អគ្គលេខាបក្សកម្មុយនីស្តវៀតណាម ង្វៀន ភូជុង ត្រូវសភាជ្រើសរើសឲ្យធ្វើប្រធានាធិបតីថ្មី

អន្តរជាតិ

អគ្គលេខាបក្សកម្មុយនីស្តវៀតណាម ង្វៀន ភូជុង ត្រូវសភាជ្រើសរើសឲ្យធ្វើប្រធានាធិបតីថ្មី

23, Oct 2018 , 3:42 pm

រូបភាព

រូបភាព៖ AFP

ដោយ: តន ចាន់រិទ្ធារ៉ា

សភាវៀតណាម នៅថ្ងៃទី២៣ ខែតុលានេះ បានបោះឆ្នោតគាំទ្រអគ្គលេខាធិការបក្សកុម្មុយនីស្តលោក ង្វៀន ភូជុង ជាប្រធានាធិបតីថ្មីជំនួសលោក ជិន ដៃគ័ង ដែលបានបាត់បង់ជីវិតដោយសារជំងឺ។ លោក ង្វៀន ជាបេក្ខភាពតែមួយគត់ដែលស្នើដោយបក្សកាន់អំណាច ហើយលោកស្បថចូលកាន់តំណែងបន្ទាប់ពីការបោះឆ្នោតនេះ។ លោក ង្វៀន ក្លាយជាមេដឹកនាំវៀតណាមដំបូងគេដែលកាន់តំណែងលេខាបក្សផង និងជាប្រធានាធិបតីផង ក្រោយមរណភាពរបស់លោកប្រធាន ហូ ជីមិញ ។

ដោយសំឡេងគាំទ្រលើសលប់ អគ្គលេខាធិការបក្សកុម្មុយនីស្តវៀតណាម ង្វៀន ភូជុង បានក្លាយជាប្រធានាធិបតីថ្មីរបស់ប្រទេសអាស៊ីអាគ្នេយ៍មួយនេះ។ នេះបើតាមទីភ្នាក់ងារព័ត៌មាន AFP ។ នាកិច្ចប្រជុំសភាដែលចាប់ផ្តើមពីថ្ងៃ ២២ ខែតុលា លោក ង្វៀន ជាបេក្ខភាពតែមួយគត់សម្រាប់ជំនួសតំណែងលោក ជិន ដៃគ័ង ដែលស្លាប់ដោយជំងឺសាហាវកាលពីចុងខែកញ្ញាកន្លងមក។ មរណភាពរបស់លោក ជិន ធ្វើឲ្យមានការប្រែប្រួលតុល្យភាពអំណាចក្នុងនយោបាយវៀតណាម។

នៅវៀតណាមដែលអនុវត្តតាមប្រព័ន្ធនយោបាយបែបកុម្មុយនីស្ត អំណាចត្រូវបានបែងចែកជាសសរស្តម្ភចំនួនបួន គឺអគ្គលេខាធិការបក្ស ប្រធានាធិបតី នាយករដ្ឋមន្ត្រី និងប្រធានរដ្ឋសភា ហើយដែលអាចត្រួតពិនិត្យគ្នាទៅមកដែរ។ ខណៈប្រធានាធិបតីមានឥទ្ធិពលតិចជាងគេនោះ ការក្រសោបតំណែងម្ដងពីរបែបនេះ ធ្វើឲ្យលោក ង្វៀន កាន់តែមានអំណាចខ្លាំង ស្របពេលដែលលោកកំពុងព្យាយាមបោសសម្អាតអ្នកប្រឆាំងនោះ។

យុទ្ធសាស្ត្រនយោបាយរបស់លោក ង្វៀន ធ្វើឲ្យគេប្រដូចលោកទៅនឹងមេដឹកនាំចិនសព្វថ្ងៃ លោក ស៊ី ជិនភីង ដែលក្ដាប់អំណាចតែម្នាក់ឯងពេញដៃ។ យ៉ាងណាមិញ ការក្ដាប់អំណាចរបស់លោក ង្វៀន ទំនងជាពិបាកខ្លាំង ហើយក៏ទំនងជាមិនអាចមាអំណាចដូចលោក ស៊ី នៅចិនដែរ។ នេះក៏ព្រោះតែបរិបទនយោបាយវៀតណាម ត្រូវបានចងភ្ជាប់ដោយការអនុវត្តគោលការណ៍តុល្យភាពអំណាច ដែលការណ៍នេះតម្រូវឲ្យលោក ង្វៀន ជជែកជាមួយផ្ទៃក្នុងបក្សផង មុនសម្រេចចិត្តអ្វីមួយ។

អ្វីគួរឲ្យកត់សម្គាល់ ជាមួយនឹងការកើនឡើងអំណាច លោក ង្វៀន នឹងបង្កើនយុទ្ធនាការបោសសម្អាតអំពើពុករលួយ និងក្រុមប្រឆាំងទៀតផង។ តាមរបាយការណ៍របស់អង្គការឃ្លាំមើលសិទ្ធិមនុស្ស (HRW) មនុស្ស១១៩នាក់ ត្រូវបានចាប់ឃុំខ្លួនតាំងពីខែមករាមកលើករណីរិះគន់រដ្ឋាភិបាល ចូលរួមក្នុងការប្រមូលផ្ដុំតវ៉ា ឬក៏ចូលដៃជាមួយក្រុមសកម្មជននយោបាយដែលជាគូប្រជែងរបស់បក្សកុម្មុយនីស្តវៀតណាម។

សូមបញ្ជាក់ថា លោក ង្វៀន បានក្លាយជាអគ្គលេខាធិការបក្សនៅឆ្នាំ២០០១ និងជាប់ឆ្នោតម្ដងទៀតនៅឆ្នាំ២០១៦ ខណៈមានការប្រជែងអំណាចពីអតីតនាយករដ្ឋមន្ត្រី ង្វៀន តាន់យុង ។ ចុងក្រោយលោក ង្វៀន តាន់យុង ក៏ត្រូវបង្ខំឲ្យដកខ្លួនក្នុងការប្រជែងអំណាចផ្ទៃក្នុងបក្សកុម្មុយនីស្តវៀតណាម។ យ៉ាងណាមិញ មានការលើកឡើងជាច្រើនដែរថា លោក ង្វៀន អាចមិនកាន់តំណែងនេះរហូតឡើយ ឬហួសពីការបោះឆ្នោតរើសមេដឹកនាំថ្មីនៅឆ្នាំ២០២១ ឡើយ។