កីឡាអន្តរជាតិ
អន្តរជាតិ
Conte អាចនឹងឡើងដឹកនាំ Real តែ Lopetegui សង្ឃឹមក្លិបផ្តល់ឱកាសបន្ត
× Real Madrid អាចនឹងបញ្ចប់តំណែងអ្នកចាត់ការទូទៅលោក Julen Lopetegui នៅថ្ងៃចន្ទនេះ បន្ទាប់ពីចាញ់៣ប្រកួតជាប់គ្នានៅ La Liga ហើយតែងតាំងអតីតគ្រូ Chelsea លោក Antonio Conte ឡើងដឹកនាំជំនួសវិញ។ នេះបើតាមការផ្សាយរបស់ Goal.com។
ក្នុងជំនួប El Clasico នៅរាត្រីថ្ងៃទី២៨ ខែតុលា Real Madrid បានចាញ់ធ្ងន់ធ្ងររហូតដល់ទៅ ៥-១ ក្រោមថ្វីជើងក្រុម Barcelona នៅក្នុងទឹកដី Nou Comp។ បរាជ័យនេះ បានធ្វើឲ្យក្រុមរហស្សនាមស្តេចសដែលដឹកនាំដោយអ្នកចាត់ការថ្មីសញ្ជាតិអេស្ប៉ាញចាញ់៣ប្រកួតជាប់គ្នាក្នុងក្របខណ្ឌ La Liga គិតចាប់តាំងពីឆ្នាំ២០០៩មក។
ភ្លាមៗក្រោយបរជ័យនេះ នាយកប្រតិបត្តិរបស់ក្លិបមានមូលដ្ឋានក្នុងក្រុងម៉ាឌ្រីដគ្រោងបើកកិច្ចប្រជុំមួយនៅថ្ងៃចន្ទនេះ ដើម្បីពិភាក្សាជុំវិញតំណែងលោករបស់ Lopetegui។
ប្រភពពីក្លិប Real Madrid បានប្រាប់ Goal ថាពួកគេកំពុងសម្រេចចិត្ត ដោយលើកឡើងថាមិនអាចបន្តឲ្យក្រុមស្ថិតក្នុងស្ថានភាពបែបនេះតទៀតទេ។ ប្រភពដដែលអះអាងទៀតថា ប្រសិនក្លិបបញ្ចប់តំណែងអតីតគ្រូជម្រើសជាតិអេស្ប៉ាញ វ័យ៥២ឆ្នាំនេះមែន លោក Antonio Conte គឺជាបេក្ខភាពនាំមុខគេដើម្បីទៅកាន់ទឹកដី Bernabeu ខណៈអ្នកចាត់ការសញ្ជាតិអ៊ីតាលីកំពុងទំនេរពីការងារក្រោយចាកចេញពី Chelsea កាលពីចុងដូវកាល ២០១៧-២០១៨។
យ៉ាងណាក៏ដោយ បន្ទាប់ពីដឹកនាំមិនបានល្អតាំងបើករដូវកាលថ្មីមក និងថែមទាំងចាញ់គូប្រជែងធំ Barca នៅ Clasico រហូតដល់ទៅ ៥-១ នោះ លោក Lopetegui ក៏បានទទួលស្គាល់លទ្ធផលនេះ តែសង្ឃឹមថាលោកអាចនឹងត្រូវបានក្លិបផ្តល់ឱកាសឲ្យដឹកនាំបន្តទៀត។
លោកបានប្រាប់ក្រុមអ្នកកាសែតនៅ Catalonia ថា៖«ខ្ញុំមានអារម្មណ៍សោកស្តាយនៅពេលនេះ ប៉ុន្តែខ្ញុំនៅមានកម្លាំងពេញលេញដើម្បីរក្សាតួនាទីដឹកនាំក្រុមនេះបន្តទៀត។ នេះគឺជាបរាជ័យដ៏ធំមួយ ប៉ុន្តែខ្ញុំមានភាពរឹងមាំគ្រប់គ្រាន់ដើម្បីដឹងថាអ្វីៗអាចប្រែប្រួលបាន។ ផ្លូវនៅវែងឆ្ងាយទៀត ហើយខ្ញុំមានជំនឿចិត្តយ៉ាងខ្លាំងទៅលើកីឡាកររបស់ក្រុមនេះ»។
ជុំវិញព័ត៌មានទាក់ទិននឹងការបញ្ចប់តំណែងលោក Lopetegui ប្រធានក្រុម និងជាខ្សែការពារឆ្នើម Sergio Ramos អះអាងថាកីឡាកររបស់ Real ភាគច្រើនជំទាស់ពីការសម្រេចចិត្តនេះ ដោយលើកឡើងាថា លទ្ធផលប៉ុន្មានប្រកួតនេះមិនអាចកំណត់ពីជោគវាសនារបស់គ្រូបង្វឹកនោះទេ៕
Tag:
បាល់ទាត់
Julen Lopetegui
Real Madrid
Antonio Conte
© រក្សាសិទ្ធិដោយ thmeythmey.com