អន្តរជាតិ
លទ្ធផលបោះឆ្នោតមិនសមប្រកប ប្រធានាធិបតីតៃវ៉ាន់ លាលែងពីតំណែងប្រធានបក្សកាន់អំណាច
ប្រធានាធិបតីតៃវ៉ាន់ Tsai Ing-wen ប្រកាសលាលែងពីតំណែងប្រធានបក្ស (រូបភាព AFP)
×![]()
ដោយ: តន ចាន់រិទ្ធារ៉ា
ប្រធានាធិបតីតៃវ៉ាន់ Tsai Ing-wen នៅថ្ងៃទី២៤ ខែវិច្ឆិកា បានប្រកាសលាលែងពីតំណែងប្រធានបក្សប្រជាធិបតេយ្យជឿនលឿន (DPP) ដែលជាបក្សកាន់អំណាច បន្ទាប់ពីទទួលបានលទ្ធផលមិនល្អក្នុងការបោះឆ្នោតពាក់កណ្ដាលអាណត្តិថ្នាក់តំបន់។ បក្សកាន់អំណាចបានបាត់បង់តំណែងអភិបាលក្រុងសំខាន់ៗ ដែលបានធ្លាក់ទៅលើដៃបក្សប្រឆាំងវិញ។ លទ្ធផលនេះ ក៏ជះឥទ្ធិពលដល់លោកស្រី Tsai ដែរ ដ្បិតនេះជាការសាកល្បងប្រជាប្រិយភាពលោកស្រីមុនការបោះឆ្នោតប្រធានាធិបតី។
បក្សកាន់អំណាចប្រជាធិបតេយ្យជឿនលឿន បានបាត់បង់ទីក្រុងធំៗចំនួនពីរក្នុងការបោះឆ្នោតពាក់កណ្ដាលអាណត្តិថ្នាក់តំបន់។ ជាលើកដំបូងក្នុងរយៈពេល២០ឆ្នាំ បក្សនេះបានបាត់បង់តំណែងអភិបាលក្រុង Kaohsiung ដែលជាមូលដ្ឋានរឹងមាំរបស់ខ្លួន និងចាញ់នៅទីក្រុងធំទីពីរ Taichung ទៀត។ តំណែងអភិបាលក្រុងទាំងពីរនេះបានធ្លាក់ទៅលើបក្សប្រឆាំងគួរមីងតាង ដែលមាននយោបាយសិទ្ធិក្រុងប៉េកាំង។
ជាមួយនឹងបរាជ័យនេះ ប្រធានាធិបតីតៃវ៉ាន់ Tsai Ing-wen បានប្រកាសលាលែងពីតំណែងប្រធានបក្សកាន់អំណាច និងបានសុំទោសអ្នកគាំទ្រផង។ យ៉ាងណាមិញ ការលាលែងពីតំណែងមិនប៉ះពាល់តំណែងប្រធានាធិបតីរបស់លោកស្រីឡើយ ប៉ុន្តែលទ្ធផលការបោះឆ្នោតនេះ ជាប្រជាមតិវាស់ស្ទង់ប្រជាប្រិយភាពរបស់លោកស្រី ដែលមានគម្រោងការពារកៅអីប្រធានាធិបតីសម្រាប់ការបោះឆ្នោតឆ្នាំ២០២០ ខាងមុខ។
ទោះជាបាត់បង់ទីក្រុងសំខាន់ពីរក្ដី បក្សប្រជាធិបតេយ្យជឿនលឿនបានរក្សាតំណែងអភិបាលក្រុងនៅTainan ភាគត្បូង និងក្រុង Taoyuan នៅភាគជើងប្រទេស។ សម្រាប់លទ្ធផលនៅក្រុងតៃប៉ិវិញ បេក្ខជនឯករាជ្យ Ko Wen-je ទំនងជារក្សាតំណែងអភិបាលក្រុងរបស់ខ្លួនបន្តទៀត ខណៈបេក្ខជនរបស់បក្សប្រឆាំងនៅលេខរៀងទី២ និងបេក្ខជនបក្សកាន់អំណាចទទួលសំឡេងគាំទ្រលំដាប់ទី៣ ។
ឯបក្សប្រឆាំងគួរមីងតាងវិញ បានប្រកាសជោគជ័យក្នុងទីក្រុង និងតំបន់ចំនួន១៣ ក្នុង២២ ខណៈមុននេះបក្សមានកាន់តែចំនួន៦ទីក្រុងប៉ុណ្ណោះ។ បក្សកាន់អំណាច DPP ដែលមុនការបោះឆ្នោតគ្រប់ទីក្រុងចំនួន១៣នោះ បានប្រកាសជ័យជម្នះនៅទីក្រុងចំនួន៦ គឺបានថយចុះពាក់កណ្ដាលឯណោះ។
ប្រជាប្រិយភាពរបស់រដ្ឋាភិបាលលោកស្រី Tsai ដែលគាំទ្រការផ្ដាច់ខ្លួន បានធ្លាក់ចុះនៅពេលថ្មីៗនេះ។ គោលនយោបាយរដ្ឋាភិបាលដូចជាការគម្រោងឧបត្ថម្ភចូលនិវត្តន៍ និងច្បាប់ការងារជាដើម បង្កជាការមិនពេញចិត្តទាំងក្នុងស្រទាប់អ្នកគាំទ្រ និងបក្សប្រឆាំង។ មានអ្នករិះគន់ខ្លះបានចោទលោកស្រី Tsai ថាបានដើរចេញឆ្ងាយពីការសន្យាពេលបោះឆ្នោតប្រធានាធិបតីក្នុងការកាត់បន្ថយឱនភាពសេដ្ឋកិច្ច និងការកាត់ការបំពុលបរិស្ថាន៕
Tag:
តៃវ៉ាន់
Tsai Ing-wen
© រក្សាសិទ្ធិដោយ thmeythmey.com
