អន្តរជាតិ
ចិនចាត់ទុកការចោទថាខ្លួនលួចស្ដាប់ការសន្ទនាលោក ត្រាំ ជារឿងក្លែងបន្លំ
រូបភាព The White House - Copy
×![]()
ដោយ: តន ចាន់រិទ្ធារ៉ា
ក្រុងប៉េកាំង នៅថ្ងៃទី២៥ ខែតុលា បានទាត់ចោលអត្ថបទមួយរបស់កាសែតអាមេរិក The New York Time ដែលចោទខ្លួនថា បានលួចស្ដាប់ការនិយាយតាមទូរសព្ទរបស់ប្រធានាធិបតីអាមេរិក ដូណាល់ ត្រាំ ។ លោក ត្រាំ ផ្ទាល់ ក៏បដិសេធព័ត៌មាននេះដែរ។ ដោយស្រង់របាយការណ៍របស់ចារកម្មអាមេរិក កាសែតនេះសរសេរថា ចិនបានលួចស្ដាប់លោក ត្រាំ ញឹកញាប់ដើម្បីរកព័ត៌មានសំខាន់ៗ។ ប៉េកាំងក៏ប្រាប់ឲ្យប្រធានាធិបតីអាមេរិក ប្រើទូរសព្ទចិនវិញ បើចង់ការពារការលួចស្ដាប់។
ជារឿងក្លែងបន្លំ។ នេះជាចម្លើយរបស់ក្រុងប៉េកាំងទៅនឹងអត្ថបទមួយរបស់កាសែតអាមេរិក The New York Time ជុំវិញរបាយការណ៍របស់ក្រុមចារកម្មអាមេរិកដែលអះអាងថា ចិន និងរុស្ស៊ីបានលួចស្ដាប់ទូរសព្ទឯកជនរបស់ប្រធានាធិបតី ដូណាល់ ត្រាំ ។ ក្រោយការចេញផ្សាយបែបនេះ លោក ត្រាំ វិញក៏បានហៅព័ត៌មាននេះជារឿងមិនពិត និងបកស្រាយថា លោកប្រើតែទូរសព្ទដែលអនុញ្ញាតដោយរដ្ឋាភិបាលប៉ុណ្ណោះ។
នៅក្រុងប៉េកាំង ក្នុងសន្និសីទសារព័ត៌មានថ្ងៃទី២៥ ខែតុលា លោកស្រី Hua Chunying អ្នកនាំពាក្យក្រសួងការបរទេសចិនបានចាត់ទុកអត្ថបទព័ត៌មានខាងលើ ជាការប្រឹងប្រែងរបស់មនុស្សមួយចំនួននៅអាមេរិកដើម្បីធ្វើជាម្ចាស់ពានសម្ដែងល្អជាងគេ។ ដោយចាត់ទុកព័ត៌មាននេះជារឿងក្លែងក្លាយ លោកស្រី Hua និយាយថា កាសែត The New York Times គួរដឹងថា ការណ៍ដែលខ្លួនចុះផ្សាយព័ត៌មានបែបនេះ នឹងក្លាយជាភស្តុតាងបង្ហាញពីការបង្កើតព័ត៌មានក្លែងបន្លំប៉ុណ្ណោះ។
ក្នុងន័យដឺដងឲ្យអាមេរិក អ្នកនាំពាក្យខាងលើបានស្នើឲ្យលោក ត្រាំ ប្ដូរទៅប្រើទូរសព្ទរបស់ក្រុមហ៊ុនចិនវិញ បើចង់ចៀសវាងការលួចស្ដាប់ណាមួយពីការប្រើទូរសព្ទរបស់អាមេរិក។ ទំនងចង់អួតពីគុណភាពផលិតផលចិន លោកស្រី Hua បានដៀមដាមទៀតថា៖ «ប្រសិនបើបារម្ភថា ទូរសព្ទ iPhone អាចមានអ្នកលួចស្ដាប់នោះ ពួកគេអាចប្រើទូរសព្ទ Huawei វិញបាន ហើយដើម្បីធានាពីសុវត្ថិភាពមែនទែននោះ ពួកគេគួរឈប់ប្រើផលិតទំនើបៗ ហើយផ្ដាច់ខ្លួនពីពិភពលោកទាំងមូលទៅ។»
តាមពិតទៅ លោក ត្រាំ មានទម្លាប់ប្រើប្រាស់ទូរសព្ទឯកជនរបស់លោក ដែលធ្វើឲ្យមន្ត្រីអាមេរិកជាច្រើនខ្វល់ខ្វាយយ៉ាងខ្លាំង។ សហគមន៍ចារកម្មរបស់អាមេរិកអះអាងជាច្រើនលើកថា ក្រុងប៉េកាំង និងក្រុងមូស្គូ ពិតជាលួចស្ដាប់ទូរសព្ទ iPhone របស់លោក ត្រាំ មែន ហើយព្យាយាមរកព័ត៌មាននានា ជាពិសេសគោលនយោបាយសំខាន់ៗរបស់អាមេរិក។
អតីតបុគ្គលិក និងមន្ត្រីអាមេរិកបច្ចុប្បន្ន សុទ្ធតែលើកឡើងស្របគ្នាថា ព័ត៌មានទាក់ទងជម្លោះពាណិជ្ជកម្ម គឺជាគោលដៅរបស់ចិន។ ក្នុងអត្ថបទព័ត៌មានរបស់កាសែតអាមេរកខាងលើ មន្ត្រីអាមេរិកបានបង្ហើបទៀតថា ក្រុងប៉េកាំងបង្កើតបញ្ជីឈ្មោះមួយដែលរួមបញ្ចូលបុគ្គលនិយាយទូរសព្ទជាប្រចាំជាមួយលោក ត្រាំ ក្នុងន័យអូសទាញពួកគេឲ្យជួយបញ្ចុះបញ្ចូលប្រធានាធិបតី៕
Tag:
ចិន
អាមេរិក
ដូណាល់ ត្រាំ
© រក្សាសិទ្ធិដោយ thmeythmey.com
