជាការបញ្ជាក់របស់លោក នេត្រ ភក្ត្រា រដ្ឋលេខាធិការ និងជាមន្ដ្រីនាំពាក្យក្រសួងបរិស្ថាន។
អ្នកនាំពាក្យក្រសួងបរិស្ថានរូបនេះ បានបញ្ជាក់ថា ឧទ្យានជាតិវីរៈជ័យ គឺជាតំបន់ដែលសម្បូរទៅដោយធនធានធម្មជាតិ និងជីវៈចម្រុះ។ លក្ខណៈជីវសាស្ត្រដ៏សម្បូរបែបដូច្នេះ មានសារៈសំខាន់ណាស់សម្រាប់ការងារអភិរក្សអន្ដរជាតិ។ លោក នេត្រ ភក្ត្រា បានអំពាវនាវដល់គ្រប់ភាគីពាក់ព័ន្ធទាំងអស់ ចូលរួមការពារនិងអភិរក្សធនធានធម្មជាតិនេះ ទាំងអស់គ្នា។
លោក នេត្រ ភក្ត្រា បានអះអាងដូច្នេះថា « សត្វកម្រទាំងនោះ ត្រូវបានថតបានជាច្រើនសន្លឹក ចាប់ពីថ្ងៃទី២៦កញ្ញា រហូតដល់ថ្ងៃទី៤តុលា ដែលមន្ត្រីឧទ្យានុរក្សនៃឧទ្យានជាតិវីរជ័យបានដាក់ម៉ាស៊ីនថតស្វ័យប្រវត្តិ នៅទីតាំងមួយចំនួនក្នុងឧទ្យាជាតិនេះ»។
បច្ចុប្បន្ន ក្រសួងបរិស្ថាន គ្រប់គ្រងតំបន់ការពារធម្មជាតិ និងអភិរក្សជីវៈចម្រុះទំហំជាង ៧,៥លានហិកតាដោយមានមន្ដ្រីឧទ្យានុរក្សចំនួន១២៦០នាក់ ដើម្បីដើរល្បាត ការពារធនធានធម្មជាតិ និងអភិរក្សជីវៈចម្រុះ សម្បត្តិធម្មជាតិ និងវប្បធម៌៕
រូបភាព បានពីក្រសួងបរិស្ថាន
Tag:
សត្វកម្រ
ឧទ្យានជាតិវីរៈជ័យ
ខេត្តរតនគិរី
© រក្សាសិទ្ធិដោយ thmeythmey.com