អន្តរជាតិ
លោក អាបេ ថា ជប៉ុន និងចិនមានភាពជាដៃគូ មិនមែនការគំរាមកំហែងគ្នាទេ នាយករដ្ឋមន្រ្តីចិន លី ខឹឈាំង ចាប់ដៃសមភាគីជប៉ុន ស៊ីនហ្សូ អាបេ (រូបភាព AFP)
× នាយករដ្ឋមន្ត្រីជប៉ុន ស៊ីនហ្សូ អាបេ និងនាយករដ្ឋមន្ត្រីចិន លី ខឹឈាំង នៅថ្ងៃទី២៦ ខែតុលា បានប្រកាសពីការពង្រីកកិច្ចសហប្រតិបត្តិការដើម្បីជំរុញទំនាក់ទំនងសេដ្ឋកិច្ចទ្វេភាគី។ ការប្រកាសធ្វើឡើង អំឡុងទស្សនកិច្ចរបស់លោក អាបេ នៅរដ្ឋធានីប៉េកាំង ដែលជាទស្សនកិច្ចលើកដំបូងរបស់ប្រមុខរដ្ឋាភិបាលជប៉ុននៅចិន។ មេដឹកនាំជប៉ុន និងចិនចាត់ទុកទំនាក់ទំនងទ្វេភាគីដែលកំពុងល្អប្រសើរ ជាកត្តាសំខាន់សម្រាប់ស្ថិរភាពក្នុងតំបន់។
កិច្ចព្រមព្រៀងពាណិជ្ជកម្មច្រើន៥០០ ត្រូវបានចុះហត្ថលេខានាដំណើរទស្សនកិច្ចរបស់នាយករដ្ឋមន្ត្រីជប៉ុន ស៊ីនហ្សូ អាបេ នៅទឹកដីចិនដែលចាប់ផ្ដើមនៅថ្ងៃទី២៥ ខែតុលា។ ជានាយករដ្ឋមន្ត្រីជប៉ុនទីមួយជាន់ទឹកដីចិនក្នុងរយៈពេល៧ឆ្នាំ ដំណើរទស្សនកិច្ចរបស់លោក អាបេ ធ្វើឡើងស្របពេលដែលទំនាក់ទំនងទ្វេភាគីជប៉ុន និងចិនល្អប្រសើរវិញ បន្ទាប់ពីល្អក់កករខ្លាំងជុំវិញជម្លោះទឹកដីនៅតំបន់សមុទ្រចិនខាងកើត។
លោក អាបេ ត្រូវបានសមភាគីចិនលោក លី ខឹឈាំង ស្វាគមន៍ខាងមុខមហាវិមានប្រជាជនក្នុងទីក្រុងប៉េកាំង មុននឹងបើកជំនួបចរចាផ្លូវការ។ ក្រោយជំនួបថ្ងៃទី២៦ ខែតុលា លោក លី បានប្រកាសពីការចុះកិច្ចព្រមព្រៀងពាណិជ្ជកម្មដ៏ច្រើនសន្ធឹកសន្ធាប់ដែលផ្ដោតលើកិច្ចសហប្រតិបត្តិការផ្នែកច្នៃប្រឌិតថ្មី ការការពារបរិស្ថាន សុខាភិបាល និងសង្គមកិច្ច។
ចិន និងជប៉ុន ក៏ឯកភាពលើការអនុវត្តឡើងវិញកិច្ចព្រមព្រៀងផ្លាស់ប្ដូររូបិយវត្ថុដែរ។ ទីភ្នាក់ងារព័ត៌មាន AFP ផ្សាយថា កិច្ចព្រមព្រៀងដ៏ច្រើននេះមានតម្លៃ២.៦ពាន់ដុល្លារ។
សូមបញ្ជាក់ថា នាដំណើរទស្សនកិច្ចដ៏កម្រនៅប៉េកាំង លោក អាបេ បាននាំយកប្រតិភូជិត១ពាន់នាក់មកពីបណ្ដាក្រុមហ៊ុនជាច្រើននៅជប៉ុន។ សម្រាប់បណ្ដាពាណិជ្ជករជប៉ុន ចិនដែលមានប្រជាជនជាង១.៣ពាន់លាននាក់ គឺជាទីផ្សារដ៏ធំមួយសម្រាប់ទំនិញរបស់ពួកគេ។ ឯចិនវិញក៏ត្រូវការបច្ចេកវិទ្យាទំនើបៗរបស់ជប៉ុន និងបច្ចេកទេសដ៏ជឿនលឿនរបស់ជប៉ុនដែរ។
នាសន្និសីទសារព័ត៌មាន លោក លី ដែលឈរអមដោយលោក អាបេ និយាយថា វាជាប្រយោជន៍សម្រាប់ប្រទេសទាំងពីរក្នុងការរក្សាទំនាក់ទំនងយូរអង្វែងប្រកបដោយស្ថិរភាព ហើយដែលនឹងផ្ដល់ប្រយោជន៍សម្រាប់ស្ថិរភាពតំបន់ដែរនោះ។ មេដឹកនាំចិន និងជប៉ុនក៏ឯកភាពមិនគំរាមកំហែងគ្នាទៅមក ហើយប្រើប្រាស់យន្តការដែលមានប្រយោជន៍ដើម្បីលុបបំបាត់ជម្លោះ ឬការខ្វែងគំនិតគ្នារវាងប្រទេសទាំងពីរ។
ប្រមុខរដ្ឋាភិបាលជប៉ុន ក៏បង្ហាញជំហរដូចគ្នានឹងសមភាគីចិនរបស់ខ្លួនក្នុងការបញ្ឈប់សកម្មភាពទាំងឡាយដែលជាការគំរាមកំហែងភាគីផ្សេងទៀត ព្រោះចិន និងជប៉ុនជាអ្នកជិតខាង និងជាដៃគូសហការគ្នា។ ក្នុងសន្និសីទខាងលើ លោក អាបេ បញ្ជាក់ថា ធម្មជាតិនៃទំនាក់ទំនងតូក្យូ និងប៉េកាំង បានផ្លាស់ប្ដូរពីការប្រកួតប្រជែងទៅកិច្ចសហប្រតិបត្តិការ ដែលបានចូលដល់ដំណាក់កាលថ្មី ហើយប្រទេសទាំងពីរចង់ពង្រីកឲ្យកាន់ធំថែមទៀត។
Tag:
ចិន
ជប៉ុន
ស៊ីនហ្សូ អាបេ
លី ខឹឈាំង
© រក្សាសិទ្ធិដោយ thmeythmey.com