អន្តរជាតិ
អ្នកនាំពាក្យក្រសួងការបរទេសរុស្ស៊ី Maria Zakharova ថ្លែងទៅកាន់អ្នកសារព័ត៌មានក្នុងទីក្រុងម៉ូស្គូ។ រូបភាព៖ AFP
×![]()
ដោយ: VOA
សហរដ្ឋអាមេរិកនិងក្រុមតាលីបង់នឹងចូលរួមសន្និសីទពហុភាគីជាលើកទីមួយដែលរៀបចំឡើងដោយប្រទេសរុស្ស៊ីនៅថ្ងៃសុក្រនេះក្នុងទីក្រុងម៉ូស្គូ ដើម្បីពិភាក្សាស្វែងរកសន្តិភាព និងការផ្សះផ្សារជាតិក្នុងប្រទេសអាហ្វហ្គានីស្ថាន។
អ្នកនាំពាក្យក្រសួងការបរទេសរុស្ស៊ីលោកស្រី Maria Zakharova បាននិយាយនៅមុនកិច្ចពិភាក្សានេះថាប្រតិភូមកពី១២ប្រទេស រួមទាំងសហរដ្ឋអាមេរិកផងដែរនឹងចូលរួមក្នុងកិច្ចពិភាក្សាក្រុងម៉ូស្គូដែលរៀបចំជាលើកទីពីរនេះ។
លោកស្រីបានបញ្ជាក់អំពីសន្និសីទនេះថាមានគោលបំណងជួយសម្របសម្រួលបង្កើត «បរិយាកាសអំណោយផលមួយសម្រាប់កិច្ចសន្ទនារទ្វេភាគី និងពហុភាគី»ដើម្បីជំរុញឲ្យមានកិច្ចចរចារកដំណោះស្រាយចំពោះបញ្ហាក្នុងប្រទេសអាហ្វហ្គានីស្ថានឲ្យបានឆាប់បំផុត។
រដ្ឋាភិបាលក្រុងវ៉ាស៊ីនតោនបានបដិសេធមិនចូលរួមក្នុងកិច្ចប្រជុំលើកទីមួយដែលក្រុងម៉ូស្គូបានរៀបចំឡើងកាលពីឆ្នាំមុន ខណៈក្រុមតាលីបង់ក៏មិនបានចូលរួមកិច្ចប្រជុំនេះដែរ។
អ្នកនាំពាក្យក្រសួងការបរទេសអាមេរិកកាលពីថ្ងៃពុធបានបញ្ជាក់ថាតបទៅនឹងសំណើរបស់រដ្ឋាភិបាលអាហ្វហ្គានីស្ថាន ស្ថានទូតសហរដ្ឋអាមេរិកប្រចាំទីក្រុងម៉ូស្គូនឹងបញ្ជូនអ្នកតំណាងទៅចូលរួមអង្កេតកិច្ចពិភាក្សាទាំងនេះ»។ ប្រទេសចិន ប៉ាគីស្ថាន អ៊ីរ៉ង់ ឥណ្ឌា អ៊ូសបេគីស្ថាន កៀហ្ស៊ីស៊ីស្ថាន តាហ្ស៊ីគីស្ថាន អាហ្វហ្គានីស្ថាន កាហ្សាក់ស្ថាន និងតួកម៉េនីស្ថាន នឹងចូលរួមកិច្ចពិភាក្សានេះ។
រដ្ឋាភិបាលអាហ្វហ្គានីស្ថានបានបដិសេធមិនបញ្ជូនមន្ត្រីរបស់ខ្លួនទៅចូលរួមកិច្ចប្រជុំនេះ ប៉ុន្តែបានអនុញ្ញាតឲ្យប្រតិភូនៃក្រុមប្រឹក្សាសន្តិភាពជាន់ខ្ពស់របស់ប្រទេសទៅចូលរួមកិច្ចប្រជុំនេះ៕
© រក្សាសិទ្ធិដោយ thmeythmey.com
