អន្តរជាតិ
អតីតទាហានហ្គាតេម៉ាឡាម្នាក់ជាប់ពន្ធនាគារ៥១៦០ឆ្នាំពីបទសម្លាប់មនុស្ស១៧១នាក់
×![]()
ដោយ: ធីតា
តុលាការប្រទេសហ្គាតេម៉ាឡា កាលពីថ្ងៃពុធ បានកាត់ទោសអតីតទាហានម្នាក់ឲ្យជាប់ពន្ធនាគាររយៈពេល៥១៦០ឆ្នាំ ពាក់ព័ន្ធនឹងការសម្លាប់រង្គាលនូវមនុស្ស១៧១នាក់នាអំឡុងនៃសង្គ្រាមស៊ីវិលក្នុងប្រទេសអាមេរិកកណ្តាលមួយនេះ។
ហ្គាតេម៉ាឡា បានរងគ្រោះដោយសង្គ្រាមស៊ីវិលចន្លោះពីឆ្នាំ១៩៦០ ដល់ឆ្នាំ១៩៩៦។ កាលពីឆ្នាំ១៩៨២ កសិករ២០១រងនូវទារុណកម្មរហូតដល់ស្លាប់ ដែលក្នុងនោះ ១៧១នាក់ បាត់បង់ជីវិតក្រោមដៃរបស់នាយទាហាន Santos Lopez ដែលបានប្រព្រឹត្តនៅក្បែព្រំដែនម៉ិកស៊ិក។
តុលាការរកឃើញថា Lopez អាយុ៦៦ឆ្នាំ ពិតជាបានប្រព្រឹត្តអំពើដ៏ព្រៃផ្សៃបែបនេះមែន ដែលឈានដល់ការកាត់ទោស៣០ឆ្នាំសម្រាប់ជីវិតម្នាក់ៗ រួមទាំង៣០ឆ្នាំបន្ថែមទៀត ទាក់ទងនឹងការសម្លាប់កុមារ ដែលនាំឲ្យទោសនេះកើនដល់៥១៦០ឆ្នាំពីបទមនុស្សឃាត និងឧក្រិដ្ឋកម្មប្រឆាំងនឹងមនុស្សជាតិ។
ទោះបីជាយ៉ាងណាក៏ដោយ ទោសទាំងអស់នេះ គ្រាន់តែជានិម្មិតរូបប៉ុណ្ណោះ ពីព្រោះកម្រិតទោសពន្ធនាគារអតិបរិមានៅហ្គាតេម៉ាឡា មានត្រឹមតែ៥០ឆ្នាំ។
Lopez គឺជាអតីតសមាជិកកងកម្លាំងម្នាក់ដែលទទួលការបង្វឹកពីអាមេរិក ដែលមានឈ្មោះថា Kaibil។ កាលពីឆ្នាំ២០១៦ គេត្រូវឃាត់ខ្លួន និងបញ្ជូនចេញពីសហរដ្ឋអាមេរិក។ ក្រៅពីនេះ គូកនផ្សេងទៀតរបស់គេ ក៏ត្រូវបានឃុំខ្លួននៅសហរដ្ឋអាមេរិកផងដែរ។
យោងតាមរបាយការណ៍អង្គការសហប្រជាជាតិ មនុស្សប្រមាណ២០០ ០០០នាក់ បានស្លាប់ និងបាត់ខ្លួន នាអំឡុងសង្គ្រាមស៊ីវិលដ៏រ៉ាំរៃនៅហ្គាតេម៉ាឡា មុននឹងបញ្ចប់ផ្លូវការនៅឆ្នាំ១៩៩៦៕
Tag:
ហ្គាតេម៉ាឡា
© រក្សាសិទ្ធិដោយ thmeythmey.com
