អន្តរជាតិ
ក្រោយ ត្រាំ រិះគន់ ម៉ាក្រុង ថា បារាំងនិងអាមេរិកជាមិត្តដែលគួរគោរពគ្នាទៅមក
ប្រធានាធិបតីអាមេរិក និងប្រធានាធិបតីបារាំង នាជំនួបនៅប៉ារីស (រូបភាព AFP)
×![]()
ដោយ: តន ចាន់រិទ្ធារ៉ា
ប្រធានាធិបតីបារាំង អេម៉ានុយអែល ម៉ាក្រុង បានឆ្លើយតបវិញទៅប្រធានាធិបតីអាមេរិក ដូណាល់ ត្រាំ ដែលរិះគន់លោកតាមបណ្ដាញ Twitter កាលពីដើមសប្ដាហ៍នេះ។ ខណៈលោក ត្រាំ ឌឺដងបារាំងរឿងអតីតកាលសម័យសង្គ្រាមលោកទាំងពីរលើក និងរិះគន់រឿងយកពន្ធស្រានោះ លោក ម៉ាក្រុង ប្រាប់វិញថា អាមេរិកគួរគោរពបារាំង ហើយបារាំងក៏មិនមែនជាប្រទេសរណបគេដែរ។ 
ធ្លាប់តែស្និទ្ធស្នាលនឹងគ្នា ប្រធានាធិបតីបារាំង និងសមភាគីអាមេរិកបែរជាកំពុងឆ្លើយឆ្លងពាក្យសម្ដីគ្នាទៅវិញ។ តាំងពីចុងសប្ដាហ៍មុនមក លោក ដូណាល់ ត្រាំ បានរិះគន់លោក អេម៉ានុយអែល ម៉ាក្រុង កប់ៗមាត់ ព្រោះមិនពេញចិត្តមហិច្ឆតារបស់បារាំងដែលចង់បង្កើតកងទ័ពអឺរ៉ុប ដែលអាចដើរតួជំនួសសម្ព័ន្ធយោធាណាតូ។ លោក ត្រាំ បានព្យាយាមភ្ជាប់ករណីនេះទៅនយោបាយក្នុងស្រុកបារាំង ក៏ដូចជាការមិនសប្បាយចិត្តរបស់លោកក្នុងជំនួញស្រាផង។
លោក ម៉ាក្រុង ដែលអះអាងថា ប្រជាជនបារាំងមិនចង់ឃើញលោកឆ្លើយតបទៅលោក ត្រាំ នោះ បានរំឭកពីប្រវត្តិនៃកិច្ចសហប្រតិបត្តិការរវាងបារាំង និងអាមេរិកកាលពីអតីតរហូតក្លាយជាសម្ព័ន្ធមិត្តរឹងមាំដូចសព្វថ្ងៃ។ «ក្នុងពេលវេលាសំខាន់នៃប្រវត្តិសាស្ត្រ យើងគឺជាមិត្ត។» នេះជាការលើកឡើងរបស់លោក ត្រាំ ពីលើនាវាដឹកយន្តហោះ Charles de Gaulle ដោយចង់សំដៅដល់ការជួយរបស់បារាំងក្នុងសង្គ្រាមឯករាជ្យអាមេរិក ការចូលរួមក្នុងសង្គ្រាមលោក និងប្រតិបត្តិការយោធានៅអាហ្វហ្គានីស្ថាន។
ក្នុងនាមជាសម្ព័ន្ធមិត្ត បារាំង និងអាមេរិកត្រូវគោរពគ្នាទៅមក។ លោក ម៉ាក្រុង បន្ថែមដូចនេះក្នុងកិច្ចសម្ភាសជាមួយទូរទស្សន៍ TF1 ។ ប្រធានាធិបតីវ័យក្មេងរូបនេះបានហៅពាក្យសម្ដីវាយប្រហាររបស់លោក ត្រាំ ជាការធ្វើនយោបាយដើម្បីសាធារណមតិក្នុងស្រុកនៅអាមេរិកប៉ុណ្ណោះ ហើយលោកនឹងអនុញ្ញាតឲ្យសមភាគីអាមេរិករបស់លោកបន្តលេងល្បែងនយោបាយនេះទៀត។
ឯរឿងគម្រោងបង្កើតកងទ័ពប្រចាំអឺរ៉ុបវិញ លោក ម៉ាក្រុង នឹងមិនដកថយជំហររបស់ខ្លួនឡើយ ខណៈអធិការបតីអាល្លឺម៉ង់ អែនជែឡា មឺហ្គែល ក៏ប្រកាសគាំទ្រគំនិតនេះរួចហើយដែរ។ លើសពីនោះ លោកក៏បង្ហាញជំហរមិនពេញចិត្តនឹងអាមេរិកដែលបញ្ចេញចរិតលើសគេឯងដែរ។ ក្នុងកិច្ចសម្ភាសដដែល មេដឹកនាំបារាំងរូបនេះលើកឡើងថា អាមេរិកនឹងនៅតែជាសម្ព័ន្ធមិត្តបារាំង ដែលប្រឈមមុខរាល់គ្រោះថ្នាក់ តែជាសម្ព័ន្ធមិត្ត មិនមានន័យថា ជារដ្ឋរណបឡើយ។
ទោះជាយ៉ាងណា លោក ម៉ាក្រុង ជឿថា ការខ្វែងគំនិតគ្នានេះនឹងមិនប៉ះពាល់ដល់កិច្ចសហប្រតិបត្តិការរឹងមាំរវាងបារាំង និងអាមេរិកឡើយ ជាពិសេសយុទ្ធនាការយោធារួមគ្នាក្នុងការប្រយុទ្ធប្រឆាំងក្រុមជ្រុលនិយម។ សព្វថ្ងៃ បារាំងជាផ្នែកមួយនៃសម្ព័ន្ធអន្តរជាតិដែលបោសសម្អាតក្រុមភេរវកររដ្ឋឥស្លាម ដែលនៅសេសសល់ក្នុងប្រទេសនៅមជ្ឈិមបូព៌ាដូចជាស៊ីរី និងអ៊ីរ៉ាក់៕
Tag:
បារាំង
អាមរិក
អេម៉ានុយអែល ម៉ាក្រុង
ដូណាល់ ត្រាំ
© រក្សាសិទ្ធិដោយ thmeythmey.com
