កីឡាអន្តរជាតិ
អន្តរជាតិ
យូណេស្កូចុះបញ្ជីចំបាប់ប្រពៃណី Ssireum/Ssirum ដែលស្នើដោយបងប្អូនកូរ៉េទាំងពីរ
× ក្រោមហេតុផល សន្តិភាព វិបុលភាព និងការបង្រួបបង្រួម អង្គការយូណេស្កូ បានចុះជាប្រវត្តិសាស្ត្រនូវចំបាប់ប្រពៃណី Ssireum/Ssirum ក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិ ក្រោយការស្នើសុំរួមគ្នារបស់កូរ៉េខាងត្បូង និងកូរ៉េខាងជើង។ ការសម្រេចនេះ ធ្វើឡើងនៃថ្ងៃដំបូងនាសម័យប្រជុំលើកទី១៣នៃគណៈកម្មាធិការអន្តររដ្ឋាភិបាលសម្រាប់ការថែរក្សាបេតិកភណ្ឌវប្បធម៌អរូបីនៅមជ្ឈមណ្ឌល Swami Vivekananda International Convention Centre (SVICC) ក្រុង Port Loiuis ប្រទេសម៉ូរីស ថ្ងៃទី២៦ ខែវិច្ឆិកា ឆ្នាំ២០១៨ ។
កូរ៉េខាងជើង និងខាងត្បូងត្រូវបានគេមើលឃើញថាកំពុងដើរលើផ្លូវតែមួយក្នុងការខិតខំផ្សះផ្សាគ្នាបន្ទាប់ពីអង្គការយូណេស្កូ យល់ព្រមដាក់កីឡាចំបាប់របស់បងប្អូនកូរ៉េទាំងពីរជាផ្នែកមួយនៃសម្បត្តិបេតិកភណ្ឌវប្បធម៌ពិភពលោក។
កូរ៉េទាំងពីរដំបូងឡើយបានដាក់ពាក្យសុំដាច់ដោយឡែកពីគ្នារៀងខ្លួនសម្រាប់ការស្នើសុំដាក់កីឡាចំបាប់នេះទៅក្នុងបញ្ជីបេតិកភ័ណ្ឌពិភពលោករបស់យូណេស្កូ។ ប៉ុន្តែពួកគេបានសម្រេចចិត្តស្នើរួមគ្នា បន្ទាប់ពីជំនួបរវាងមេដឹកនាំទាំងពីរ គឺលោក មុន ជេអ៊ីន និងគីម ជុងអ៊ុន។
កាលពីដើមឡើយកូរ៉េខាងជើង និងខាងត្បូងគឺជាប្រទេសតែមួយមុនពេលបែងចែកគ្នាជាប្រទេសពីរនៅឆ្នាំ ១៩៤៥។ ពួកគេបានពុះចែកព្រំដែនយ៉ាងរឹងមាំបំផុតទាំងដែលប្រទេសទាំងពីរនេះមានភាសា និងវប្បធម៌ដូចគ្នា។
មិនត្រឹមតែប៉ុណ្ណោះពួកគេក៏បានប្រើប្រាស់ឈ្មោះកីឡាចំបាប់នេះជាភាសារអង់គ្លេសខុសគ្នាផងដែរ។ កីឡាចំបាប់ដែលសរសេរជាភាសាអង់គ្លេស «Ssirum» គឺសម្រាប់កូរ៉េខាងជើង និង «Ssireum» សម្រាប់កូរ៉េខាងត្បូង។ យោងតាមរដ្ឋបាលបេតិកភណ្ឌវប្បធម៌របស់កូរ៉េខាងត្បូង កូរ៉េទាំងពីបានសម្រេចប្រើពាក្យជាភាសារអង់គ្លេសទាំងពីរខាងលើដើម្បីស្នើរួមគ្នាទៅកាន់យូណេស្កូ។
ក្រៅពីចំបាប់ កូរ៉េខាងជើងបានឈ្នះការទទួលស្គាល់ពី UNESCO លើសម្បត្តិវប្បធម៌ចំនួនពីរផ្សេងទៀតរួចហើយគឺបទចំរៀងប្រជាប្រិយកូរ៉េ «Airrang» និងជ្រក់ស្ពៃ Kimchi ។ Airrang និង Kimchi ក៏ស្ថិតក្នុងចំណោមសម្បត្តិបេតិកភណ្ឌទាំង១៩ ដែលកូរ៉េខាងត្បូងបានពី UNESCO ដូចគ្នា៕
© រក្សាសិទ្ធិដោយ thmeythmey.com