របាយការណ៍៖ ឥណ្ឌូណេស៊ី ជាប់ជាប្រទេសមានចិត្តសប្បុរសបំផុតរបស់ពិភពលោក

អន្តរជាតិ

របាយការណ៍៖ ឥណ្ឌូណេស៊ី ជាប់ជាប្រទេសមានចិត្តសប្បុរសបំផុតរបស់ពិភពលោក

04, Nov 2018 , 12:13 pm

រូបភាព

ដោយ:

របាយការណ៍របស់ក្រុមអ្នកស្រាវជ្រាវមានមូលដ្ឋាននៅអង់គ្លេស បានរកឃើញថា ប្រទេសឥណ្ឌូណេស៊ី ជាប្រទេស ដែលមានប្រជាជនចិត្តសប្បុរស និងអាចពឹងពាក់បានជាងគេរបស់ពិភពលោក។ ការវាយតម្លៃនេះ ធ្វើឡើងដោយផ្អែកទៅលើទិដ្ឋភាព នៃសកម្មភាពជាប្រចាំថ្ងៃចម្បងមួយចំនួន ក្នុងចំណោមប្រទេសជាង១០០របស់ពិភពលោក។

តាមរបាយការណ៍សន្ទស្សន៍ប្រចាំឆ្នាំ២០១៨ របស់មូលនិធិជំនួយសប្បុរសធម៌ (Charities Aid Foundation) ដែលចុះផ្សាយនៅចុងខែតុលាកន្លងទៅ ឥណ្ឌូណេស៊ី ស្ថិតនៅក្នុងលំដាប់កំពូលបំផុតក្នុងចំណោម១៤៦ប្រទេស ដែលមានចិត្តសប្បុរធម៌ ឬការផ្តល់អំណោយច្រើនបំផុតរបស់ពិភពលោក ខណៈអូស្ត្រាលី ស្ថិតនៅលំដាប់ទី២ ណូវែលហ្សេឡង់ លេខ ៣ និងអាមេរិក លេខ ៤។

តាមរបាយការណ៍កម្រាស់ ៤៤ទំព័រនោះ ការវាយតម្លៃចំណាត់ថ្នាក់នេះ ផ្នែកលើសូចនាករ ឬរង្វាស់ចម្បងមួយចំនួន ដែលឆ្លុះបញ្ចាំងពីឥរិយាបថសប្បុធម៌ ដោយភ្ជាប់ជាមួយនឹងសំណួរ៖«ថាតើ អ្នកបានធ្វើអ្វីខ្លះកាលពីខែកន្លងទៅ? អ្នកមានបានជួយជនប្លែកមុខ ឬជន អ្នកមិនស្គាល់ ដែលត្រូវការជំនួយទេ? អ្នកបានបរិច្ចាគប្រាក់សម្រាប់សម្បុធម៌ទេ? និងថាតើអ្នកបានស្ម័គ្រចិត្តក្នុងការងារសង្គមទេ?»

របាយការណ៍នេះ មានគោលដៅបង្ហាញ និងឆ្លុះបញ្ចាំង ថាតើប្រជាជនរបស់ប្រទេសណាមួយ ដែលមានការចំណាយ និងផ្សារភ្ជាប់សកម្មភាពរស់នៅរបស់ខ្លួនទៅនឹងកិច្ចការសប្បុរសធម៌ និងមនុស្សធម៌ច្រើនជាងគេ។ គួរបញ្ជាក់ផងដែរថា ៣ ឆ្នាំកន្លងទៀត មីយ៉ាន់ម៉ា ស្ថិតនៅក្នុងលំដាប់កំពូលនេះ ក៏ប៉ុន្តែដោយសារតែបញ្ហាវិបត្តិជនភៀសខ្លួន បានធ្វើឲ្យមីយ៉ាន់ម៉ាធ្លាក់ចុះចំណាត់ថ្នាក់វិញ។

ខាងក្រោមនេះ គឺជាចំណាត់ថ្នាក់ នៃប្រទេសទាំង១០ដប់ ដែលមានប្រជាជនសម្បុរសជាងគេ ក្នុងចំណោមប្រជាជន នៃប្រទេស ១៤៦ ក្នុងឆ្នាំ២០១៨៖

១. ឥណ្ឌូណេស៊ី

២. អូស្ត្រាលី

៣. ណូវែល សេឡង់

៤. អាមេរិក

៥. អៀរឡង់

៦. អង់គ្លេស

៧. សិង្ហបុរី

៨. កេនយ៉ា

៩. មីយ៉ាន់ម៉ា

១០. បារ៉ែន ៕