នារយៈពេលចុងក្រោយនេះ កម្ពុជាបានក្លាយទីតាំងនៃការហ្វឹកហាត់របស់កីឡាករបរទេសមួយចំនួនជាពិសេសផ្នែកយុទ្ធគុណចម្រុះ។ អ្វីដែលគួរឲ្យកត់សម្គាល់នោះ Phoe Thaw កីឡាករមីយ៉ាន់ម៉ាដែលកំពុងលេចធ្លោ បានទុករាជធានីភ្នំពេញជាទីតាំងនៃការបំពេញវិជ្ជាគុណរបស់ខ្លួន ខណៈនាថ្ងៃសុក្រ ទី២៦ ខែតុលា ខាងមុខនេះ គេត្រូវតទល់ជាមួយកីឡាករម៉ាឡេស៊ី Keanu Subba ក្នុងព្រឹត្តិការណ៍ ONE: PURSUIT OF GREATNESS នៅកីឡដ្ឋាន Thuwunna Indoor Stadium ក្រុងយ៉ាំងហ្គោន ប្រទេសមីយ៉ាន់ម៉ា។
នារយៈពេល២ឆ្នាំមកហើយ កីឡាករមីយ៉ាន់ម៉ា Phoe Thaw តែងតែដំណើរចុះឡើងៗមកភ្នំពេញដើម្បីមកបោះជំរុំហ្វឹកហាត់ ហើយបច្ចុប្បន្ន កីឡាករដែលមានរហស្សនាមថា Bushido រូបនេះ ក្លាយជាអ្នកជំនាញខាងវាយគូប្រកួតឲ្យសន្លប់ ថែមទៀតផង។
កីឡាប្រដាល់វ័យ ៣៣ ឆ្នាំរូបនេះបាននិយាយថា៖ «ជាធម្មតាខ្ញុំមកហ្វឹកហាត់នៅភ្នំពេញក្នុងមួយឆ្នាំម្តង មុនការប្រកួតនីមួយៗ។ កាលខ្ញុំមកកម្ពុជាដំបូងគឺនៅឆ្នាំ២០១៦ ហើយកន្លែងហ្វឹកហាត់នៅស្រុកខ្មែរមានការវិវឌ្ឍន៍ច្រើនកំឡុងច្រើនឆ្នាំមកនេះ។ វាមានភាពខុសគ្នាខ្លាំងតែម្តង»។
ដោយមានការហ្វឹកហាត់ជាមួយលោកគ្រូគុនខ្មែរ និងជាមួយលោក ចាន់ រតនា កីឡាករប្រចាំ One Championship ផងដែរនោះ Phoe Thaw កំពុងបន្តព្យាយាមស្វែងយល់បន្ថែមទៀតពីក្បាច់គុនប្រដាល់ចម្រុះរបស់ខ្លួន ដោយមានជំនួយពីក្រុមកីឡាករខ្មែរកំពូល។
លោក Lorenzo Lanzafame គ្រូបង្វឹកផ្ទាល់ខ្លួនដែលមានមូលដ្ឋាននៅភ្នំពេញកំពុងជួយកីឡាករមីយ៉ាន់ម៉ារូបនេះ ក្នុងការរៀបចំហ្វឹកហាត់រាងកាយទូទៅ រីឯប្រធានសហព័ន្ធកីឡាជឺជីតស៊ូកម្ពុជា (Jiu Jitsu Federation of Cambodia) លោក ខូវ វិវឌ្ឍនា (Vivaddhana Khaou) បានជួយបង្រៀន Pheu Thaw ខាងវិធីសាស្ត្រចាប់បោក។ ជាមួយគ្នានេះ លោក ចាន់រតនា ដែលជាកីឡាករពូកែវៃឈរ ក៏ជាដៃគូហ្វឹកហ្វឺនដ៏ជិតស្និតផងដែរ។
Phoe Thaw ថ្លែងថា «ខ្ញុំមានទំនុកចិត្តខ្លាំងក៏ដោយសារបានហ្វឹកហាត់នៅភ្នំពេញ។ យើងតែងតែខ្លាំងរឹងមាំហើយសប្បាយជានិច្ច»។
នារយៈពេលពីរបីឆ្នាំកន្លងមក អ្នកចម្បាំងមាឌស្តើងរូបនេះ បានកសាងកេរ្តិ៍ឈ្មោះ មិនត្រឹមតែក្នុងទឹកដីខ្លួនប៉ុណ្ណោះទេ តែថែមទាំងល្បីល្បាញមកដល់កម្ពុជាទៀត ដោយសារតែគេពូកែធ្វើឲ្យហ្វូងអ្នកមើលកញ្ជ្រោលពេញចិត្តតាមរយៈបំបាក់គូប្រគួត ៥នាក់ ក្នុងចំណោម ៦នាក់ ឲ្យសន្លប់ត្រឹមទឹកទី ១ ប៉ុណ្ណោះ។
នៅថ្ងៃសុក្រខាងមុខនេះ លោក ភូ ថាវ នឹងឡើងដល់ដំណាក់កាលដ៏សំខាន់មួយទៀតនៅក្នុងអាជីពរបស់ខ្លួន ប៉ុន្តែគាត់មានសភាពស្ងប់ធម្មតា ដោយគាត់ដឹងថាគាត់បានឈានដល់កម្រិតថ្មីមួយទៀតក្នុងអំឡុងពេលមួយខែនៅភ្នំពេញ។
Phoe Thaw និយាយយ៉ាងមានទំនុកចិត្តថា៖ «ខ្ញុំនឹងប្រឹងប្រែងឲ្យអស់ពីសមត្ថភាពក្នុងការប្រកួតមួយនេះ។ ខ្ញុំមិនខ្វល់ពីលទ្ធផលយ៉ាងណានោះទេ ខ្ញុំនឹងធ្វើឲ្យបានល្អបំផុត។ ខ្ញុំជឿជាក់លើខ្លួនឯងថាខ្ញុំនឹងទទួលជោគជ័យ នឹងបង្កើតកេរ្តិ៍ដំណែលដ៏អស្ចារ្យមួយ»៕
អត្ថបទ៖ Matias Andre