ជាតិ
បទយកការណ៍ / បទសម្ភាសន៍
សង្គមជាតិ
វេជ្ជបណ្ឌិត៖ ការប្រើហិង្សា និង សម្តីអាក្រក់លើកុមារ ធ្វើឲ្យកុមារបាត់ភាពឆ្លាតវៃ វេជ្ជបណ្ឌិត សេង សាម៉ន
× ភ្នំពេញ៖ អូធីសឹម (Autism) ជាជំងឺដែលធ្វើឲ្យកុមារដែលមានអាយុ៣ឆ្នាំ មិនអាចលូតលាស់បានល្អដូចជា ការនិយាយ ការដើរ និងការចងចាំខ្សោយ។ ជំងឺនេះកើតឡើងដោយសារតែឱពុកម្តាយប្រើអំពើហិង្សាក្នុងគ្រួសារ និងប្រើពាក្យសម្តីអាក្រក់ទៅកាន់កូន ដែលនាំឲ្យកូនរងសម្ពាធធ្ងន់ធ្ងរ មិនអាចបង្កើនភាពឆ្ងាតវៃបានឡើយ។ នេះជាការលើកឡើងរបស់លោក សេង សាម៉ន វេជ្ជបណ្ឌិតនៃមន្ទីរព្យាបាលកុមារផ្កាឈូក។
នៅថ្ងៃទី២៧ ខែតុលា ឆ្នាំ២០១៨ លោកវេជ្ជបណ្ឌិត សេង សាម៉ន បានចូលរួមធ្វើជាវាគ្មិន ក្នុងសិក្ខាសាលាស្តីសុខភាពនិងការអភិវឌ្ឍខួរក្បាលកុមារ ដែលរៀបចំដោយវិទ្យុផ្កាឈូក នៅមជ្ឈមណ្ឌលសហប្រតិបត្តិការកម្ពុជា-ជប៉ុន (CJCC ) ដោយមានអ្នកចូលរួមប្រមានពី៤០០ទៅ៥០០នាក់។ ក្រោយបញ្ចប់សិក្ខាសាលានេះ លោកវេជ្ជបណ្ឌិត អនុញ្ញាតឲ្យសារព័ត៌មានថ្មីៗ សម្ភាសផ្តាច់មុខ ពីបញ្ហាសុខភាពនិងការអភិវឌ្ឍខួរក្បាលកុមារ។
លោកវេជ្ជបណ្ឌិត សេង សាម៉ន បានពន្យល់ថា ក្រៅពីប្រើអំពើហិង្សានិងសម្តីអសុរោះ វិបត្តិផ្លូវចិត្តរបស់ឪពុកម្តាយ ក៏ជាបញ្ហាមួយ ដែលបង្កឲ្យកូនតូច មានជំងឺអូធីសឹមផងដែរ ហើយនឹងធ្វើឲ្យកុមារ ដែលមិនទាន់ចេះដើរ ឬនិយាយ និងមានការចងចាំខ្សោយ មានជំងឺបាក់ទឹកចិត្ត ព្រមទាំងមានផលប៉ះពាល់ដល់ខួរក្បាល និងរាងកាយរបស់កុមារ។
សូមស្តាប់កិច្ចសម្ភាសរវាងកញ្ញា សៅ សុខអេង នៃសារព័ត៌មានថ្មីៗ និងលោក សេង សាម៉ន វេជ្ជបណ្ឌិតនៃមន្ទីរព្យបាលកុមារផ្កាឈូក ខាងក្រោមនេះ៖
«ជំងឺអូធីសឹម ក៏កើតឡើងលើទារកដែលនៅក្នុងផ្ទៃម្តាយផងដែរ។ មូលហេតុដោយសារឱពុកម្តាយមានឈាមមិនត្រូវគ្នា ទាក់ទងនឹងក្រម៉ូសូម ដែលឲ្យកុមារទើបនឹងកើតមានក្រូម៉ា ក៏អាចបណ្តាលឲ្យមានជំងឺអូធីសឹមផងដែរ។ សូម្បីការប្រើថ្នាំហួសហេតុពេកនោះ ក៏ជាផលប៉ះពាល់ការលូតលាស់របស់កុមារយ៉ាងធ្ងន់ធ្ងរដូចគ្នា»។ នេះជាការលើកឡើងរបស់លោក សេង សាម៉ន។
លោកវេជ្ជបណ្ឌិតរូបនេះ ណែនាំថា ដើម្បីជៀសវាងជំងឺដែលបណ្តាលឲ្យកុមារមានការលូតលាស់មិនល្អនោះ ឱពុកម្តាយគ្រប់រូបត្រូវយកចិត្តទុកដាក់ថែរក្សា និងចិញ្ចឹមកូនឲ្យបានល្អិតល្អន់ និងត្រូវបង្រៀនជំនាញពិសេសដល់កូនតាំងពីកូនបានចាប់កំណើត។ ទន្ទឹមនឹងនេះ ឱពុកម្តាយ ត្រូវនាំកូនទៅជួបវេជ្ជបណ្ឌិតឯកទេស ដើម្បីពិគ្រោះ និងព្យាបាលឲ្យបានទាន់ពេលវេលា។
លោក បញ្ជាក់ចុងក្រោយថា ខួរក្បាលកុមារចាប់ផ្តើមលូតលាស់នៅអាយុ៣ខែ ហើយកុមារដែលទើបកើតដល់អាយុ៥ឆ្នាំ ជាដំណាក់កាលដែលកុមារមានការចាប់យកបានលឿន និងធ្វើឲ្យកុមារមានភាពឆ្លាតវៃ ប៉ុន្តែ បើកុមារនោះមានសម្ពាធពីឱពុកម្តាយហើយ ទោះបីបង្រៀនអ្វីក៏ក្មេងនោះមិនចេះដែរ៕
Tag:
អប់រំ
សុខភាព
អូធីសឹម
សេង សាម៉ន
ម្តាយ
© រក្សាសិទ្ធិដោយ thmeythmey.com