ជាតិ
នយោបាយជាតិ
លោក ហ៊ុន សែន ប្រាប់ក្យូដូថាលោក ហ៊ុន ម៉ាណែត អាចក្លាយជាមេដឹកនាំកម្ពុជា
ឧត្តមសេនីយ៍ឯក ហ៊ុន ម៉ាណែត មេបញ្ជាការកងទ័ពជើងគោក
×![]()
ដោយ: VOA
ភ្នំពេញ៖ នៅក្នុងអ្វីដែលអាចជាការបង្ហាញជាសាធារណៈជាលើកដំបូង លោកនាយករដ្ឋមន្ត្រី ហ៊ុន សែន បានថ្លែងប្រាប់កាសែតជប៉ុននៅក្នុងសប្ដាហ៍កន្លងទៅថា កូនប្រុសច្បងរបស់លោក គឺលោកឧត្ដមសេនីយ៍ឯក ហ៊ុន ម៉ាណែត មានលទ្ធភាពក្លាយជាមេដឹកនាំប្រទេសទៅថ្ងៃអនាគត។
ទីភ្នាក់ងារព័ត៌មានជប៉ុន Kyodo បានធ្វើបទសម្ភាសជាលាយលក្ខណ៍អក្សរជាមួយនឹងលោកនាយករដ្ឋមន្ត្រីកម្ពុជា អំឡុងពេលលោកបំពេញទស្សនកិច្ចរយៈពេលប្រាំថ្ងៃនៅប្រទេសជប៉ុន ដើម្បីចូលរួមកិច្ចប្រជុំកំពូលជប៉ុន-មេគង្គ បានចុះផ្សាយកាលពីថ្ងៃសៅរ៍ថា៖
«លោក ហ៊ុន សែន ដែលកាន់អំណាចរយៈពេល៣៣ឆ្នាំមកហើយ បាននិយាយដែរថា លោកបានចាត់ទុកកូនប្រុសច្បងរបស់លោក គឺលោក ហ៊ុន ម៉ាណែត ថាអាចជាមេដឹកនាំមួយរូបទៅថ្ងៃអនាគតនៃប្រទេសក្នុងតំបន់អាស៊ីអាគ្នេយ៍មួយនេះ»។
លោកនាយករដ្ឋមន្ត្រី ទើបបានដឹកនាំគណបក្សប្រជាជនកម្ពុជា ដោយទទួលជ័យជម្នះលើការបោះឆ្នោតជាតិកាលពីខែ កក្កដា ដោយបានទទួលសំឡេងគាំទ្រគ្រប់គ្រងអាសនៈទាំងអស់១២៥នៅរដ្ឋសភាក្រោមសន្ធឹករិះគន់ ថាការបោះឆ្នោតបានប្រព្រឹត្តទៅក្រោមបរិបទនៃការដេញចាប់ចងអ្នកជំទាស់។
អំឡុងពេលដែលគណបក្សសង្គ្រោះជាតិ ដែលត្រូវបានគេមើលឃើញថា ជាគូប្រជែងស្មើគីឡូតែមួយគត់នឹងគណបក្សប្រជាជន ត្រូវបានតុលាការកំពូលរំលាយចោលកាលពីខែ វិច្ឆិកា ឆ្នាំទៅមិញ គេបានឮលោក ហ៊ុន សែន ទន្ទេញជាប់មាត់ថាលោកនឹងបន្តកាន់អំណាចរយៈពេលយ៉ាងហោចណាស់១០ឆ្នាំទៀត។
សារព័ត៌មានដដែលរបស់ជប៉ុនបានចុះផ្សាយបន្ត ដោយស្រង់សម្ដីលោក ហ៊ុន សែន ទៀតថា៖«យ៉ាងណាក្ដី លោក [ហ៊ុន សែន] បានទទួលស្គាល់ថា មិនថា លោក...ឧត្ដមសេនីយ៍ ហ៊ុន ម៉ាណែត មានសមត្ថភាពដល់កម្រិតណាក៏ដោយ នៅពេលដែលពេលវេលាមកដល់ មានតែអំណាចប្រជាជននៅទូទាំងប្រទេសទេ ដែលអាចសម្រេចថាអ្នកណានឹងក្លាយជាមេដឹកនាំថ្មីរបស់ពួកគេ»។
កាលពីខែកញ្ញាកន្លងទៅ លោក ហ៊ុន ម៉ាណែត ដែលគ្មានតួនាទីនយោបាយផ្លូវការ ត្រូវបានព្រះមហាក្សត្រកម្ពុជា ព្រះបាទ នរោត្តម សីហមុនី ត្រាស់បង្គាប់តែងតាំងជា មេបញ្ជាការកងទ័ពជើងគោក នៃកងយោធពលខេមរភូមិន្ទ ជំនួសនាយឧត្តមសេនីយ៍ មាស សុភា អតីតមេបញ្ជាការចាស់វស្សា ដែលត្រូវទៅទទួលតំណែងជាទេសរដ្ឋមន្ត្រីនៅក្នុងគណៈរដ្ឋមន្ត្រីថ្មីរបស់លោក ហ៊ុន សែន។
លោក ទៀ បាញ់ រដ្ឋមន្ត្រីក្រសួងការពារជាតិ ធ្លាប់បានថ្លែងប្រាប់សាធារណជនថា មិនយូរមិនឆាប់ លោក ហ៊ុន ម៉ាណែត មុខជានឹងត្រូវបានដំឡើងឋានន្តរស័ក្ដិជា «នាយឧត្ដមសេនីយ៍ ផ្កាយមាសបួន» ជាក់ជាមិនខាន។
លោក ហ៊ុន ម៉ាណែត ជាកូនប្រុសច្បងរបស់លោក ហ៊ុន សែន នៅក្នុងចំណោមបងប្អូនប្រុសបីនាក់ ដែលត្រូវបានអ្នកតាមដានប្រមើមើលទុកពីនាយថាអាចនឹងស្នងតំណែងកំពូលរបស់ឪពុកពួកគេ។
លោក ហ៊ុន ម៉ានិត កូនប្រុសទីពីរ បច្ចុប្បន្នជាអគ្គនាយកចារកម្មយោធា នៅក្រសួងការពារជាតិ ខណៈដែលលោក ហ៊ុន ម៉ានី កូនប្រុសពៅ កំពុងបំពេញតួនាទីជាប្រធានគណៈកម្មការជំនាញអប់រំនិងវប្បធម៌នៅរដ្ឋសភា ក្នុងនាមដំណាងរាស្ត្រមណ្ឌលកំពង់ស្ពឺ និងជាអ្នកដឹកនាំចលនាយុវជនធំបង្អស់មួយរបស់ប្រទេស។
នៅពេលត្រូវបានសួរថាលោកមានគោលបំណងស្នងតំណែងពីលោក ហ៊ុន សែន ជាឪពុកឬទេ លោក ហ៊ុន ម៉ានី ធ្លាប់បានប្រាប់វិទ្យុក្នុងស្រុកមួយកាលពីចុងឆ្នាំ២០១៥ថា ការក្លាយជានាយករដ្ឋមន្ត្រីរបស់ប្រទេសជាសេចក្ដីប្រាថ្នារបស់យុវជនគ្រប់រូប។
ដោយឡែក ឧត្ដមសេនីយ៍ឯក ហ៊ុន ម៉ាណែត ដែលបានបញ្ចប់ការសិក្សានៅសាលាបណ្ឌិត្យសភាយោធាសហរដ្ឋអាមេរិក West Points បានបង្ហាញនូវការប្រុងប្រយ័ត្ន ដោយមិនផ្ដល់ចម្លើយចំៗទេថាលោកចង់ ឬមិនចង់ ស្នងតំណែងជានាយករដ្ឋមន្ត្រីពីឪពុករបស់លោក នៅពេលត្រូវបាន អ្នកសារព័ត៌មាននៃបណ្ដាញទូរទស្សន៍ ABC អូស្ត្រាលី ជជីកសួរកាលពីឆ្នាំ២០១៥។
អំឡុងពេលអមដំណើរលោក ហ៊ុន សែន ទៅចូលរួមមហាសន្និបាតប្រចាំឆ្នាំរបស់អង្គការសហប្រជាជាតិ កាលពីចុងខែមុន លោក ហ៊ុន ម៉ាណែត បានរងការចោទប្រកាន់តាមរយៈការទម្លាយដោយអនាមិកនូវសារឆ្លើយឆ្លងលើបណ្ដាញទំនាក់ទំនងសង្គម ដែលអ្នកទម្លាយទំនងជាចង់បង្ហាញអំពីទំនាក់ទំនងស្នេហាក្រៅចំណងមង្គលការរបស់លោកជាមួយនឹងពិធីការនីទូរទស្សន៍មួយរូបគឺនាង យ៉ុង ខេមរា ដែលមានតួនាទីក្នុងជួរកងទ័ព។ ទាំងលោក ហ៊ុន ម៉ាណែត និងពិធីការិនីខាងលើ បានច្រានចោលការលើកឡើង ថាជារឿងមិនពិត។
ការឡើងតំណែងជាមេបញ្ជាការកងទ័ពជើងគោក បាននាំឱ្យលោក ហ៊ុន ម៉ាណែត ទទួលបានបន្ថែមនូវការគ្រប់គ្រងដោយឡែកទៅលើបណ្ដាកងពលយុទ្ធសាស្ត្រសន្តិសុខសំខាន់ៗចំនួន៥ ដែលពីមុនធ្លាប់ស្ថិតនៅក្រោមបញ្ជាផ្ទាល់របស់អគ្គបញ្ជាការដ្ឋានកងយោធពលខេមរភូមិន្ទ។
លោក ផៃ ស៊ីផាន អ្នកនាំពាក្យរដ្ឋាភិបាលកម្ពុជាបាននិយាយថា ការលើកឡើងរបស់លោកនាយករដ្ឋមន្ត្រី ផ្អែកទៅលើការពិសោធនិងការអង្កេតផ្ទាល់ខ្លួនទៅលើគុណភាពការងារនៃកូនប្រុសច្បងរបស់លោក ដែលលោកបានបន្ថែមថាវានឹងពឹងផ្អែកលើសេរីភាពរបស់គណបក្សប្រជាជនកម្ពុជា ក្នុងការសម្រេចជ្រើសរើសបេក្ខភាពមេដឹកនាំបន្ទាប់របស់បក្សនិងជាតិ ក្រោមអ្វីដែលលោកហៅថា«ប្រជាធិបតេយ្យផ្ទៃក្នុងបក្ស»។
លោក ផៃ ស៊ីផាន បានប្រាប់ VOA តាមទូរស័ព្ទថា៖«ក៏ប៉ុន្តែដាច់ដោយឡែក យើងឃើញឯកឧត្ដម ហ៊ុន ម៉ាណែត មានអ្វីដែលគេហៅថា វិជ្ជាជីវៈ ជានាយទាហានដែលបានហ្វឹកហ្វឺនពីសហរដ្ឋអាមេរិក មានការទទួលវប្បធម៌ពីខាងលិច... ជាមួយហ្នឹង លោកក៏បានចំណាយពេលច្រើនជាមួយនឹងការងារជាតិ ការពារប្រទេសជាតិ»។
អ្នកនាំពាក្យរដ្ឋាភិបាលកម្ពុជា ក៏បានបញ្ជាក់ដែរថា ការបង្ហើបរបស់លោកនាយករដ្ឋមន្ត្រី មិនមែនជាការបង្ហាញអំពីការរៀបចំផ្ទេរអំណាចផ្ដាច់មុខណាមួយទៅឱ្យកូនចៅ បន្តវង្សត្រកូលនោះទេ ដ្បិតអីលោកថា របបសេរីពហុបក្សរបស់ជាតិនិងបក្សនឹងបន្តបើកឱ្យមានការពិចារណាជាបន្តទៅលើបេក្ខភាពមេដឹកនាំបន្តវេន។
«ចំពោះគណបក្សប្រជាជន យើងមានរបៀបរបបការងារក្នុងការវាយតម្លៃបេក្ខជនណាមួយឱ្យក្លាយទៅជាឥស្សរជននៅក្នុងការងាររបស់រដ្ឋ រាប់ទាំងរដ្ឋមន្ត្រីរហូតទៅដល់នាយករដ្ឋមន្ត្រី។ ដូច្នេះផ្ទៃក្នុងរបស់គណបក្សប្រជាជនតាមរយៈលទ្ធិប្រជាធិបតេយ្យ មានការព្រមព្រៀងនៃការបោះឆ្នោត ផ្ដល់នូវលទ្ធភាពដល់បេក្ខជនណាមួយ ក្លាយជានាយករដ្ឋមន្ត្រី ក្នុងការប្រកួតប្រជែងតាមរយៈការបោះឆ្នោតសកលនោះឯង»។
សម្រាប់អ្នកអត្ថាធិប្បាយនយោបាយ កញ្ញា លី ស្រីស្រស់ ការបង្ហើបរបស់លោកនាយករដ្ឋមន្ត្រីអំពីបេក្ខភាពមេដឹកនាំទៅថ្ងៃអនាគត មិនមែនជារឿងចម្លែក ឬជារឿងភ្ញាក់ផ្អើលអ្វីពេកនោះទេ ដោយថាការបង្ហើបរបស់លោក ហ៊ុន សែន នៅមានលក្ខណៈទូលាយ ដោយមិនបញ្ជាក់ថា«មេដឹកនាំមួយរូប»ចង់សំដៅទៅលើតំណែង«នាយករដ្ឋមន្ត្រី»ឬយ៉ាងណា។
«ខ្ញុំឃើញថា វាអត់មានអ្វីដែលលក្ខណៈថាជាការចម្លែកទេ ពីព្រោះថា អំណាចនៅក្នុងថ្ងៃអនាគតរបស់ប្រទេសកម្ពុជាហ្នឹង លោកនាយករដ្ឋមន្ត្រីរបស់យើងហ្នឹង អាចផ្ទេរទៅកាន់កូនគាត់ ឬក៏អ្នកណាដែលជាសាច់ឈាមស្និទ្ធរបស់គាត់អ៊ីចឹងទៅ»។
តែកញ្ញា លី ស្រីស្រស់ ថា បេក្ខភាពរបស់លោក ហ៊ុន ម៉ាណែត មានលទ្ធភាពនៅជួរមុខគេ ដោយសារតែការកាន់តួនាទីសំខាន់របស់លោក ក្នុងជួរយោធាកម្ពុជា ហើយកញ្ញាបន្ថែមថា បើលោកទៅគ្រប់គ្រងប្រទេសនាថ្ងៃអនាគត នឹងនាំឱ្យមានសេណារីយោមួយដែលយោធាមានតួនាទីកាន់តែសំខាន់ជាងមុនក្នុងកិច្ចការអភិបាលកិច្ចប្រទេស៕
ប្រភពពី VOA
ប្រភពពី VOA
© រក្សាសិទ្ធិដោយ thmeythmey.com
