សុខភាព
អន្តរជាតិ
ការបំពុលខ្យល់សម្លាប់កុមារប្រមាណ៦០ម៉ឺននាក់ក្នុង១ឆ្នាំ រូបភាព AFP
× អង្គការសុខភាពពិភពលោក (WHO) បានព្រមានពីគ្រោះថ្នាក់ដែលបង្កឡើងដោយការបំពុលខ្យល់ ជាពិសេសសម្រាប់សុខភាព និងការអភិវឌ្ឍន៍កុមារ។ តាមរបាយការណ៍កម្រាស់១៨០ទំព័ររបស់ស្ថាប័នមួយនេះ កុមារប្រមាណ៦០ម៉ឺននាក់លើពិភពលោក បាត់បង់ជីវិតជារឿងរាល់ឆ្នាំដោយសារការបំពុលខ្យល់បរិយាកាស។
«ការបំពុលខ្យល់ គឺជាគ្រោះថ្នាក់ដ៏ធំមួយសម្រាប់សុខភាពកុមារ»។ អង្គការសុខភាពពិភពលោកបានព្រមានយ៉ាងដូច្នេះ តាមរយៈរបាយការណ៍ដែលផ្សព្វផ្សាយកាលពីថ្ងៃទី២៩ ខែតុលា ក្រោយការបើកសន្និសីទអន្តរជាតិលើកដំបូងស្តីពីការបំពុលខ្យល់ ដែលរៀបចំនៅទីក្រុងហ្សឺណែវ ប្រទេសស្វ៊ីស។
លោក Tedros Adhanom Ghebreyesus អគ្គនាយកអង្គការ WHO បានអះអាងថា ខ្យល់កខ្វក់ កំពុងបំពុលកុមាររាប់លាននាក់ ក៏ដូចជាកំពុងបំផ្លាញអាយុជីវិតពួកគេផងដែរ។ ក្នុងរបាយការណ៍របស់ខ្លួន WHO បានលើកយកតឹងតាងវិទ្យាសាស្ត្រផ្សេង ដែលទាក់ទងនឹងគ្រោះថ្នាក់ដែលបង្កឡើងដោយការបំពុលខ្យល់ ជាពិសេសទៅលើក្រុមកុមារដែលងាយរងគ្រោះ។
របាយការណ៍បានបង្ហាញថា កុមារប្រមាណ៦០០ ០០០នាក់ដែលមានអាយុតិចជាង១៥ឆ្នាំ ក្នុងនោះ ៥៤៣ ០០០ដែលមានអាយុតិចជាង៥ឆ្នាំ បានស្លាប់ជារៀងរាល់ឆ្នាំនៅលើពិភពលោក ដោយសារផ្លូវដង្ហើម ពីព្រោះពួកគេរស់នៅក្នុងបរិយាកាសដែលពោរពេញទៅដោយភាពកខ្វក់។
ខ្យល់កខ្វក់ ភាគច្រើនកើតឡើងដោយសារការបញ្ចេញឧស្ម័នពីរថយន្ត សកម្មភាពឧស្សាហកម្ម ការអនុវត្តកសិកម្ម ការដុតកាកសំណល់ (ជាពិសេសនៅឥណ្ឌា) និងការហុយធូលី ដែលបង្កឡើងពីព្យុះខ្សាច់ (ជាពិសេសនៅមជ្ឈឹមបូព៌ា)។
ស្ត្រី និងកុមារដែលនៅក្នុងប្រទេសអភិវឌ្ឍន៍តិចតួច គឺជាអ្នករងគ្រោះច្រើនជាងគេ។ WHO បានកត់សម្គាល់ថា ថ្វីត្បិតភាពក្រីក្រ មានទំនាក់ទំនងយ៉ាងខ្លាំងទៅនឹងបញ្ហាបរិស្ថាន និងសុខុមាលភាព ប៉ុន្តែប្រទេសឧស្សាហកម្ម ក៏ប្រឈមខ្លាំងផងដែរ៕
© រក្សាសិទ្ធិដោយ thmeythmey.com