បែលហ្ស៊ិកបានបញ្ជាក់នៅថ្ងៃព្រហស្បតិ៍ទី ២៥ ខែតុលាថា ខ្លួនត្រៀមទិញយន្តហោះចម្បាំងបំបាំងកាយ F-35 ពីអាមេរិក ជំនួសឲ្យការទិញយន្តហោះចម្បាំង Eurofighter Typhoon របស់អឺរ៉ុប ។ វាជាសញ្ញាមួយដែលបង្ហាញថា បំណងសហភាពអឺរ៉ុបក្នុងការកសាងវិស័យការពារជាតិផ្ទាល់ខ្លួនរួមគ្នានោះកំពុងរសាត់ឆ្ងាយបន្តិចម្តង។
បើមិនមានអ្វីប្រែប្រួលទេ នៅត្រឹមឆ្នាំ ២០២៣ ខែមុខរដ្ឋាភិបាលបែលហ្ស៊ិកនឹងចុះកិច្ចព្រមព្រៀងតម្លៃរាប់ពាន់លានដុល្លារជាមួយក្រុមហ៊ុនអាមេរិក Lockheed Martin ដើម្បីទិញយន្តហោះចម្បាំងគេចផុតរ៉ាដា F-35។ យន្តហោះ F-35 នេះអាចនឹងជំនួសយន្តហោះចម្បាំងចាស់ៗម៉ូដែល F-16 ដែលបែលហ្ស៊ិកកំពុងប្រើប្រាស់នោះ។
បើតាមការផ្សាយទីភ្នាក់ងារព័ត៌មាន AFP បែលហ្ស៊ិកបច្ចុប្បន្នជ្រើសរើសយកយន្តហោះចម្បាំងរបស់អាមេរិកជំនួសឲ្យយន្តហោះចម្បាំងរបស់អឺរ៉ុប Eurofighter Typhoon។ ប៉ុន្តែខាងក្រុមអ្នករិះគន់បានអះអាងថា ការងាកទៅទិញអាវុធពីអាមេរិកជំនួសផលិតផលអឺរ៉ុបជាសញ្ញាមិនល្អ ព្រោះសហភាពអឺរ៉ុបតែងអះអាងថា ខ្លួនចង់មានយុទ្ធសាស្ត្រនិងអំណាចយោធាឯករាជ្យ និងស្វ័យភាពនោះ។
តាមបណ្តាញសង្គម Twitter ក្រុមហ៊ុន Lockheed Martin បានចេញសេចក្តីថ្លែងការណ៍មួយដែរ ដោយប្រកាសថា ខ្លួនរំពឹងទៅបង្កើតកិច្ចព្រមព្រៀងជាមួយរដ្ឋាភិបាលបែលហ្ស៊ិក និងក្រុមហ៊ុនឧស្សាហកម្មបែលហ្ស៊ិកផងដែរនៅពេលអនាគត។
ប៉ុន្តែនាយករដ្ឋមន្ត្រីបែលហ្ស៊ិកលោក Charles Michel បានព្យាយាមសម្រួលស្ថានការណ៍ និងព្យាយាមច្រានចោលមតិរិះគន់បែលហ្ស៊ិកដែលនឹងចំណាយលុយទិញអាវុធអាមេរិកនេះដែរ។ ក្នុងសន្និសីទសារព័ត៌មានមួយនាថ្ងៃព្រហស្បតិ៍លោកបានពន្យល់ថា បែលហ្ស៊ិកតែងតែទិញអាវុធពីអាមេរិក និងអឺរ៉ុបដើម្បីបំពេញតម្រូវការយោធាក្នុងស្រុក ដោយមិនមែនទិញតែពីម្ខាងអត់ម្ខាងឡើយ។
នាយករដ្ឋមន្ត្រីខាងលើបន្ថែមថា បែលហ្ស៊ិកកំពុងបញ្ជាទិញយន្តហោះដ្រូន នាវាចម្បាំង ឧបករណ៍សម្អាតមីន និងរថយន្តយោធាក្រោមក្របខណ្ឌណាតូ និងបណ្តាពីប្រទេសអឺរ៉ុបផងដែរ។
«យន្តហោះចម្បាំង និងដ្រូនគឺរបស់អាមេរិក ហើយសម្ភារផ្សេងទៀតគឺនាំមកពីអឺរ៉ុប។ បែលហ្ស៊ិកបានផលចំណេញសេដ្ឋកិច្ចពីការទិញបែបនេះ»។ លោក Michel និយាយបែបនេះ។
រដ្ឋមន្ត្រីការបរទេសបែលហ្ស៊ិលលោក Didier Reynders បានអះអាងថា អាមេរិកអាចផ្តល់សព្វាវុធដែលមានគុណភាព និងតម្លៃល្អ ដែលវាជាមួយហេតុលមួយធ្វើឲ្យបែលហ្ស៊ិកចាប់ចិត្ត។
តាមពិតទៅ ប្រភេទយន្តហោះEurofighter ដែលមិនសូវទាក់ចិត្តបែលហ្ស៊ិកនេះ ត្រូវបានអភិវឌ្ឍដោយកិច្ចសហប្រតិបត្តិការរវាងក្រុមហ៊ុន Finmeccanica និងក្រុមហ៊ុន Airbus។ យ៉ាងណាក៏ដោយចុះ បារាំងដែលជាមេដឹកនាំអឺរ៉ុបនោះទំនងជាមិនសប្បាយចិត្តប៉ុន្មានទេដែលឃើញបែលហ្ស៊ិកសម្រេចចិត្តដោយមើលរំលងសព្វាវុធរបស់អឺរ៉ុបបែបនេះ។
គេនៅចាំបានថា បារាំង ក៏ដូចជាអាល្លឺម៉ង់កាលពីឆ្នាំមុនបានសម្រេចជំរុញឲ្យមានការដាក់ចេញនូវកិច្ចសហប្រតិបត្តិការអចិន្ត្រៃយ៍លើកិច្ចការការពារជាតិ (PESCO) ដើម្បីធ្វើយ៉ាងណាកាត់បន្ថយការពឹងពាក់លើអាមេរិកលើវិស័យការពារជាតិ៕