ជាតិ
ទឹកប្រាក់៣០លានដុល្លាររបស់ជប៉ុនផ្ដល់ឲ្យកម្ពុជា សម្រាប់គម្រោងការពារទឹកជំនន់ និងកែលម្អប្រព័ន្ធលូ ជំហានទី៤
រូបពីហ្វេសប៊ុកសាលារាជធានីភ្នំពេញ
×![]()
ដោយ: ថ្មីៗ
ភ្នំពេញ៖ ជប៉ុន បានផ្ដល់ថវិកា៣០លានដុល្លារអាមេរិក សម្រាប់គម្រោងការពារទឹកជំនន់ និងកែលម្អប្រព័ន្ធប្រឡាយលូ ជំហានទី៤ នៅក្នុងរាជធានីភ្នំពេញ។ កិច្ចសន្យាសាងសង់គម្រោងការពារទឹកជំនន់ និងកែលំអប្រព័ន្ធប្រឡាយលូក្នុងរាជធានីភ្នំពេញ ជំហានទី៤ ត្រូវបានចុះហត្ថលេខានៅទីក្រុងតូក្យូ ដោយលោក នួន ផារ័ត្ន អភិបាលរងរាជធានីភ្នំពេញ និងលោក Katsuhisa KIMURA នាយកចាត់ចែងទូទៅក្រុមហ៊ុន TOA Corporation នៅទីក្រុងតូក្យូ ប្រទេសជប៉ុន។
ទឹកប្រាក់សរុបប្រមាណ ៣០លានដុល្លាអាមេរិក ជាជំនួយឥតសំណងរបស់រដ្ឋាភិបាលជប៉ុន ដែលនឹងចាប់ផ្តើមអនុវត្តគម្រោង នៅចុងខែវិច្ឆិកា ឆ្នាំ២០១៨ខាងមុខ សម្រាប់ក្រុមហ៊ុនដែលទទួលបានការដេញថ្លៃនេះ។ នេះបើតាមទំព័រហ្វេសប៊ុករបស់សាលារាជធានីភ្នំពេញ។
គម្រោងដែលត្រូវអនុវត្ត រួមមាន៖ ទី១ ដាក់បណ្តាញលូមេ នៅក្នុងភូមិសាស្ត្រខណ្ឌទួលគោក ប្រវែង ៨,២គីឡូម៉ែត្រ ។ ទី២ ដាក់បណ្តាញលូមេ នៅក្នុងភូមិសាស្ត្រខណ្ឌដូនពេញ ប្រវែង ៤,៤គីឡូម៉ែត្រ ។ ទី៣ សាងសង់អាងស្តុកទឹកក្រោមដី និងសាងសង់ស្ថានីយ៍បូមទឹក នៅសួនច្បារមុខក្រុមប្រឹក្សាអភិវឌ្ឍន៍កម្ពុជា CDC ។ ទី៤ តម្លើងរបាមេកានិចស្វ័យប្រវត្តិ ដើម្បីប្រមូលសំរាមនៅមុខផ្លូវបង្ហូរទឹកនៅស្ថានីយ៍បូមទឹកចតុមុខ ព្រះគន្លង១ ព្រះគន្លង២ និងផ្សារចាស់ និងទី៥ ផ្តល់រថយន្តបូមទឹកចល័ត ចំនួន ២គ្រឿង។
គម្រោងការពារទឹកជំនន់ និងកែលម្អប្រព័ន្ធប្រឡាយលូ ជំហានទី៤ នេះ ធ្វើឡើងក្រោមកិច្ចសហប្រតិបត្តិការរវាងរាជរដ្ឋាភិបាលកម្ពុជា និងរដ្ឋាភិបាលនៃប្រទេសជប៉ុន តាមរយៈទីភ្នាក់ងារសហប្រតិបត្តិការអន្តរជាតិជប៉ុន JICA ៕
© រក្សាសិទ្ធិដោយ thmeythmey.com
