អន្តរជាតិ
ផ្សិត Truffe ពណ៌សទម្ងន់៨៥០ក្រាមលក់បានតម្លៃជាង៩៥ ០០០ដុល្លារអាមេរិក
× ផ្សិត Truffe ពណ៌សមួយដែលមានទម្ងន់៨៥០ក្រាម បានលក់ដាច់ក្នុងតម្លៃ៨៥ ០០០អឺរ៉ូ (ជាង៩៥ ០០០ដុល្លារអាមេរិក) ក្នុងការដេញថ្លៃមួយដែលរៀបចំនៅក្រុង Alba ប្រទេសអ៊ីតាលី កាលពីពេលថ្មីៗកន្លងមកនេះ។ បើតាមផ្សាយរបស់ AFP អ្នកដែលដេញថ្លៃបាននោះ មានមូលដ្ឋាននៅហុងកុង ប៉ុន្តែមិនត្រូវបានបង្ហើបអត្តសញ្ញាណនោះឡើយ។
ផ្សិត Truffe ជាអាហារដែលមានរសជាតិឈ្ងុយឆ្ងាញ់ និងមានតម្លៃថ្លៃកប់ពពក ជាពិសេស Truffe ពណ៌ស។ ផ្សិតនេះ ត្រូវបានគេរកឃើញភាគច្រើននៅតាមតំបន់ភ្នំ Langhe និង Monterrat ភាគខាងជើងប្រទេសអ៊ីតាលី ហើយក្រុង Alba និង Asti ជាទីតាំងលក់ និងចែកចាយដ៏ធំ។
នេះជាលើកទី១៩ហើយ ដែលទីក្រុង Alba ដាក់ឲ្យមានការដេញថ្លៃផ្សិត Truffe ទូទាំងពិភពលោក។ ផ្សិត Truffe ពណ៌ស ដែលល្បីល្បាញ និងឈ្ងុយឆ្ងាញ់បំផុតនោះ គឺជាផ្តិតដែលគេប្រមូលផលចន្លោះពីថ្ងៃទី២១ ខែកញ្ញា ដល់ថ្ងៃទី៣១ ខែមករា។
ការលក់ដាច់ក្នុងតម្លៃជាង៩៥ ០០០ដុល្លារអាមេរិកសម្រាប់ផ្សិត White Truffe ទម្ងន់៨៥០គីឡូក្រាម បានក្លាយជាកំណត់ត្រាថ្មីមួយ ដែលមានន័យថា ផ្សិត១ក្រាមមានតម្លៃរហូតដល់ទៅជាង១១២ដុល្លារអាមេរិកឯណោះ។
លោក Antonio Degiacomi ប្រធានមជ្ឈមណ្ឌលជាតិសិក្សាពីដំណាំផ្សិត Truffe ទិន្នផលកាលពីរដូវកាលមុ មិនសូវគាប់ប្រសើរនោះឡើយដោយសារតែគ្រោះរាំងស្ងួត ពោលក្នុង១០០ក្រាម លក់បានតម្លៃប្រមាណតែ៦០០ ទៅ៧០០អឺរ៉ូ ប៉ុណ្ណោះ។
លោក Degiacomi មានជំនឿថា ដំណាំដែលមានតម្លៃកប់ពពកនេះ មានទិន្នផលកាន់តែល្អប្រសើរដោយសារតែអាកាសធាតុអំណោយផល ជាពិសេសមានភ្លៀងធ្លាក់គ្រប់គ្រាន់ ដែលអាចឲ្យវាលូតលាស់ទៅតាមធម្មជាតិ៕
Tag:
ផ្សិត Truffe
អ៊ីតាលី
© រក្សាសិទ្ធិដោយ thmeythmey.com