ជាតិ
រយៈពេល៨ខែ មានពលរដ្ឋជាង៨លាននាក់ បានប្រើប្រាស់សេវាថែទាំសុខភាពនៅមណ្ឌលសុខភាព និងមន្ទីរពេទ្យរដ្ឋ រូបភាពពីក្រសួងសុខាភិបាល
× ភ្នំពេញ៖ ក្នុងរយៈពេល ៨ខែដើមឆ្នាំនេះ ប្រជាពលរដ្ឋចំនួន ៨,៥៧៣,៦៩០នាក់ បានប្រើប្រាស់សេវាថែទាំសុខភាព នៅតាមមណ្ឌលសុខភាព និងមន្ទីរពេទ្យរដ្ឋទូទៅប្រទេស។
ចំនួនទាំងអស់នោះ ផ្ដោតទៅការពិនិត្យពិគ្រោះជំងឺក្រៅ, អ្នកជំងឺសម្រាកព្យាបាល និងស្ត្រីសម្រាលកូន។ នេះបើតាមស្ថិតិនៃការប្រើប្រាស់សេវាថែទាំសុខភាព ដែលចេញផ្សាយដោយក្រសួងសុខាភិបាល។
ស្ថិតិនៃការប្រើប្រាស់សេវាថែទាំសុខភាពរបស់ពលរដ្ឋក្នុងរយៈពេល ៨ខែដើមឆ្នាំ២០១៨ គិតចាប់ពីខែមករា ដល់ខែសីហា បានបង្ហាញថា ពលរដ្ឋកម្ពុជាចំនួន ៨,៥៧៣,៦៩០នាក់ បានមកទទួលសេវាថែទាំសុខភាព នៅតាមមណ្ឌលសុខភាព និងមន្ទីរពេទ្យរដ្ឋទូទាំងប្រទេស។
បើតាមស្ថិតិខាងលើ ពលរដ្ឋចំនួន ៧,៧៥១,២៣៦នាក់ បានមកពិនិត្យពិគ្រោះជំងឺ និងពលរដ្ឋចំនួន៦៣៣,៦៩៤នាក់ផ្សេងទៀត បានមកសម្រាកព្យាបាល។ ដោយឡែក ស្ដ្រីសម្រាលកូន មានចំនួន ១៨៨,៧៦០នាក់ ក្នុងនោះ ៩៦,៦៤៣នាក់ សម្រាលកូននៅមណ្ឌលសុខភាព។
យោងតាមស្ថិតិដដែល ក្នុងចំណោមពលរដ្ឋចំនួន ៨,៥៧៣,៦៩០នាក់ ដែលមកប្រើប្រាស់សេវាថែទាំសុខភាពនេះ មានពលរដ្ឋចំនួន ១,៤៦០,០៦៥នាក់ ជាពលរដ្ឋក្រីក្រ ដោយពួកគេទទួលបានការគាំទ្រពីកម្មវិធីមូលនិធិសមធម៌ របស់រាជរដ្ឋាភិបាល៕
Tag:
ក្រសួងសុខាភិបាល
សុខភាព
© រក្សាសិទ្ធិដោយ thmeythmey.com