អន្តរជាតិ
សហរដ្ឋអាមេរិកមានមូលដ្ឋានទ័ពជាង៨០០ទីតាំងនៅក្រៅប្រទេស មួលដ្ឋានទ័ពអាមេរិកនៅកាតា (រូបភាពទីភ្នាក់ងារព័ត៌មានកាតា)
× សហរដ្ឋអាមេរិក ដែលជាមហាអំណាចយោធាលំដាប់ទី១ ជាមួយកញ្ចប់ថវិកាយោធាប្រចាំឆ្នាំជាង៧០០ពាន់លានដុល្លារ មានមូលដ្ឋានទ័ពជាង៨០០ទីតាំង នៅក្នុងប្រទេសជាង៧០ និងដែនដីអធិបតេយ្យបរទេសផ្សេងៗទៀត។ ដើម្បីរក្សាមូលដ្ឋានទ័ព និងកងទ័ពនៅក្រៅប្រទេសបែបនេះ តើអាមេរិកចំណាយប្រាក់ចំនួនប៉ុន្មានក្នុងមួយឆ្នាំ?
ម្ចាស់ស្នាដៃសៀវភៅក្រោមចំណងជើង៖ «Base Nation: How U.S. Military Bases Overseas Harm America and the World» លោក David Vine បានគណនាថា សម្រាប់រក្សាមូលដ្ឋានទ័ព និងកងទ័ពរបស់អាមេរិកនៅបរទេស ក្រសួងការពារជាតិបានចំណាយប្រាក់ចន្លោះពី ៨៥ ទៅ ១០០ ពាន់លានដុល្លារ ក្នុងកញ្ចប់ថវិកាការពារជាតិឆ្នាំ២០១៤។ បើគិតសរុបបញ្ចូលជាមួយប្រាក់ចំណាយលើមូលដ្ឋានទ័ព និងកងទ័ពក្នុងសមរភូមិប្រយុទ្ធទៀត គឺត្រូវការប្រាក់ទាំងអស់ប្រមាណពី១៦០ ទៅ ២០០ពាន់លានដុល្លារឯណោះ។
សៀវភៅខាងលើដែលបានចេញលក់ជាផ្លូវការកាលពីខែសីហាឆ្នាំ២០១៥ បានបង្ហាញថា លើពិភពលោកមានប្រទេសចំនួន១១ប៉ុណ្ណោះ ដែលមានមូលដ្ឋានទ័ពរបស់ខ្លួននៅបរទេស។ ហើយបើគិតបញ្ចូលគ្នាទៅ ប្រទេសទាំងអស់នេះ មានមូលដ្ឋានទ័ពនៅក្រៅបរទេសប្រមាណ ៧០ទីតាំងប៉ុណ្ណោះ។
តួយ៉ាង រុស្ស៊ី ត្រូវបានប៉ាន់ស្មានថា មានមូលដ្ឋានទ័ពពី ២៦ ទៅ ៤០ទីតាំង នៅក្នុងប្រទេសចំនួន៩ ក្នុងនោះភាគច្រើន ជាបណ្តាប្រទេសអតីតសហភាពសូវៀត និងស៊ីរីជាដើម។ រីឯ ចក្រភពអង់គ្លេស, បារាំង និងតួកគីរៀងៗខ្លួន មានមូលដ្ឋានទ័ពនៅបរទេសប្រមាណពី ៤ ទៅ ១០ ទីតាំង។ ចំណែកឯ ឥណ្ឌា ចិន ជប៉ុន កូរ៉េខាងត្បូង អាល្លឺម៉ង់ អ៊ីតាលី និងហូឡង់រៀងៗខ្លួន ត្រូវបានប៉ាន់ស្មានថា មានមូលដ្ឋានទ័ពនៅបរទេស ពី ១ ទៅ ៣ ទីតាំងប៉ុណ្ណោះ៕
Tag:
សហរដ្ឋអាមេរិក
មូលដ្ឋានទ័ពបរទេស
© រក្សាសិទ្ធិដោយ thmeythmey.com