អន្តរជាតិ
×![]()
អង្គការសហប្រជាជាតិបានរកឃើញថា ប្រជាជននៅលើពិភពលោករហូតដល់ជាង ១ពាន់លាននាក់កំពុងបន្តរស់នៅក្រោមបន្ទាត់នៃភាពក្រីក្រក្នុងពេលបច្ចុប្បន្ន។ ប្រជាជនទាំងនេះត្រូវប្រឈមនឹងបញ្ហាច្រើនជាពិសេសជម្លោះ ជំងឺរាតត្បាត និងគ្រោះមហន្តរាយជាដើមផង។ 
តាមការស្ទង់ស្ទាបលើប្រទេសចំនួន ១០៤ ដែលមានប្រជាជនសរុបបញ្ចូលគ្នាប្រមាណ ៥,៥ពាន់លាននាក់ បានបង្ហាញថា មនុស្សប្រមាណ១,៣ពាន់លាននាក់ កំពុងរស់នៅក្នុងបន្ទាត់នៃភាពក្រីក្រ ដោយក្នុងនោះមានកុមារចំនួន ៦៦២លាននាក់។ របាយការណ៍អង្គការសហប្រជាជាតិសម្រាប់កម្មវិធីអភិវឌ្ឍន៍ (UNDP) បានបង្ហាញដូច្នេះ។
របាយការណ៍ដដែលនេះ បានបង្ហាញថា ក្នុងចំណោមមនុស្សទាំង ១,៣ពាន់លាននាក់នេះ ប្រមាណ៤៦ភាគរយនៃពួកគេ ត្រូវបានគេចាត់ទុកថា «កំពុងរស់នៅក្នុងបន្ទាត់នៃភាពក្រីក្រយ៉ាងធ្ងន់ធ្ងរ»។
ចំណែកឯមនុស្សប្រមាណ ៨៧០លាននាក់ផ្សេងទៀត កំពុងប្រឈមនឹងហានិភ័យ និងអាចធ្លាក់ចូលក្នុងបន្ទាត់នៃភាពក្រីក្រផងដែរ ដោយសារតែបញ្ហាមួយចំនួនដូចជា ជម្លោះ, ជំងឺ, គ្រោះទុរភិក្ស និងភាពអត់ការងារធ្វើជាដើម។
គួរបញ្ជាក់ថា របាយការណ៍របស់អង្គការសហប្រជាជាតិនេះបានធ្វើឡើង ដោយផ្អែកលើការពិនិត្យមើលលើទិដ្ឋភាពសំខាន់ៗចំនួនបីរួមមាន សុខភាព, ការអប់រំ និងកម្រិតជីវភាពរស់នៅប្រជាជនទាំងនោះ៕
Tag:
របាយការណ៍UN
បន្ទាត់ភាពក្រីក្រ
© រក្សាសិទ្ធិដោយ thmeythmey.com
