អង់គ្លេសប្រឹងបង្កើនទំនាក់ទំនងការទូតនៅបរទេស ពេលជិតលែងលះដាច់ស្រេចជាមួយសហភាពអឺរ៉ុប

អន្តរជាតិ

អង់គ្លេសប្រឹងបង្កើនទំនាក់ទំនងការទូតនៅបរទេស ពេលជិតលែងលះដាច់ស្រេចជាមួយសហភាពអឺរ៉ុប

31, Oct 2018 , 7:39 pm

រូបភាព

ប្រមុខការទូតអង់គ្លេស Jeremy Hunt (រូបភាព AFP)

ដោយ: តន ចាន់រិទ្ធារ៉ា

បើគ្មានការប្រែប្រួលអ្វីនោះ ចក្រភពអង់គ្លេស នឹងចាកចេញពីសហភាពអឺរ៉ុបជាផ្លូវការនៅថ្ងៃទី២៩ ខែមីនា ឆ្នាំ២០១៩ ។ ការចរចាលក្ខខណ្ឌលែងលះកំពុងធ្វើឡើងយ៉ាងសស្រាក់សស្រាំ ទោះជាភាគីទាំងសងមិនទាន់សម្រេចបានកិច្ចព្រមព្រៀងអ្វីក៏ដោយ។ ទោះលែងលះដាច់ឬមិនដាច់ក្ដី អង់គ្លេសបានត្រៀមខ្លួនរួចហើយក្នុងការពង្រឹងនយោបាយការបរទេសឯករាជ្យរបស់ខ្លួនលើឆាកអន្តរជាតិ និងដាក់ចេញចំណាត់ការមួយចំនួនដែរ។

៥ខែមុនចាកចេញពីសហភាពអឺរ៉ុប ចក្រភពអង់គ្លេសកំពុងរៀបចំជើងព្រួលក្នុងការអនុវត្តនយោបាយការបរទេសរបស់ខ្លួន ដោយមិនចាំបាច់មើលមុខអឺរ៉ុបទៀតឡើយ។ រដ្ឋមន្ត្រីការបរទេសអង់គ្លេស Jeremy Hunt នៅថ្ងៃទី៣០ ខែតុលា បានប្រកាសពីផែនការរបស់រដ្ឋាភិបាលក្នុងការពង្រីកបណ្ដាញទំនាក់ទំនងការទូតរបស់ខ្លួននៅជុំវិញពិភពលោក។ ក្រសួងការបរទេសនឹងរើសបុគ្គលិកថ្មីបន្ថែម និងត្រៀមបើកស្ថានទូតជាច្រើនដែរ។

បើតាមទីភ្នាក់ងារព័ត៌មាន AFP ដែលស្រង់យកសុន្ទរកថារបស់លោក Hunt អង់គ្លេសនឹងបង្កើតច្រវាក់បំបាំងកាយដើម្បីភ្ជាប់ប្រទេសប្រជាធិបតេយ្យ។ ជាលើកដំបូង មនុស្សដែលនៅក្រៅក្របខណ្ឌមន្ត្រីស៊ីវិល នឹងមានសិទ្ធិធ្វើជាអគ្គរាជទូតអង់គ្លេស ខណៈដែលក្រសួងការបរទេសចង់បង្កើនចំនួនមន្ត្រីទូតឲ្យបានច្រើនដល់ជិត១ពាន់នាក់ឯណោះ។ អ្វីគួរចាប់អារម្មណ៍ អង់គ្លេសនឹងបើកស្ថានបេសកកម្មប្រចាំអាស៊ាន និងបើកស្ថានទូតថ្មីនៅជីប៊ូទី។

នៅដើមឆ្នាំនេះ អង់គ្លេសបានប្រកាសរួចហើយនូវការបើកស្ថានទូតថ្មីនៅឆាដ និងនីហ្សេ និងតួនាទីផ្នែកការទូតចំនួន៩ទៀតនៅប្រទេសសមាជិក Commonwealth ដូចជាឡេសូតូ ស្វាស៊ីឡង់ រហូតដល់បាហាម៉ាស់ សាម័រ និងវ៉ានូទូដែរ។ ដោយឡែក ក្នុងចំណោមចំនួនបុគ្គលិកថ្មីដែលត្រូវជ្រើសរើស មានបុគ្គលិក៣៣៥នាក់នឹងធ្វើការនៅបរទេស ហើយស្របគ្នានោះ ក្រសួងនឹងបង្កើនការចំណាយដើម្បីបង្រៀនភាសាបរទេសដល់បុគ្គលិកនៅក្រៅប្រទេសដែរ។

ទន្ទឹមនឹងទិសដៅបង្កើនចំនួនបុគ្គលិកចេះនិយាយភាសាបរទេសពី៥០០នាក់ទៅដល់១ពាន់នាក់នោះ ក្រសួងការបរទេសអង់គ្លេសនឹងបង្កើនចំនួនភាសាបរទេសដែលត្រូវបង្រៀនឲ្យដល់៧០ភាសា។ ក្នុងនោះមានភាសាដែលនិយាយក្នុងប្រទេសតំបន់អាស៊ីកណ្ដាលនៅកៀហ្ស៊ីស៊ីស្ថាន និងកាហ្សាក់ស្ថាន ភាសា Shona នៅស៊ីមបាវ៉េ និងភាសា Gujarati នៅឥណ្ឌាជាដើម។

សព្វថ្ងៃនេះ អង់គ្លេសមានបេសកកម្មទូតចំនួន២៧៤ក្នុងប្រទេស និងតំបន់ចំនួន១៦៩ នៅជុំវិញពិភពលោក។ ក្រោយការពង្រីកបណ្ដាញរបស់ខ្លួន មន្ត្រីក្រសួងការបរទេសអង់គ្លេសបញ្ជាក់ថា អង់គ្លេសនឹងមានតំណាងប្រមាណ៨៣ភាគរយនៃសមាជិកអង្គការសហប្រជាជាតិទាំងអស់។ កាលពីឆ្នាំមុនអតីតរដ្ឋមន្ត្រីការបរទេស Boris Johnson បានរងការរិះគន់ខ្លាំងព្រោះចង់កាត់បន្ថយបុគ្គលិកទូតនៅប្រទេសដើម្បីពង្រឹងទំនាក់ទំនងជាមួយអឺរ៉ុបក្រោយការចាកចេញនៅឆ្នាំ២០១៩ ៕