អន្តរជាតិ
ហ្វីលីពីនបើកកោះឋានសួគ៌ Boracay ទទួលភ្ញៀវទេសចរឡើងវិញ ក្រោយសម្អាតអស់ប្រាំមួយខែ
× រដ្ឋាភិបាលហ្វីលីពីនចាប់ផ្តើមបើកកោះឋានសួគ៌ Boracay ឲ្យភ្ញៀវទេសចរចូលកម្សាន្តឡើងវិញ បន្ទាប់ពីត្រូវបានបិទបណ្តោះអាសន្នប្រាំមួយខែដើម្បីដោះស្រាយបញ្ហាបំពុលឆ្នេរនិងសមុទ្រ។ ក្រុងម៉ានីលសម្រេចកំណត់ចំនួនភោជនីយដ្ឋាន និងសណ្ឋាគារ ហើយលែងឲ្យមានកាស៊ីណូ, ការប្រើប្រាស់ថង់ប្លាស្ទិក, ជក់បារី និងការជប់លាងលើឆ្នេរដូចមុនទៀតដែរ។ក្រោយត្រូវបានរដ្ឋាភិបាលបិទបណ្តោះអាសន្នចាប់ពីខែមេសា កោះឋានសួគ៌ Boracayដ៏ល្បីល្បាញនៅហ្វីលីពីនចាប់ផ្តើមទទួលភ្ញៀវឡើងវិញហើយនៅសប្តាហ៍នេះ។ ការបើកដំណើរការឡើងវិញនេះធ្វើឡើងដោយមានការអនុវត្តបទបញ្ញត្តិតឹងរ៉ឹងហាមឃាត់សកម្មភាពមួយចំនួនផង។
យោងតាមទីភ្នាក់ងារព័ត៌មាន AFP Boracay ការសម្រេចផ្អាកឲ្យភ្ញៀវចូលមួយរយៈនេះគឺ ដើម្បីដោះស្រាយបញ្ហាបំពុលឆ្នេរ និងសមុទ្រដែលបង្កឡើងដោយការអភិវឌ្ឍមិនសមប្រកប និងហួសហេតុនៅទីនោះ។ ចំនួនភ្ញៀវច្រើនហួសហេតុ ការបង្ហូរទឹកស្អុយ និងសកម្មភាពអាជីវកម្មកាស៊ីណូ ភោជនីយដ្ឋាន និងសណ្ឋាគាររួមជាមួយការសាងសង់ផងនោះធ្វើឲ្យបញ្ហាទាំងនោះកើតឡើង។
រដ្ឋមន្ត្រីក្រសួងទេសចរណ៍ហ្វីលីពីន Bernadette Romulo-Puyat បានអះអាងថា តាមការណែនាំរបស់ប្រធនាធិបតី រ៉ូឌ្រីហ្គោ ឌូទើតេ ធានាថា ដោយការដំណើរការទទួលអ្នកទេសចរឡើងវិញនេះ ចំនួនភោជនីយដ្ឋាន និងសណ្ឋាគារនឹងមានតិចជាងមុននៅលើកោះ។ សូមទាញការចាប់អារម្មណ៍បន្តិចដែរថា សណ្ឋាគារនិងភោជនីយដ្ឋាននៅលើកោះជិត ៤០០ឯណោះត្រូវបានរដ្ឋាភិបាលបិទចោល ដោយសារពួកគេបំពានច្បាប់ការពារបរិស្ថានពេលធ្វើអាជីវកម្មកន្លងមកនេះ។
លោកស្រីនិយាយថា បន្ថែមលើវិធានការខាងលើនេះ អាជ្ញាធរហ្វីលីពីនក៏កំណត់ទទួលអ្នកទេសចរត្រឹម ១៩២០០នាក់ឲ្យចូលមកកម្សាន្តក្នុងពេលតែមួយ ហើយបម្រាមជក់បារី ការប្រើប្រាស់ថង់ប្លាស្ទិក និងការជប់លៀងលើឆ្នេរត្រូវអនុវត្តយ៉ាងតឹងតែងផងដែរ។ ចំណែករាល់កីឡាលេងក្នុងទឹកមិនត្រូវបានអនុញ្ញាតឲ្យមានទៀតទេ លើកលែងតែការហែលទឹកប៉ុណ្ណោះ។
រដ្ឋមន្ត្រីរូបនេះបន្តថា រឿងសំខាន់ជាងគេនោះគឺ វានឹងគ្មានវត្តមានកាស៊ីណូដែលជាប្រភពបំពុលធំមួយនៅទីនោះទៀតឡើយ។ រដ្ឋាភិបាលហ្វីលីពីនសម្រេចលុបចោលអាជ្ញាបណ្ណដែលធ្លាប់ផ្តល់ឲ្យក្រុមហ៊ុនចំនួនបីដែលបានដំណើរការនៅទីនោះ តាមបំណងប្រធានាធិបតី រ៉ូឌ្រីហ្គោ ឌូទើតេ។ វិធានការនេះជាការចាប់ផ្តើមនៃវប្បធម៌ទេសចរណ៍និរន្តរភាពនៅហ្វីលីពីន ហើយទិសដៅទេសចរណ៍ផ្សេងទៀតនៅហ្វីលីពីននឹងត្រូវការថែទាំនិងស្ថិតក្រោមបម្រាមស្រដៀងទាំងនេះដែរ។
តាមពិតទៅកោះ Boracay ដែលមានទំហំប្រហែល ១០០០ហិកតា ត្រូវបានគេចាត់ទុកជាទិសដៅទេសចរណ៍មួយក្នុងចំណោមទិសដៅដែលមានឆ្នេរល្អបំផុតលើលោក។ ក្នុងមួយឆ្នាំៗហ្វីលីពីនរកចំណូលបានប្រហែល មួយពាន់លានដុល្លារឯណោះពីកោះឋានសួគ៌នេះ៕
Tag:
ហ្វីលីពីន
Boracay
បរិស្ថាន
កាស៊ីណូ
© រក្សាសិទ្ធិដោយ thmeythmey.com