បុរសអាមេរិកម្នាក់ចាក់ឆ្នោតលេខដដែលៗ២៥ឆ្នាំរហូតដល់ឈ្នះរង្វាន់ Jackpot

អន្តរជាតិ

បុរសអាមេរិកម្នាក់ចាក់ឆ្នោតលេខដដែលៗ២៥ឆ្នាំរហូតដល់ឈ្នះរង្វាន់ Jackpot

25, Nov 2018 , 8:29 am

រូបភាព

ដោយ: ធីតា

និវត្តជនអាមេរិកវ័យ៦៧ឆ្នាំម្នាក់ បានចាក់ឆ្នោតលេខដដែលៗអស់រយៈពេលជាង២៥ឆ្នាំ រហូតដល់ឈ្នះរង្វាន់ Jackpot ដ៏ធំប្រចាំក្រុងញូវយ៉ក សហរដ្ឋអាមេរិក ដែលមានទឹកប្រាក់រហូតដល់ទៅ៣៤៣,៨លានដុល្លារអាមេរិក។

លោក Robert Bailey ដែលរស់នៅក្នុងក្រុងញូវយ៉ក អះអាងថា កាលពីជាង២៥ឆ្នាំ សាច់ញាតិម្នាក់របស់លោកបានប្រាប់ឆ្នោត៦លេខដល់លោក។ ចាប់តាំងពីពេលនោះ មក លោកតែងតែព្យាយាមយកលេខទាំងនេះទៅចាក់ ជាពិសេសក្នុងកម្មវិធីឆ្នោត «Powerball»។

លោកបានចាក់លេខសំណាងនេះ នៅហាងមួយក្នុងតំបន់ West Harlem Deli ដោយក្រោយពីការកាត់ពន្ធរួច លោក Bailey ត្រូវទទួលប្រាក់សុទ្ធចំនួន១២៥លានដុល្លារអាមេរិក។ យោងតាមការផ្សាយរបស់ CNN រង្វាន់ Jackpot របស់ឆ្នោត «Powerball» នោះ បានឡើងដល់៦៨៧លានដុល្លារអាមេរិក ដោយក្រៅពីលោក Bailey មានអ្នកឈ្នះរង្វាន់ម្នាក់ទៀតពីរដ្ឋ Iowa។

បុរសវ័យ៦៧ឆ្នាំរូបនេះ បានអះអាងថា លោកតែងតែជំនឿលើសំណាងរបស់ខ្លួន បន្ទាប់ពីទទួលបានលេខពីសាច់ញាតិម្នាក់របស់ខ្លួន។ បើទោះបីជាលោកបានឈ្នះរង្វាន់ Jackpot ក៏ដោយ ប៉ុន្តែលោកនៅតែបន្តយកលេខដដែលទៅចាក់បន្តទៀត។

ក្រោយឈ្នះរង្វាន់ លោក Bailey រៀបចំគម្រោងដំណើរកម្សាន្តទៅកាន់តំបន់ផ្សេងៗ និងទិញផ្ទះមួយខ្នងជូនម្តាយ រួមទាំងត្រៀមរៀបចំគម្រោងហិរញ្ញវត្ថុផ្សេងៗ៕