សប្តាហ៍នេះ នាយករដ្ឋមន្ត្រី មហាធៀ មហាម៉ាត់ បានរិះគន់ប្រជាជនម៉ាឡេស៊ីមិនសំចៃមាត់ ដោយលោកអះអាងថា ពួកគេខ្ជិលច្រអូសមិនប្រឹងធ្វើការ ប៉ុន្តែចង់បានតែជំនួយពីរដ្ឋ។ មេដឹកនាំវ័យចំណាស់ជាងគេរូបនេះក៏រំពឹងដែរថា បើប្រជាជនម៉ាឡេស៊ីនៅខ្ជិលច្រអូសបែបនេះ ប្រទេសជិតខាងដូចជាវៀតណាមនឹងវ៉ាដាច់ម៉ាឡេស៊ីឆាប់ៗមិនខាន ដ្បិតប្រជាជនវៀតណាមឧស្សាហ៍ព្យាយាមធ្វើការណាស់។
ក្នុងពិធីសម្ពោធរមណីយដ្ឋាន Dash Resort នៅលើកោះឡាំងកាវី នាថ្ងៃអាទិត្យទី ២៥ ខែវិច្ឆិកា នាយករដ្ឋមន្ត្រីម៉ាឡេស៊ីវ័យ ៩៣ឆ្នាំរូបនេះបានថ្លែងថា ប្រជាជនម៉ាឡេស៊ីខ្ជិលច្រអូស និងមិនសូវចង់ធ្វើការងារឡើយ។
យោងតាមសារព័ត៌មានម៉ាឡេស៊ី Malaysia Insight លោក មហាធៀ អះអាងថា ប្រជាជនម៉ាឡេស៊ីខ្ជិល ព្រោះពួកគេមានទម្លាប់ផ្តេកផ្តួលលើជំនួយហិរញ្ញវត្ថុពីរដ្ឋ ជាពិសេសពីគម្រោងប្រជាជនម៉ាឡេស៊ីតែមួយ (1Malaysia People’s Aid) ដែលដាក់ចេញដោយរដ្ឋាភិបាលមុនដែរ។
មេដឹកនាំរូបនេះពន្យល់ថា ម៉ាឡេស៊ីត្រូវនាំពលករបរទេសធ្វើការងារលំបាក ព្រោះប្រជាជនម៉ាឡេស៊ីមិនចង់ធ្វើការងារទាំងនោះឡើយ។ ចុងក្រោយពន្ធដែលរដ្ឋាភិបាលប្រមូលបានពីពលករបរទេសបានត្រឹមចំណាយលើការផ្គត់ផ្គង់ឲ្យប្រជាជនម៉ាឡេស៊ីប៉ុណ្ណោះ។
លោក មហាធៀ និយាយបែបនេះ៖ «យើងនាំពលករពីក្រៅប្រទេសមកឲ្យធ្វើការងារដែលប្រជាជនម៉ាឡេស៊ីមិនចង់ធ្វើ។ ចំណែករដ្ឋាភិបាលត្រឹមប្រមូលពន្ធពីពួកគេដើម្បីផ្តល់ឲ្យទៅប្រជាជនម៉ាឡេស៊ីដែលគិតថា ពួកគេគ្មានលទ្ធភាពធ្វើការងារទៅវិញ»។
បន្ទាប់ពីរិះគន់ភាពខ្ជិលច្រអូសរបស់ប្រជាជន លោក មហាធៀ ក៏បានព្យាករផងដែរពី អនាគតនៃសេដ្ឋកិច្ចម៉ាឡេស៊ី បើសិនជាប្រជាជននៅតែខ្ជិលច្រអូសមិនប្រឹងប្រែងខ្លាំងនោះ។ លោកហ៊ានទាយថា ប្រទេសអាស៊ានដូចជាវៀតណាមដែលធ្លាប់ឆ្លងកាត់សង្គ្រាមស៊ីវិលនោះនឹងមានសេដ្ឋកិច្ចរីកចម្រើនជាងម៉ាឡេស៊ីនៅពេលខាងមុខផងព្រោះវៀតណាមមានប្រជាជនឧស្សាហ៍ព្យាយាមច្រើន។
« វៀតណាមនឹងវ៉ាដាច់ម៉ាឡេស៊ីដ្បិតអីប្រជាជនរបស់គេសង្វាតប្រឹងប្រែងធ្វើការណាស់។ វាខុស ពីនៅម៉ាឡេស៊ីដែលប្រជាជនមិនចង់ធ្វើការងារទេព្រោះរដ្ឋាភិបាលផ្តល់លុយឲ្យពួកគេ»។ នេះជាសម្តីរបស់លោក មហាធៀ។
ក្នុងសុន្ទរកថានេះដែរ លោក មហាធៀ ក៏ឆ្លៀតលើកឡើងពី តួនាទីរបស់រដ្ឋក្នុងសកម្មភាពពាណិជ្ជកម្មដែរ។ លោកជឿជាក់ថា រដ្ឋមិនគួរព្យាយាមប្រឡូកក្នុងកិច្ចការងារអាជីវកម្មឬពាណិជ្ជកម្មឡើយ ព្រោះថា រដ្ឋគ្មានជំនាញច្បាស់លាស់ទេ។ បើមិនដូច្នេះទេ រដ្ឋនឹងខាតឡុងចុងមិនខាន។
«រដ្ឋាភិបាលគ្មានចំណេះជំនាញក្នុងការធ្វើជំនួញឬរកស៊ីឡើយ។ យើងនឹងខាតលុយបើហ៊ានធ្វើ។ ដូចដឹងស្រាប់ហើយ កាតព្វកិច្ចចម្បងរបស់រដ្ឋាភិបាលគឺបង្កើត និងអនុវត្តច្បាប់ប៉ុណ្ណោះ។ ចំណែកវិស័យឯកជនគេដឹងច្បាស់ពីរបៀបបង្កើតលុយ។ ពួកគេមានគំនិតរកស៊ី»។ លោក មហាធៀ ថ្លែងបែបនេះ៕