អន្តរជាតិ
បងធំអាស៊ានឥណ្ឌូណេស៊ីបានទិន្នផលត្រីខ្ពស់ជាងគេ បន្ទាប់ពីប្រើធម៌ក្តៅប្រឆាំងទូកនេសាទខុសច្បាប់បរទេស
× រដ្ឋាភិបាលក្រុងហ្សាការតា បានប្រកាសពីភាពជោគជ័យរបស់ខ្លួនក្នុងការអនុវត្តវិធានការក្តៅប្រឆាំងបទល្មើសនេសាទ ពិសេសលើក្រុមអ្នកនេសាទបរទេសខុសច្បាប់។ ការណ៍ ដែលក្រុងហ្សាការតា អាចហ៊ានអះអាងបែបនេះ ដោយសម្អាងលើការធ្លាក់ចុះ នៃបទល្មើស ខណៈទិន្នផលនេសាទ និងចំណូលជាតិ កាន់តែឡើងខ្ពស់ជាងមុន។
នាកិច្ចប្រជុំសន្តិសុខរបស់ប្រទេស លោកស្រីរដ្ឋមន្ត្រីកិច្ចការដែនសមុទ្រ និងនេសាទ Susi Pudjiastuti បានលើកឡើងថា គិតចាប់ពីរដ្ឋបាលដឹកនាំរបស់រដ្ឋាភិបាលបច្ចុប្បន្ន អនុវត្តវិធានការតឹងរឹងប្រឆាំងក្រុមទូកនេសាទបរទេសក្នុងឆ្នាំ២០១៥មក សមិទ្ធផលនៃឧស្សាហកម្មនេសាទជាតិ បានមានភាពល្អប្រសើរជាងពេលណាទាំងអស់។ នេះបើយោងតាមការចុះផ្សាយរបស់សារព័ត៌មានឥណ្ឌូណេស៊ី Jakarta Post នៅថ្ងៃ២២ តុលាកន្លងទៅ។
តាមប្រភពព័ត៌មានដដែលនោះ លោកស្រីរដ្ឋមន្ត្រី បានលើកឡើងថា ទិន្នផលនេសាទ បានកើនឡើងជាមធ្យម ១២.៥ លានតោន ក្នុងមួយឆ្នាំ ដែលចំនួននេះ កើនឡើងគួរកត់សម្គាល់ បើធៀបនឹងតួលេខមុនឆ្នាំ២០១៥ ដែលមានត្រឹម ៧.១ លានតោនប៉ុណ្ណោះ។ តួលេខ (១២.៥ លានតោន) នេះផងដែរ ត្រូវបានលោកស្រី អះអាង ជាចំនួនខ្ពស់បំផុតហើយ នៃទិន្នផលនេសាទ បើធៀបនឹងបណ្តាប្រទេសអាស៊ីអាគ្នេយ៍។
ជាមួយគ្នានេះផងដែរ លោកស្រីរដ្ឋមន្ត្រី ក៏បាននិយាយដោយប្រយោលថា ទន្ទឹមនឹងការកើនឡើងរបស់ឥណ្ឌូណេស៊ី ថៃ និងវៀតណាម បែរជាធ្លាក់ចុះគួរកត់សម្គាល់គិតចាប់ពីឆ្នាំ២០១៥មក។ « ដូច្នេះ ឥឡូវ យើង អាចសន្និដ្ឋានបានដោយខ្លួនឯងហើយថា ប្រភពត្រីនេសាទ របស់ប្រទេសទាំងពីរនេះ មកពីណា»។ នេះ គឺជាការលើកឡើងបែបបញ្ឆិតបញ្ឆៀងរបស់លោកស្រីរដ្ឋមន្ត្រីទៅកាន់ប្រទេសជិតខាង។
គួរជម្រាបផងដែរថា ចាប់ពីឆ្នាំ២០១៥មក រដ្ឋាភិបាលរបស់លោកប្រធានាធិបតីឥណ្ឌូណេស៊ី Joko Widodo បានប្រកាសចាត់វិធានតឹងរឹងបំផុតប្រឆាំងនឹងបទល្មើសនេសាទ ពិសេសនោះក្រុមអ្នកនេសាទបរទេសតែម្តង។ វិធានការ ដែលឥណ្ឌូណេស៊ី បានអនុវត្តខ្លាំងនោះគឺ ការពន្លិច និងដុតកម្ទេចទូតនេសាទបរទេសតែម្តង។ កន្លងមក ទូកនេសាទខុសច្បាប់បរទេស ដែលឥណ្ឌូណេស៊ី បានរឹបអូសច្រើនជាងគេ មានប្រភពមកពីម៉ាឡេស៊ី ថៃ និងវៀតណាមជាដើម។
សម្រាប់លោកស្រីរដ្ឋមន្ត្រី ការបង្ក្រាបតឹងរឹងនឹងទូកនេសាទបរទេសបែបនេះ មិនមែនមានន័យថា ឥណ្ឌូណេស៊ី បិទផ្លូវមិនឲ្យបរទេសមកនេសាទនៅឥណ្ឌូណេស៊ីនោះទេ ក៏ប៉ុន្តែលោកស្រី សង្កត់ធ្ងន់ថា បរទេសអាចមកវិនិយោគលើវិស័យនេសាទឥណ្ឌូណេស៊ីបាន តាមរយៈការបើក ឬដំណើរការក្រុមហ៊ុននៅក្នុងទឹកដីឥណ្ឌូណេស៊ីស្របតាមច្បាប់៕
© រក្សាសិទ្ធិដោយ thmeythmey.com