ជាតិ
អន្តរជាតិ
«ខ្លាលឿងមាស» ជាប្រភេទសត្វកម្រ ដែលរងការគំរាមកំហែងយ៉ាងខ្លាំង!
× «ខ្លាលឿងមាស» ជាប្រភេទសត្វកម្រ និងទទួលការគំរាមកំហែងយ៉ាងខ្លាំង។ «ខ្លាលឿងមាស» មាននៅតំបន់ភូមិភាគខាងជើង, និរតី និងឦសាននៃប្រទេសកម្ពុជា ហើយគេក៏ប្រទះឃើញវាផងដែរ នៅភូមិភាគខាងកើតប្រទេសឥណ្ឌា រហូតដល់ភាគខាងត្បូង, ប្រទេសចិន, តំបន់អាស៊ីអាគ្នេយ៍ និងកោះស៊ូម៉ាត្រាប្រទេសឥណ្ឌូនេស៊ី។ «ខ្លាលឿងមាស» ស្ថិតនៅក្នុងក្រុមប្រភេទមានកម្រ និងត្រូវបានចុះក្នុងបញ្ជីក្រហមនៃអង្គការ IUCN ថាជាប្រភេទងាយរងគ្រោះថ្នាក់។
«ខ្លាលឿងមាស» រស់នៅក្នុងព្រៃចម្រុះ និងតាមព្រៃស្រោង។ ទោះបីវាជាសត្វដើរលើដីមែន ប៉ុន្តែវាក៏អាចឡើងដើមឈើបានយ៉ាងរហ័សផងដែរ នៅពេលដែលវាមានអាសន្ន។ «ខ្លាលឿងមាស» ជាប្រភេទសត្វធំជាងគេ ក្នុងចំណោមត្រកូលខ្លាតូចៗ។ ជាធម្មតា វាចាប់អាហារជាគូ និងមានសកម្មភាពទាំងយប់ទាំងថ្ងៃ។ អាហាររបស់វាមានដូចជា សត្វទន្សាយ, ក្ដាន់ញ៉ែង, សត្វស្លាប, ត្រគួត ពិសេសពពួកសត្វមាន់ទោ និងសត្វតូចៗដទៃទៀត។ នេះបើយោងតាមសៀវភៅថនិកសត្វកម្ពុជា។
«ខ្លាលឿងមាស» អាចបង្កើតកូនបានពី១-២ក្បាល បន្ទាប់ពីវាពពោះបានរយៈពេល៩០ថ្ងៃ។ ជាទូទៅ វាបង្កើតកូននៅក្នុងរុន្ធឈើ រូងដី ឬក្នុងចន្លោះផ្ទាំងថ្ម។ ប្រសិនជាកូនរបស់វាបាត់បង់ទៅ មេអាចបន្តពូជបានក្នុងរយៈ ពេល ៤ខែបន្ទាប់។ ចំណែកខ្លាឈ្មោល មានតួនាទីសំខាន់ក្នុងការថែរក្សាកូន និងនៅជាមួយមេអំឡុងមេមានកូន។
ប្រភពឯកសារសត្វនេះ សារព័ត៌មានថ្មីៗ ដកស្រង់ចេញពីសៀវភៅថនិកសត្វកម្ពុជា ដែលរៀបរៀងដោយ ម៉ែន សូរិយន់, សួន ផល្លា, ស៊ិន ប៉ូលីន និង Joe Walston ឆ្នាំ២០០៨៕
© រក្សាសិទ្ធិដោយ thmeythmey.com