រដ្ឋបាល់កង់ម៉ាសេដ្វានបានឯកភាពជាមួយក្រិកប្តូរឈ្មោះទៅជាសាធារណរដ្ឋម៉ាសេដ្វានខាងជើងវិញដើម្បីបញ្ចប់ជម្លោះរឿងឈ្មោះនេះ ប៉ុន្តែវានៅនីតិវិធីមួយចំនួនដែលត្រូវសម្រេចមុនឈ្មោះនេះត្រូវគេប្តូរជាផ្លូវការ។ ក្រៅពីម៉ាសេដ្វានដែលប្តូរឈ្មោះដោយសារដោះស្រាយជម្លោះ ប្រទេសមួយចំនួនទៀតក៏បានប្តូរឈ្មោះរបស់ខ្លួនដែរកន្លងមកនេះ ហើយប្រទេសតាំងនោះប្តូរឈ្មោះក្រោយប្រកាសឯករាជ្យ និងក្រោយមានការបំបែករដ្ឋជាដើម។
ប្រទេសមួយចំនួនដែលបានប្តូរឈ្មោះពេលទទួលឯករាជ្យមានដូចជា បង់ក្លាដែស ឆ្នាំ ១៩៧១ (ធ្លាប់មានឈ្មោះថា ប៉ាគីស្ថានខាងកើត), បូតស្វាណាឆ្នាំ ១៩៦៦ (ធ្លាប់មានឈ្មោះថា Bechuanaland), ហ្កាណាឆ្នាំ ១៩៥៧ ( ធ្លាប់មានឈ្មោះថា Gold Coast), ឥណ្ឌូណេស៊ីឆ្នាំ ១៩៤៥ (ធ្លាប់មានឈ្មោះថា Dutch East Indies), ម៉ាឡាវីឆ្នាំ ១៩៦៤ (ធ្លាប់មានឈ្មោះថាNyasaland) និងស៊ីមបាវ៉េឆ្នាំ ១៩៨០ (ធ្លាប់មានឈ្មោះថា Rhodesia)។
ចំណែកប្រទេសដែលប្រកាសប្តូរឈ្មោះក្រោយមានការបំបែករដ្ឋនោះមាន បេឡារ៉ុស ដែលប្តូរឈ្មោះពីប៉េឡារុស្ស៊ី បន្ទាប់ពីសហភាពសូវៀតរលំរលាយនៅឆ្នាំ ១៩៩១ ដល់បន្សល់ទុករដ្ឋឯករាជ្យ ១៥នោះ។ រីឯរដ្ឋដែលផ្តាច់ខ្លួនចេញពីគ្នាដូចជា សាធារណរដ្ឋឆេក និងស្លូវ៉ាក រួមជាមួយបណ្តាប្រទេសអតីតសហភាពយូហ្គោស្លាវីនោះ។
ខាងក្រោមនេះជាឧទាហរណ៍ខ្លះដែលបានប្តូរឈ្មោះ និងមានភ្ជាប់ជាមួយប្រវត្តិសង្ខេបផងដែរ៖
១.ស្វាស៊ីឡង់ទៅជា អ៊ីស្វាទីនី (eSwatini)
រយៈពេលត្រឹម ៥០ឆ្នាំក្រោយបានទទួលឯករាជ្យពីចក្រភពអង់គ្លេស ក្សត្រ Mswati ទីបី បានប្រកាសកាលពីខែមេសាថា ទ្រង់ប្តូរឈ្មោះប្រទេសពី ស្វាស៊ីឡង់ទៅជាអ៊ីស្វាទីនីវិញ ដែលមានន័យថាជាទឹកដីនៃប្រជាជនស្វាស៊ី។ ការផ្លាស់ប្តូរនេះក៏ដើម្បីកុំឲ្យមានការច្រឡំជាមួយប្រទេសស្វីសដែរ។ ប៉ុន្តែការប្រកាសរបស់មហាក្សត្រនេះ បានធើឲ្យប្រជាជនស្វាស៊ីឡង់មួយចំនួនមិនសប្បាយចិត្ត។
២.ពីកុងហ្គោទៅជាសាអៀ (Zaire) និងប្តូរត្រឡប់មកវិញ
នៅពេលទទួលបានឯករាជ្យពីបែលហ្ស៊ិកនៅឆ្នាំ ១៩៦០ រដ្ឋអាហ្វ្រិកកណ្តាលមួយនេះបានក្លាយជាសាធារណរដ្ឋកុងហ្គោ ដោយវាមានឈ្មោះដូចគ្នានឹងរដ្ឋជិតខាងដែរ។ ប្រទេសទាំងពីរនេះខុសគ្នាត្រឹមរដ្ឋធានីប៉ុណ្ណោះដោយម្ខាងមានរដ្ឋធានីឈ្មោះ Brazzaville និងម្ខាងទៀតមានរដ្ឋធានីឈ្មោះ Kinshasa។
ប៉ុន្មាឆ្នាំក្រោយមក ប្រទេសនេះបានបន្ថែមពាក្យថាប្រជាធិបតេយ្យក្នុងឈ្មោះរបស់ខ្លួន ដោយក្លាយទៅជាសាធារណរដ្ឋប្រជាធិបតេយ្យកុងហ្គោ។ ដល់ឆ្នាំ ១៩៧១ ប្រទេសនេះបានប្តូរឈ្មោះទៀតទៅជា ប្រទេសសាអៀ ដោយសារការបញ្ជារបស់ឧត្តមសេនីយ៍ Joseph-Desire Mobutu ដែលបានក្តោបក្តាប់អំណាចនៅឆ្នាំ ១៩៦៥ ដោយការធ្វើរដ្ឋប្រហារ។ លោក Mobutu បានទទួលឈ្មោះថា Mobutu Sese Seko ហើយបានបង្កើតរបបដឹកនាំផ្តាច់ការ។ យ៉ាងណាមិញ ឈ្មោះប្រទេសនេះត្រុវបានរក្សាទុករហូតដល់ពេលលោកអស់អំណាចនៅឆ្នាំ ១៩៩៧ នៅពេលលោក Laurent-Désiré Kabila ដណ្តើមអំណាចបាន។ ឈ្មោះប្រទេសនេះក៏ត្រូវបានប្តូរមកជាសាធារណរដ្ឋប្រជាធិបតេយ្យកុងហ្គោវិញចាប់ពីពេលនោះ។
៣.ភូមា ប្តូរទៅជាមីយ៉ាន់ម៉ា
នៅក្នុងឆ្នាំ ១៩៨៩ រដ្ឋាភិបាលយោធាបានសម្រេចប្តូរឈ្មោះរដ្ឋអាស៊ីអាគ្នេយ៍នេះពីភូមា ទៅជាសាធារណរដ្ឋសហភាពមីយ៉ាន់ម៉ា ដើម្បីគាស់រំលើងចោលមរតកដែលបន្សល់ទុកពីសម័យអាណានិគមអង់គ្លេស។ បារាំង ជប៉ុន និងអង្គការសហប្រជាជាតិផងទទួលស្គាល់ឈ្មោះថ្មី ប៉ុន្តែអាមេរិកនិងអង់គ្លេសនៅតែបដិសេធឈ្មោះនេះ។ ការសម្រេចនេះដែរកើតឡើងត្រឹមមួយឆ្នាំប៉ុណ្ណោះក្រោយមានការបង្ក្រាបចលនាបាតុកម្មរបស់សិស្សនិស្សិតដែលស្រេកឃ្លានប្រជាធិបតេយ្យនោះ។
យ៉ាងណាក៏ដោយឈ្មោះនេះមានការកែប្រែតែក្នុងភាសាអង់គ្លេសប៉ុណ្ណោះ ចំណែកឯភាសាមីយ៉ាន់ម៉ាមិនមានអ្វីប្រែប្រួលឡើយ។ ក្នុងអំឡុងក្រុមយោធាកាន់កាប់អំណាច ម្ចាស់ពានរង្វាន់ណូបែលសន្តិភាព និងបច្ចុប្បន្នជាទីប្រឹក្សារដ្ឋនោះបដិសេធប្រើប្រាស់ឈ្មោះមីយ៉ាន់ម៉ា ដោយសារលោកស្រីព្យាយាមបដិសេធមរតកនយោបាយក្រុមយោធា។
រហូតដល់ពេលមានការបើកចំហនយោបាយខ្លះ និងមានការចាប់ផ្តើមប្រជាធិបតេយ្យូបនីយកម្មឆ្នាំ ២០១២ ពាក្យមីយ៉ាន់ម៉ា ត្រូវបានគេប្រើប្រាស់កាន់តែច្រើនឡើយ។
៤.ពី Upper Volta ទៅជាបួគីណាហ្វាសូ
បន្ទាប់ពីបានទទួលឯករាជ្យពីបារាំងឆ្នាំ ១៩៥៨ ប្រទេសអាហ្វ្រិកខាងលិចមួយបានសម្រេចជ្រើសរើសឈ្មោះខ្លួនថា «Upper Volta»ដោយសារតែវាមានទីតាំងនៅតាមបណ្តាយទន្លេ Volta។ ប៉ុន្តែមកដល់ឆ្នាំ ១៩៨៤ មេដឹកនាំរដ្ឋប្រហារដ៏មានប្រជាប្រិយភាពលោក Thomas Sankara ដែលដណ្តើមអំណាចបានឆ្នាំ ១៩៨៣នោះ បានសម្រេចប្តូរឈ្មោះប្រទេសមកជា បួគីណាហ្វាសូ វិញដែលវាមានន័យថាជា «ទឹកដីនៃបុរសឈរ» ។
៥. Dahomey ទៅជាប្រទេសបេណាំង
ក្រោយទទួលបានឯករាជ្យពីបារាំងរយៈពេល ១៥ឆ្នាំ និងមួយឆ្នាំក្រោយមានាករអនុម័តយកគោលនយោបាយម៉ាកស៊ីសនិយម ប្រទេស Dahomey ត្រូវបានគេប្តូរឈ្លោះទៅជាសាធារណរដ្ឋប្រជាមានិតបេណាំងនៅក្នុងឆ្នាំ ១៩៧៥។
ការជ្រើសរើសយកបេណាំងនេះគឺសំដៅលើអតីតរាជាណាចក្របេណាំងដ៏មានឥទ្ធិពលដែលមានវត្តមានមុនសម័យអាណានិគមនោះ។ ចក្រភពបេណាំងបច្ចុប្បន្នគឺតំបន់ស្ថិតនៅទិសនីរតីប្រទេសនីហ្សេរីយ៉ា ហើយវាមានវត្តមានតាំងពីយូរយារណាស់មកហើយ រហូតដល់ចុងសតវត្សទី ១៩ ទើបរលំរលាយបាត់៕