ជាតិ
សង្គមជាតិ
អន្តរជាតិ
កុមារ ៩០ភាគរយលើពិភពលោកកំពុងរងគ្រោះដោយសារការបំពុលខ្យល់
×
ដោយ គី ចំណា
កុមារតូចៗដែលមានអាយុក្រោម១៥ឆ្នាំចំនួន១៨០០លាននាក់ ឬស្មើនឹង៩៣%នៃកុមារសរុបក្នុងពិភពលោកកំពុងតែរស់នៅក្នុងមជ្ឍដ្ឋានដែលសម្បូរទៅដោយការបំពុលបរិយាកាស។ ពួកគេប្រឈមនឹងគ្រោះថ្នាក់ដោយសារមានបញ្ហាសុខភាពផ្លូវដង្ហើម។
ចុងខែតុលាកន្លងទៅ អង្គការសុខភាពពិភពលោក (WHO) បានឲ្យដឹងថា គ្រាន់តែក្នុងឆ្នាំ២០១៦ កុមារប្រមាណ ប្រាំមួយសែនជុំវិញពិភពលោកបានបាត់បង់ជីវិតដោយជំងឺផ្លូវដង្ហើមបង្កឡើងពីកង្វក់បរិយាកាសនៅកន្លែងដែលពួកគេរស់នៅ។ បញ្ហាទាំងអស់នេះភាគច្រើនកើតមាននៅតាមប្រទេសក្រីក្រ និងប្រទេសដែលកំពុងអភិរឌ្ឍ។
របាយការណ៍អង្គការខាងលើបង្ហាញឲ្យឃើញផងដែរថា ស្ត្រីពពោះដែលស្រូបខ្យល់កខ្វក់ អាចធ្វើឲ្យកូនក្នុងផ្ទៃមានសុខភាពខ្សោយ និងមានសរីរាង្គមិនរឹងមាំដែលងាយកើតជំងឺផ្សេងៗ។ បញ្ហាជាចម្បងដែលអាចកើតមានដទៃទៀតមានដូចជា ភាពរអាក់រអួលនៃការលូតលាស់នៃប្រព័ន្ធប្រសាទ បញ្ហាផ្លូវដង្ហើមនិងសួត និងពេលខ្លះទៀតបញ្ហាបេះដូង និងឈាមថែមទៀត ។
អ្នកស្រីវេជ្ជបណ្ឌិត Tedros Adhanom Ghebreyesus នៃអង្គការសុខភាពពិភពលោកកត់សម្គាល់ដូច្នេះ ៖«កុមារជាច្រើននាក់កំពុងរស់នៅក្នុងការបំពុលពីខ្យល់មិនបរិសុទ្ធ។ វាពិបាកក្នុងការទទួលយកណាស់ ហើយកុមារទាំងនោះត្រូវរស់នៅក្នុងកន្លែងដែលមានខ្យល់អាកាសបរិសុទ្ធដើម្បីជួយជំរុញការលូតលាស់នៃរាងកាយរបស់ពួកគេឲ្យបានល្អ»។
ខណៈខ្យល់បរិយាកាសដែលមានក្រៅផ្ទះមិនបរិសុទ្ធ គេក៏សង្កេតឃើញផងដែរថា ខ្យល់ក្នុងផ្ទះមួយចំនួនក៏មានភាពកង្វក់ដែរដោយសារមានវត្តមានផ្សែង ឬធូលីដែលកើតចេញពីការដុតធ្យូងឬអុសចម្អិនអាហារដែរ។
ក្នុងសន្និសីទកាសែតនៅទីក្រុងហ្សឺណែវ នៅថ្ងៃទី៣០ខែតុលា អង្គការអន្តរជាតិនេះក៏បានអំពាវនាវទៅកាន់អង្គការក្រៅរដ្ឋាភិបាល ក្រសួងសុខាភិបាល ក្រសួងបរិស្ថាន និងភ្នាក់ងារពាក់ព័ន្ធលើពិភពលោក ឲ្យអនុវត្តសកម្មភាពនានាដើម្បីកាត់បន្ថយការបំពុលបរិយាកាស និងធានាសុខុមាលភាពរបស់កុមារនិងមនុស្សគ្រប់រូបលើពិភពលោកដែរ៕
© រក្សាសិទ្ធិដោយ thmeythmey.com